Hruê knhal jih hruê kăm, ti sang luê êa phung hđeh čar Dak Lak ăt hơ̆k mơak hĭn hŏng yang đar. Klei blŭ tlao mbĭt hŏng klei pah êa êjai giăm 100 čô hđeh nao hriăm hŏng akŏ “gang mkhư̆ klei mgăt êa leh anăn klei kpĕ êka kơ phung hđeh”. Adei Nguyễn Phan Phương Linh, 12 thŭn ti ƀuôn hgŭm Ea Knuêč brei thâo:

“Hŏng adŭ hriăm liê êa kâo ƀuh pô mâo klei jhŏng hĭn êjan trŭn kơ êa  leh anăn thâo răng mgang asei pô leh anăn ƀĭng găp hlăm wăl êa”.

Amâo djŏ knŏng ti wăl krah, klei mtô luê êa, gang mkhư̆ klei mngăt êa lŏ dưi pŏk truh ti dŭm alŭ wăl krĭng tlaih kbưi mơ̆ng čar Dak Lak. Ti să Ea Mdroh, hlăm wưng mdei prŏng thŭn anei, Êpul bi hgŭm kyua phung adei khăp hơiêng ngă leh 2 gưl mtô luê êa ti dŭm alŭ ƀuôn. Mai Văn Chuyền, khua kiă kriê êpul hgŭm bruă brei thâo, hŏng hdră ba brŏng hriăm luê êa truh kơ krĭng mnuih ƀuôn sang, hlăm 5 thŭn êgao, êpul hgŭm bi mguôp hŏng bruă sang čư̆ êa alŭ wăl leh anăn êpul bruă êdam êra ƀuôn hgŭm, mbĭt hŏng klei đru mơ̆ng phung mai ai tiê kmah mtô luê êa amâo mâo mă prăk kơ phung hđeh.

“Adŭ hriăm amâo djŏ knŏng iêo jak lu phung hđeh, ƀiădah lŏ mâo wăt klei uêñ mĭn mơ̆ng phung amĭ ama, nao hgŭm hlăm mmông hriăm klei đru dŏng phung mngăt êa. Dŭm klei hriăm anei jing yuôm bhăn leh anăn hmao đru kơ phung amĭ ama leh anăn mnuih ƀuôn sang alŭ wăl. Hmei hmăng hmưi srăng mâo lu klei uêñ mĭn mơ̆ng phung amĭ ama, phung hđeh leh anăn wăt êpul êya kơ boh klei hrăm mbĭt gang mkhư̆ klei mgăt êa”.

Amâo djŏ knŏng mtô klei thâo, dŭm adŭ hriăm anei lŏ jing wăl bi mjuăt klei suaih pral, mâo klei jhŏng, mkŏ phung ƀĭng găp, mđĭ kyar hlăm asei mlei leh anăn đuê̆ kbưi hŏng dŭm kdrăp điện tử hlăm dŭm hruê mdei prŏng. Boh nik, hŏng klei nao jĕ, mă phung hđeh jing mta kñăm, phung nao đru leh kơ mmông hriăm jăk mơak hĭn leh anăn tŭ dưn hĭn Phạm Ngọc Anh, nai mtô bruă anei ti ƀuôn hgŭm Krông Ana, čar Dak Lak brei thâo:

“Hŏng ênuk thŭn anei diñu knŏng čiăng klei hơ̆k mơak diñu srăng mđing hmư̆ pral. Êlâo kơ mmông hriăm, pô mkŏ mjing klei hơ̆k mơal êkâo klơ diñu mphŭn ñu kma, brei bi jĕ giăm leh anăn diñu srăng mđing hĭn klei pô mtô hĭn. Leh kah mbha klei hriăm pô srăng mtô kơ diñu lŏ ksiêm wĭt klei hriăm čiăng thâo diñu dưi hriăm amâodah hơăi leh anăn mkŏ mjing klei hlăp lêñ klă klơ̆ng”.

Hluê si klei tĭng mkă, 5 thŭn êgao, čar Dak Lak čih yap mâo giăm 300 čô hđeh djiê kyua mngăt êa. Knŏng mơ̆ng akŏ thŭn 2025 truh kơ ară anei, alŭ wăl anei mâo giăm 10 klei truh, lu hĭn jing phung hđeh ti krĭng ƀuôn sang. Mơ̆ng dŭm adŭ hriăm hơ̆k mơak truh kơ klei mtô krĭng ƀuôn sang, grăp mta bruă, grăp klei hriăm, grăp čô hđeh dưi mâo klei hriăm srăng đru kơ yan mdei prŏng êđăp ênang, kluôm dhuôm hĭn ti krĭng taih kbưi mơ̆ng čar Dak Lak.