Jing leh klei mưng, grăp aguah, amai Kơ Să K’Hà (djuê ana K’Ho) ti alŭ 4,să Đam Rông 4, čar Lâm Đồng kgŭ ưm snăk čiăng čiêm hluăt mrai. Dŭm êi hla hluăt mta mdah mrâo pĕ mơ̆ng hruê êlâo čiăng kriê dlăng gưl hluăt dôk ƀơ̆ng. Amai K’Hà brei thâo, êlâo dih, gŏ sang ñu lu jing pla kphê leh anăn dŭm mta djam tam, ƀiădah prăk hrui wĭt amâo hơĭt. Hlue ngă hdră êlan bi mlih ana pla mjing mơ̆ng alŭ wăl, hŏng klei hâo hưn mtô mblang, mtrŭt mjhar mơ̆ng knuă druh Êpul hgŭm phung mniê, thŭn 2022 gŏ sang ñu jhŏng bi mlih sa kdrêč ênhă lăn kphê jing pla ana rông hluăt, rông hluăt mrai.

“Kâo lač hŏng ung jing ung mô̆ pla ana rông hluăt êlâo, leh anăn hgŭm hlăm adŭ mtô bi hriăm rông hluăt mrai čiăng mâo klei thâo rông hluăt tơdah hluăt mâo hĕ klei ruă snăn thâo kral leh anăn msir mgaih. Leh mâo leh đang hluăt, ung mô̆ kâo răng knŏng dưm dua gram mkrah mjeh hluăt. Leh gưl lông ngă anăn, ung mô̆ kâo rông leh anăn mâo 20 kg hruh hluăt, mơ̆ng anăn ung mô̆ kâo ƀrư̆ mkra mđĭ prăk hrui wĭt leh anăn mâo thiăm bruă rông hluăt mă mrai”.

Rông hluăt ba prăk hrui wĭt lu ƀiădah klei amâo myun ăt prŏng mơh kyua hluăt ênưih djŏ hŏng wăl hdĭp mda. Hluăt srăng mâo klei ruă leh anăn djiê lu, hmăi amâo jăk mơ̆ng yan adiê, klei ruă mnơ̆ng ƀơ̆ng ngă kyua hnơ̆ng êa drao krih kơ ana pla mjing, leh anăn klei amâo myun kơ hnơ̆ng jăk mjeh. Hŏng gŏ sang amai Kơ Să K’Hà ăt msĕ snăn mơh; hlăk jih pă gưl rông amâo tŭ jing, hluăt djiê lu, tuh hwiê hĕ. Mâo mmông ñu čiăng lui.

 Ƀiădah hŏng klei gĭr hlue ngă hdră êlan bi mlih ana pla mjing, gŏ sang amai

Kơ Să K’Hà lŏ dơ̆ng bi liê mđĭ kyar bruă rông hluăt mrai. Gưl mâo hrui mă 7 êklăk prăk, mâo gưl hrui mă êbeh 10 êklăk prăk. Thŭn 2025, prăh hrui wĭt mơ̆ng rông hluăt mrao gŏ sang ñu mâo êbeh 50 êklăk prăk leh yap prăk bi liê.

Gru hmô amai Kơ Să K’Hà  Amâo djŏ knŏng ba klei tŭ dưn bruă duh mkra kơ gŏ sang ôh, ƀiădah lŏ lar bra hlăm êpul êya, đru mkra mđĭ klei đăo knang mơ̆ng êpul hgŭm phung mniê hlăm hdră êlan mlih mrâo mkra mjing mơ̆ng alŭ wăl. Amai Kơ Să K’Bích –  Khua Êpul hgŭm phung mniê alŭ 4 – ară anei jing Khua Êpul bi hgŭm pla ana rông hluăt mrai să Dam Rông 4 brei thâo, ară anei mâo giăm 30 čô, hlăm anăn 20 čô mđĭ lar mkra mjing nanao. Mơ̆ng anăn, phung hlăm êpul amâo djŏ knŏng kah mbha klei thâo pla ana rông hluăt ôh, ƀiădah lŏ mđĭ klei bi hgŭm, bi đru hlăm klei hdĭp.

          “Gru hmô anei dưi mkŏ mjing hŏng klei kñăm bi hgŭm, bi kah mbha klei thâo rông hluăt mrai leh anăn bi đru hdơ̆ng pô. Sitôhmô tơdah kƀah hla rông hluăt amâodah êi, snăn phung amai adei brei bi mañ.  Bruă blei mjeh hluăt kyua grăp gŏ êsei bi blei, msĕ si blei mơ̆ng Knơ̆ng bruă Duy Phương amâodah dŭm anôk bruă mkăn, Êpul hgŭm amâo čhŭ luă ôh.”

 Hlăm hdră ngă bruă, čiăng mđĭ ktang klei bi mkŏ plah wah phung hlăm êpul, Êpul bi hgŭm pla ana rông hluăt să Dam Rông 4 mkŏ mjing êpul Zalo, Facebook kñăm kah mbha klei hâo hưn, bi trông leh anăn klei thâo mkra mjing, ba čhĭ mnơ̆ng dhơ̆ng.  Mơ̆ng gru hmô anei, amai adei amâo djŏ mâo thiăm prăk hrui wĭt ôh ƀiădah lŏ mđĭ klei thâo săng kơ mlih mrô ana pla mjing, mnơ̆ng rông, grăp knhuang pŏk mlar klei thâo leh anăn bi mih klei mĭn hlăm bruă mkra mjing. Amai Kơ Să K’Bích lŏ brei thâo:

“Hlăm hdră hâo hưn mtô mblang bi mlih ana pla mjing, Êpul hgŭm phung mniê ăt bi mguôp hâo hưn lăm lui klei kthŭl mluk. Khădah snăn, klei anei brei mâo mmông. Čang hmăng hlăm wưng kơ anăp, klei thâo săng amai adei dưi mđĭ, klei kthŭl mluk hlăm bruă pla mjing leh anăn knuih hdĭp ngă gun kpăk kơ klei đĭ kyar srăng dưi lăm lui. Tơdah klei mĭn bi mlih snăn klei hdĭp srăng jăk hĭn, dưi ƀiă klei suăi êmăn.”

“ Bi ala mơ̆ng Êpul bi hgŭm, kâo gĭr nanao bi hmô hlăm bruă pla ana rông hluăt, čiăng atăt phung amai adei bi hgŭm, pŏk mlar leh anăn mđĭ kyar gru hmô. Kâo čang hmăng ƀrư̆ hruê mâo lu hĭn amai adei hgŭm čiăng mâo prăk hrui wĭt, mđĭ klei hdĭp mda gŏ sang”.