Sa hlăm dŭm bruă êdah êdi mơ̆ng bruă “Phung mda asei mđrăm mbĭt bi rŭ mdơ̆ng krĭng ƀuôn sang mrâo” mơ̆ng hlăk ai Gia Lai hluê ngă thŭn 2023 anăn jing bruă mkra êlan hlăk ai “Mngač – Doh – siam – mtah” ti ƀuôn Thơh Ga B, să Čư̆ Don, kdriêk Čư̆ Pưh.  Bruă anei mâo boh taih 1 km mâo mkŏ mkra 20 boh ăngpul pui bi êran hŏng pi yang hrue, lehanăn pla truh 200 phŭn kyâo hŏng ênoh êbeh 60 êklăk prăk. Êlan hlăk ai anei “Mngač – Doh – siam – mtah” leh mâo yua hlŏng bi mlih mtam klei jing hlăm ƀuôn sang, mâo klei êđăp ênang hĭn, êđăp ênang mơh hlăm klei đĭ êdeh êdâo ti ƀuôn Thơh Ga B. Lê Quốc Việt – Khua bruă êdam êra să Čư̆ Don, kdriêk Čư̆ Pưh brei thâo: “Sa ai hŏng bruă mkŏ mkra krĭng ƀuôn sang mrâo ti ƀuôn Thơh Ga B, bruă êdam êra să mtrŭt leh phung hlăk ai nao pla kyâo mtah ktuê dua nah êlan, lehanăn mkra mnư̆ hŏng rơ̆k mtah siam. Mtrŭt phung ƀuôn sang kih waih bi mdoh nanao êlan klông, boh nik hlăm grăp boh sang mdê mdê. Hlăm wưng tinăp êpul bruă êdam êra să lŏ dơ̆ng mâo dŭm klei ƀuăn rơ̆ng răng kriê bi mdoh nanao êlan klông siam, doh, mtah”.

Thŭn 2023, hŏng akŏ “Thŭn bi mlih mrô mơ̆ng dŭm bruă êdam êra” jih jang bruă êdam êra nah gŭ hlăm čar Gialai mâo leh klei hâo hưn, đru mnuih ƀuôn sang nao hlăm klei bi mlih mrô ngă dŭm bruă msĕ si: Mkŏ mjing lehanăn hưn mdah mrô knăl kơ klei rŭ mjing bruă knuă, ngă bruă hŏng mrô sơăi, mâo wăt bruă dlăng hră hŏng kdrăp mrô, lehanăn klei tui duah bruă knuă, klei mă bruă mâo hdră mkŏ mjing hŏng elektronik sơăi, mâo alŭ wăl čhĭ mnia ba yua kdrăp mrô tla prăk amâo tla prăk ti anăp ôh... Ară anei, kluôm čar mâo leh 1.233 êpul bi mlih mrô hlăm yang ƀuôn, mâo phung knuă druh knơ̆ng dôk ngă bruă. Klei bi mlih mrô hlăm dŭm êpul bruă êdam êra, mâo đru mguôp leh klă jih jang hdră ngă tui si hdră mtrŭn mrô 924 mơ̆ng khua knŭk kna kơ klei “Bi mklă hdră bi mlih mrô hlăm bruă mkŏ mkra krĭng ƀuôn sang mrâo, anăp truh kơ krĭng ƀuôn sang mrâo thâo mĭn wưng thŭn 2021 – 2025”. Nguyễn Hoài Phương – Khua bruă êdam êra kdriêk brei thâo:Čiăng ngă jăk jih jang bruă thŭn 2023, bruă mlih mrô ăt ba wĭt lu klei jăk găl kơ mnuih ƀuôn sang hlăm kluôm kdriêk. Lu phung êdah êra, hđeh êlăk nao čuă hlăm dŭm anôk ngă bruă kñăm čiăng tui duah hŏng klei thâo săng hĭn, lehanăn păk kjăp jih jang klei jing ti anăn, lehanăn mơ̆ng anăn mâo klei bi sa ai mơ̆ng mnuih ƀuôn sang, mbĭt hŏng dŭm êpul bruă êdam êra mđrăm mbĭt bi mă bruă hlăm kdriêk”.

Klei jih jang bi mđrăm mbĭt mkŏ mkra krĭng ƀuôn sang mrâo, hlăm thŭn 2023, Êpul êdam êra bruă hlăk ai Gia Lai mâo ngă leh 3 mta bruă êdam êra ti gưl čar, 74 mta bruă ti gưl kdriêk, 615 mta bruă ti gưl nah gŭ 653 bruă êdam êra bi “Rŭ mjing anôk mngač siam  doh mtah, lehanăn êđăp ênang, bi rŭ mjing mrâo lehanăn lŏ mkra wĭt truh  17 kdrêč êlan hlăm ƀuôn, pla mrâo êbeh 996 êbâo phŭn kyâo mtah... Đỗ Đức Thanh – k’iăng khua bruă êdam êra čar Gia Lai lač, klei bi sa ai mơ̆ng phung mda asei Gia Lai mâo đru mguôp leh hŏng dŭm alŭ wăl mkŏ mkra krĭng ƀuôn sang mrâo mnâo leh lu boh tŭ dưn jăk. “Wưng thŭn 2021 – 2025 hmei lŏ dơ̆ng ngă bruă bi mlih mrô, lehanăn dŭm bruă mđĭ kyar mrâo hlăm bruă mkŏ mkra krĭng ƀuôn sang mrâo. Mbĭt hŏng anăn, klei mđrăm mbĭt hŏng dŭm gưl dhar bruă êpul êya, bruă êdam êra jing pô yuôm bhăn. Êngao kơ klei hluê ngă dŭm hdră êlan mơ̆ng bruă êdam êra gưl dlông, hmei lŏ rŭ mjing ƀuôn sang pô bi năng hdĭp. Anăp truh mkŏ mjing 3 klei bi hmô năng hdĭp ti 2024 hmei rŭ mdơ̆ng ti să An Trung, kdriêk Kông Chro. Tui si klei gĭt gai mơ̆ng dŭm gưl bruă Đảng, lŏ dơ̆ng đru kơ dŭm alŭ wăl tiŏ nao mnuih ngă bruă ti dŭm alŭ wăl pral truh kơ anôk kčah mkŏ mkra krĭng ƀuôn sang mrâo”./.