Ti Anôk bruă êpul hgŭm kphê Lam Anh alŭ Tuơh Ktu, să Glar, kdriêk Đăk Đoa, čar Gia Lai, tur sang tiap ƀrĭk hrah siam ƀlĭp, lehanăn êđăp. Anei jing anôk phŭn kơ “Phung ngă lŏ hma mâo klei jăk jĭn ti lăn Glar”. Digơ̆ tlaih leh mơ̆ng klei dôk đuôm nư klei amâo thâo lŏ ruĕ, mâo hdĭp hlăm anôk êwa êđăp doh, lehanăn čŏng mkra mjing dŭm mta mnơ̆ng mâo klei tŭ dưn hŏng mnuih yua.

Dôk mnăm kphê djăp ênoh čuăn 3 mtŭ grăp să mâo sa mta mnơ̆ng djăp ênoh čuăn OCOP ba hriê anăn knăl mơ̆ng Êpul hgŭm bruă, Suân, mnuih djuê ana Bahnar, lŏ bi hdơr kơ bruă leh êgao:

“Dôk nanao hlăm klei đuôm nư yơh. Grăp thŭn mơ̆ng êđai ana lŏ mâo êđai mrâo, knư̆ hrue knư̆ nư klei đĭ hĭn êjai. Lu mnuih bi čhĭ sang čhĭ lăn leh čiăng tla nư klei. Ayŏng adei hlăm ƀuôn jih jang bi ê’am sơăi. Mphŭn dô dih djăp mta bruă ngă hŏng hbâo ăngre, êa drao hluăt jhat sơăi mơ̆ng anăn grăp čô mnuih djŏ kma mta êa drao jhat anăn mâo klei ruă amâo mâo jăk, lehanăn ba hriê klei čhŏ djhan kơ wăl hdĭp mda mơh. Kyua anăn bi mlih hĕ jih hdră êlan mă bruă dơ̆ng mơ̆ng grăp gŏ sang, ngă knŏng ya mta bruă jing doh hŏng wăl hdĭp mda, snăn hmei mbĭt hŏng êpul hgŭm bruă anei duh mkra pla mjing kphê doh”.

Pla mjing hlue ênoh čuăn doh mơ̆ng tar rŏng lăn, rơ̆ng čiăng dưi mâo mta kphê doh, ba klei suaih pral kơ jih jang mnuih, lehanăn răng mgang wăl hdĭp mda pia klah čŭn jing UTZ, dơ̆ng mơ̆ng thŭn tal êlâo mtam, ênoh bi liê kơ bruă knuă hrŏ mơh êbeh kơ mkrah mkă hŏng êlâo, hdră pla mjing doh mâo bi lar leh hlăm mnuih djuê ana Bahnar ti kdriêk Đăk Đoa ƀuh leh ti ală mta, mâo pĕ dŭm kmrŭ boh ksă hrah huič tui si Êpul hgŭm bruă Lam Anh hrui blei hŏng ênoh yuôm mơh êbeh kơ 3 blư̆ mkă hŏng ênoh čhĭ kơ êngao. Knŏng êdei kơ dua thŭn, krĭng pla kphê doh mâo mđĭ bi lar truh giăm 100 blư̆. Uê, sa čô mnuih dôk hlăm êpul hgŭm bruă Lam Anh mprăp nanao ai tiê pô truh hŏng war kphê kăp đru kčĕ kơ ƀĭng pla mjing, kñăm čiăng kơ jih jang mnuih mâo hdĭp suaih pral, hdĭp mơak:

“Mơ̆ng thŭn 2020, 100 gŏ êsei nao hgŭm hlăm bruă anei. 100 gŏ êsei nao čuă đang war, mâo klei mtă mtăn amâo lŏ ba yua ôh êa drao krih rơ̆k, jing mta êa drao kăm ba yua leh, jing knŏng ba yua dŭm mta chế phẩm sinh học. Kâo nao ktrâo atăt digơ̆ mă bruă, snăn jih jang mnuih khăp bi tui hlue”.

Čiăng kơ hơĭt anôk čhĭ mnia, lehanăn mâo čhĭ hŏng ênoh yuôm mơh, snăn bi yap mbĭt hŏng klei thâo mkă tĭng kơ hdră êlan mă bruă kjăp nanao tui si khua kiă kriê Êpul hgŭm jing Lê Hữu Anh tă leh. Lê Hữu Anh kkiêng thŭn 1986 jing sa čô mnuih mâo nanao klei mĭn bi mlih jăk snăk, kyuadah êlâo dih sang ñu jing anôk čhĭ hbâo pruê, êa drao hluăt prŏng ti lăn Glar. Ƀuh êdi klei mnuih ƀuôn sang nao blei lu mta êa drao amâo mâo jăk ôh pioh ba krih kphê, ñu mta kơ mnuih ƀuôn sang đăm lŏ ngă msĕ snăn ôh, bi dlăng kriê kphê hŏng hdră êlan doh, lehanăn dưi răng mgang klei suaih pral pô lehanăn wăl hdĭp mda mơh. Tui si Lê Hữu Anh, anăn yơh jing êlan đuĕ mơ̆ng klei dleh dlan, duah klei đĭ kyar lehanăn pŏk êlan duh mkra pla mjing jăk kơ mnuih ƀuôn sang mâo čhĭ kphê hơĭt lehanăn dưi čhĭ truh hơĭt kơ ala tač êngao:

“Tơdah ka mâo ôh Êpul hgŭm bruă, ka mâo ôh klei mĭn mrâo, ka mâo ôh klei bi mlih msĕ si ară anei, snăn phung ƀuôn sang knŏng duah ƀơ̆ng mă tui si jing, msĕ si klei duah ƀơ̆ng hđăp. Leh pô nao bi mguôp ară anei ƀuh mâo klei bi mlih êdi, snăn sĭt nik srăng tui tiŏ hdră êlan anei yơh, mjing hdră mă bruă kơ êdei anăp, jing sa klei găl guôp mơh”.

Mơ̆ng leh phung pla mjing thâo bĭt êlan duh mkra pla mjing kjăp, srăng mkŏ mjing sa wăl anôk pla mjing doh, djŏ guôp hŏng wăl hdĭp mda, anăp mâo sa yang ƀuôn êđăp ênang suaih pral. Jing mơak tơdah ƀuh klei mă bruă mâo klei đua klam, thâo uêñ mĭn, mđĭ kyar bruă lŏ hma hŏng klei kjăp bi lar bruă anei hŏng jih ai tiê kñăm kơ “Kơ phung ngă lŏ hma mâo klei jăk jĭn” Glar, ba kơ drei sa klei čang hmăng kơ dŭm krĭng ƀuôn sang mrâo đĭ kyar hŏng klei kjăp./.