Dŭm hruê nei, ti êlan dơ̆ng ti knông lăn hlăm să Quảng Trực, čar Lâm Đồng ƀlêč ƀlir hla čhiăm gru hrah mtŭ kñĭ ti krah čư̆ dliê leh anăn đang kphê, makka, tiu. Truh kơ mlam, pui mngač ti lu bĭt êlan. Anăn jing hdră bruă “Kuč mngač êlan knông lăn” mơ̆ng êpul bruă êdam êra să Quảng Trực. Ayŏng Y Nhật Minh, k’iăng khua dhar bruă mặt trận, khua bruă êdam êra să brei thâo, să mdưm leh êbeh 5km êlan klei pui kuč mngač, đru răng mgang klei êđăp ênang, čiăng kơ ƀuôn sang êđăp ênang. Ƀri wưng mơak yan mnga – mơak Đảng, phung mda asei să knông lăn Quảng Trực nao hgŭm gak răng knông lăn mbĭt hŏng lĭng kahan knông lăn leh anăn mkŏ mjing dŭm hdră bruă dhar kreh, kdŏ mmuñ, tông čing – kdŏ čhuang, mkŏ mjing ai êwa hơ̆k mơak.

“Nao mbĭt hŏng bruă klam răng mgang knông lăn, êpul bruă êdam êra să Quảng Trực lŏ ba dhar kreh knhuah gru hlăm klei bi kƀĭn êpul. Dŭm mmông bi kƀĭn nao mbĭt hŏng čing čhar, klei mmuñ ênhiang mnuih Mnông đru leh kơ ênoh phung êdam êra nao bi kƀĭn đĭ mơ̆ng hlăm brô 60% jing 85%. Thŭn kơ anăp, Êpul srăng lŏ pŏk mlar gru hmô kuč mngač êlan knông lăn, mkŏ mjing êpul êdam êra gak răng, hâo hưn ciăng kơ grăp čô đoàn viên mâo bruă mă klă klơ̆ng, bi mguôp hĭn hŏng ƀuôn sang pô.”

Yan mnga truh ti să Thuận An, čar Lâm Đồng, anôk mâo hdră bruă dhar kreh, klei kdŏ mmuñ êdam êra dưi rơ̆ng kjăp. Ayŏng Y-Arôn – k’iăng khua bruă êdam êra să brei thâo, mơ̆ng thŭn 2022 truh kơ ară anei, ayŏng mkŏ mjing êbeh 20 mmông bi kƀĭn, mtô klei mmuñ ênhiang mnuih Mnông, iêo jak dŭm êtuh gưl čô êdam êra, phung hđeh nao hgŭm. Lu phung mda asei mơ̆ng ka thâo mmuñ ară anei dưi mmuñ bi kmlah, rang mdah hlăm dŭm knăm mơak ƀuôn sang. Thŭn 2025 mrâo êgao, ayŏng Y-Arôn dưi nao hgŭm hlăm êpul bi ala êdam êra Việt Nam hŏng “Hdră bruă hrah – ksiêm duah, hluê hriăm mơ̆ng êdam êra” ti China. Ayŏng yăl dliê:

“Gưl nao hriăm brei kơ pô thâo lu hĭn, boh nik jing ƀuh bruă klam mơ̆ng êdam êra Mnông hlăm ênuk mrâo. Dưi bi tuôm hŏng lu mnuih, hriăm lu mta mrâo mơ̆ng phung găp hlăm leh anăn êngao lăn čar. Thŭn kơ anăp, pô srăng lŏ mkŏ mjing dŭm êpul hgŭm bruă mmuñ ênhiang êdam êra, mbĭt anăn mdar clip, ba klei mmuñ ênhiang mnuih Mnông hlăm internet yang ƀuôn čiăng kơ lu mnuih thâo hĭn, čiăng kơ phung mda asei ktưn hưn leh anăn amâo mâo wơr phŭn agha pô.”

