Ti dŭm čŏng čư. Dŭm đang pla bôh kruê̆ dŭng mtah, dŭm gưl angĭn thŭt ktang, brei ƀuh boh mnga thŭn anei lŏ rơ̆ng mâo klei hơĭt. Đăo tĭng ênoh phung tuê wưng hruê 2/9 nao ti Khánh Hoà đĭ lu srăng pŏk klei găl ba čhĭ boh kruĕ dŭng leh anăn lu boh mnga mkăn mơ̆ng krĭng čư̆ čhiăng ti alŭ wăl, mkŏ mjing tur knơ̆ng bi mguôp hlăm wưng kơ anăp. Đoàn Văn Hưởng, Khua êpul hgŭm bruă lŏ hma Khánh Thành (ƀuôn hgŭm Khánh Vĩnh, čar Khánh Hoà) brei thâo:

“Thŭn anei, mơ̆ng akŏ wưng truh kơ ară anei, yan adiê mâo klei găl. Hjan kluôm mơh, kyuanăn bruă kriê dlăng ana pla mjing mâo klei găl. Tết thŭn anei, ară anei dôk hlăm wưng kriê dlăng, ana ăt siam mơh. Knăm mơak hưn mdah boh mnga mơ̆ng ƀĭng ngă lŏ hma, boh nik jing kruĕ dŭng, ăt djŏ hlăm wưng mơh. Mĭn tĭng hruê 2/9, êpul hgŭm bruă ăt mâo djăp mnơ̆ng mkăp brei kơ anôk mnia mblei”.

Kruĕ dŭng Khánh Vĩnh amâo djŏ knŏng ba čhĭ ti sang mnia phŭn ƀiădah mâo dŭm knơ̆ng bruă yua mkra mjing êa drao klĭt kruê̆, kruê̆ dŭng bi êăt. Dŭm knơ̆ng bruă bi klă, anei jing klei găl čiăng ƀrư̆ ƀrư̆ ba mta boh kroh anei jing mnơ̆ng dhơ̆ng OCOP phŭn mơ̆ng krĭng čư̆ čhiăng.

Nguyễn Thị Ngân, khua knơ̆ng bruă mnia mblei boh kroh leh anăn boh mnga Ngân Nguyễn brei thâo: “Êjai dŭm mnơ̆ng dhơ̆ng djăp hnơ̆ng čuăn OCOP, jing nao hŏng êlan doh, dŭm knơ̆ng bruă leh anăn anôk mnia mblei mphŭn tui duah dŭm anôk bruă msĕ hŏng hmei. Diñu duah dŭm mnơ̆ng dhơ̆ng mâo phŭn agha, mnơ̆ng dhơ̆ng doh leh anăn mâo boh tŭ yuôm čiăng dưi bi mguôp sui. Sitôhmô dŭm mnơ̆ng mkra mjing mơ̆ng boh kruê̆ dŭng msĕ si êa drao mnâo klĭt kruê̆, kruê̆ dŭng bi êăt, amâodah yua riă chè dôk dưi uêñ mĭn”.

Hlăm wưng čar Khánh Hoà pŏk mlar wăl đĭ kyar leh bi mŭt hŏng čar Ninh Thuận, dŭm mnơ̆ng phŭn krĭng čư̆ čhiăng mâo thiăm klei găl mkŏ hŏng anôk mnia mblei, boh nik hŏng dŭm hdră prŏng, knăm mơak, bruă hiu čhưn ênguê. Lu phung tuê hriê ti dhŭng kwar Krah uêñ mĭn kơ dŭm mta boh kroh, dlăng anăn jing sa kdrêč ksiêm kơ dhar kreh alŭ wăl. Nao prĭn Đặng Qúy Nhân, adŭ bruă kiă kriê krĭng ƀuôn sang gưl dlông, Phŭn bruă lŏ hma leh anăn wăl hdĭp mda lač:

“Dŭm alŭ wăl čiăng bi lar klei găl kơ dŭm mnơ̆ng dhơ̆ng phŭn pô. Čiăng mđĭ kyar hơĭt kjăp srăng mâo dŭm hdră êlan mkŏ mjing krĭng pla mjing hơĭt kjăp, thâo klă phŭn agha leh anăn mâo ktrâo anôk. Êjai anăn, dŭm knơ̆ng bruă leh anăn êpul hgŭm bruă srăng čŏng mkŏ mjing mnơ̆ng dhơ̆ng mâo knhuah sui, mđĭ ênoh leh anăn mđĭ hnư hrui wĭt kơ ƀĭng ngă lŏ hma. Bruă bi mguôp dŭm mnơ̆ng dhơ̆ng OCOP čiăng brei kơ phung tuê truh ti alŭ wăl čiăng dưi bi myuôm”.

Hlăm wưng êgao, kyua mâo hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă – krĭng čư̆ čhiăng, čar Khánh Hoà đru leh kơ đa đa êpul hgŭm bruă duh bi liê sang mkra mjing, sang bi êăt, mtô bi klă mrô krĭng pla mjing, ƀrư̆ ƀrư̆ bi kluôm hdră mkra mjing. Đa đa klei bi hmô lông ba phung tuê nao dlăng ti đang pla mjing leh anăn blei tinăn dưi ba wĭt boh tŭ dưn jăk. Nguyễn Ngọc Sơn, k’iăng khua knơ̆ng bruă djuê ana leh anăn klei đăo čar Khánh Hoà brei thâo:

“Ară anei, ti krĭng čư̆ čhiăng čar Khánh Hoà, mnuih ƀuôn sang kčưm mlih mơ̆ng gru hmô mkra mjing đưm jing dưn yua klei kreh knhâo – mrâo mrang čiăng mđĭ hnơ̆ng ana pla mjing, mnơ̆ng rông. Ƀiădah, drei srăng gĭr mkŏ mjing klei bi hrăm, mtô kơ mnuih ƀuôn sang thâo klă si ngă čô̆ kơ bruă, čô̆ kơ klei mnia mblei, mbruă. Êjai thâo klă dŭm klei anăn diñu srăng mâo klei mĭn leh anăn mđĭ kyar dŭm klei bi hmô.”

Sơnăn, tơdah dưi mlih ƀrư̆ ƀrư̆ mơ̆ng klei mĭn mkra mjing hliê điêt jing mnơ̆ng dhơ̆ng nao mbĭt hŏng anôk mnia mblei, boh mnga OCOP krĭng čư̆ čiăng Khánh Hoà dưi jing boh kdrŭt đĭ kyar hơĭt kjăp hlăm wưng pŏk mlar wăl đĭ kyar leh anăn krŭ wĭt bruă hiu čhưn ênguê ară anei./.