Mbĭt hŏng dŭm mta bruă dhar kreh, lu phung êdam êra Mnông ti Lâm Đồng jhŏng čô̆ kơ bruă mơ̆ng knhuah gru djuê ana. Ti ƀuôn Bu Dak, să Thuận An, H’Her, mniê êra Mnông, mđĭ kyar leh gru hmô pơ̆k mñam, mkŏ mjing bruă mă kơ êbeh 10 čô amai adei, hŏng hnư hrui wĭt kah knar 5 êklăk prăk grăp mlan. Thâo kơ klei ba yua ênuk mrâo mrang, amai ba mnơ̆ng dhơ̆ng hlăm Facebook, Zalo, TikTok, kreh livestream hưn mdah mnơ̆ng dhơ̆ng. Amai H’Her brei thâo, gru hmô anei dưi mâo mă klei pah mni mrô 3 hlăm klei bi lông phung mniê čô̆ kơ bruă čar Dak Nông (hđăp).

“Kâo čiăng phung amai adei thâo pơ̆k mñam mâo hnư hrui wĭt hơĭt, mnuih ƀuôn sang srăng čŏng djă pioh bruă mă. Kâo hmăng hmưi mnơ̆ng pơ̆k mñam Mnông amâo djŏ knŏng ba čhĭ hlăm lăn čar ƀiădah lŏ mâo hlăm dŭm anôk čhĭ mnia online tar rŏng lăn, čiăng kơ lu mnuih thâo săng leh anăn khăp hĭn kơ dhar kreh djuê ana pô.”

Hlăm klei kdŏ mmuñ, pô mmuñ Điểu Náp Bunong – ară anei dôk mă bruă dhar kreh čar Dak La, ruah leh kơ pô klei kdŏ mmuñ čiăng ngă kdrông mkŏ ba dhar kreh mnuih Mnông truh jĕ hĭn hŏng mnuih ƀuôn sang. Hlăm dŭm klei rang mdah, ñu čŏng ba yua ênhiang mmuñ Mnông, bi mguôp hŏng klei mmuñ mrâo leh anăn kdrăp pĕ tông Lăn Dap Kngư, mkŏ miing klei mdê hĭn, bŏ hŏng ai lar bra. Điểu Náp Bunong bi êdah klei hơ̆k mơak, mrâo anei êpul pĕ tông Nap Bunong Band mơ̆ng ñu mao mă klei pah mni A knhuah mmuñ mrâo mrang leh anăn klei mmuñ ênang hlăm klei rang mdah dŭm êpul pĕ tông čar Dak Lak pŏk mlar thŭn 2025. Mbah Youtube “Điểu Náp Bunong Official”  hŏng lu klei rang mdah kdŏ mmuñ, hlăm anăn bi êdah knhuah phŭn mơ̆ng dhar kreh mnuih Mnông iêo jak klei uêñ mĭn mơ̆ng phung mda asei.

“Grăp klei bi lông pô nao hgŭm čiăng hmăng đru kơ phung mda asei thâo săng dhar kreh mnuih Mnông amâo djŏ knŏng jing klei đưm, ƀiădah dôk hdĭp wăt ară anei. Thŭn kơ anăp, kâo hmăng hmưi mâo lu bruă bi êdah klei hdĭp mrâo mrang mơ̆ng mnuih ƀuôn sang čiăng kơ dhar kreh lŏ dơ̆ng dưi lŏ čuê.”

Mơ̆ng hdră bruă “Kuič mngač êlan knông lăn” truh kơ čô̆ kơ bruă mơ̆ng bruă pơ̆ mñam, klei kdŏ mmuñ mâo ai êwa čư̆ čhiăng, dŭm bruă ngă hơĭt kjăp mơ̆ng phung mda asei mnuih Mnông dôk đru bi mlih ƀuôn sang, čiăng kơ knhuah gru nao mbĭt hŏng klei mlih mrâo. Mŭt hlăm yan mnga Bính Ngọ 2026, phung mda asei mnuih Mnông lŏ dơ̆ng bi lar klei hmăng hmưi duh myơr, hrăm mbĭt mkŏ mjing ƀuôn sang êđăp ênang, jiă kma dhar kreh, rông ba klei đăo knang kơ êdei anăp mngač siam hơĭt kjăp mơ̆ng Lăn Dap Kngư.