Ti Sang hră knŭk kna rông ba mlir gưl sa - gưl dua Dục Nông, hdră bruă dôk bi leh dŭm kdrêč bruă knhal tuč. Mbĭt hŏng bruă rŭ mdơ̆ng, sang hră ătt mjêč hrŏng ruah hđeh čiăng rơ̆ng djăp klei găl ba sang hră ngă bruă mtam hlăm  thŭn hriăm mrâo 2026-2027. Hlue si hdră kčah, Sang hră knŭk kna rông ba mlir gưl sa - gưl dua Dục Nông mâo hnơ̆ng hlăm brô 1.680 hđeh sang hră. Hlăm anăn, êbeh 1.140 čô hđeh dưi ƀa mơ̆ng Sang hră knŭk kna rông ba mlir gưl sa - gưl dua Dak Dục; hlăm brô 550 ccô hđeh sang hră ruah mrâo ti alŭ wăl hlue si klei knŭk kna rông ba.

 Leh mâo jao hnơ̆ng kčah, sang hră mkŏ mjing leh Anôk bruă gĭt gai, Êpul hgŭm hrŏng ruah; bi hgŭm hŏng knŭk kna, dŭm êpul leh anăn Anôk bruă mặt trận ti grăp alŭ, ƀuôn grăp gŏ êsei mnuih ƀuôn sang hâo hưn djăp ênŭm kơ klei dưi dưn, hdră êlan kơ hđeh sang hră knŭk kna rông ba. Trần Đức Thư, Khua Sang hră knŭk kna rông ba mlir gưl sa - gưl dua Dục Nông  brei thâo, truh ară anei, sang hră ruah leh êbeh 360 čô hđeh sang hră mrâo, mâo êbeh 65% hnơ̆ng kčah. Khădah snăn, kyua anei jing gru hmô gưl tal êlâo pŏk ngă ti alŭ wăl kyua anăn bruă hrŏng ruah ăt tuôm hŏng klei dleh dlan kyua lu mnuih rŭng răng kơ bruă kriê dlăng anak čô pô:

"Êlâo dih ka mâo sang hră knŭk kna rông ba lu amĭ ama hđeh sang hră adôk rŭng răng. Sang hră dôk bi hgŭm hŏng gưl bruă Đảng, knŭk kna alŭ wăl lŏ dơ̆ng hâo hưn, mtô mblang, mtrŭt mjhar čiăng kơ phung amĭ ama thâo săng , đăo knang leh anăn hơĭt ai tiê ba anak čô nao sang hră”.

Mbĭt hŏng hrŏng ruah, alŭ wăl ăt mkŏ mjing hdră dăp êpul knuă druh nai mtô čiăng rơ̆ng bruă mtô bi hriăm mơ̆ng thŭn  hriăm tal êlâo. Êlâo hĭn, sang hră yua phung nai mơ̆ng sang hră gưl dua – gưl dua Dak Dục; mbĭt anăn lŏ dơ̆ng ksiêm dlăng, bi kna leh anăn ngă hră kuôl kă hŏng phung nai mtô hlue si klei čiăng boh sĭt.

Hlue si Trần Cao Bảo Việt,  Khua Knơ̆ng bruă sang čư̆ êa să Dục Nông, bruă bi liê mdơ̆ng sang hră mlir gưl dưi mâo klei tŭ ư mơ̆ng mnuih ƀuôn sang. Ênoh sang hră čih anăn hriăm hlăm sang hră knŭk kna rông ba êbeh hnơ̆ng mkra mjing tal êlâo, bi êdah klei čang hmăng phung amĭ ama hŏng sa sang hră mrâo. Alŭ wăl mtă leh kơ dŭm anôk bruă djŏ tuôm mbŏ hnơ̆ng kčah nai mtô hlăm thŭn 2026 kñăm ngă djŏ klei čiăng mtô tơdah sang hră klă sĭt ngă bruă. Hŏng dŭm wăl anôk dôk, adŭ dưi mkra mjing prŏng, djăp ênŭm klei găl hdĭp mda. Mơ̆ng tur knơ̆ng ênoh hđeh sang hră čih anăn boh sĭt, alŭ wăl srăng hưn mdah hŏng gưl mâo klei dưi ksiêm dlăng hdră dăp thiăm hđeh sang hră dôk jưh tơdah ngă djŏ klei găl hlue si hdră kčah. Trần Cao Bảo Việt, Khua Knơ̆ng bruă sang čư̆ êa să Dục Nông brei thâo:

“Leh hrŏng ruah srăng dlăng hlăm hnơ̆ng hđeh sang hră klă klơ̆ng hlăm grăp boh adŭ snăn srăng hưn akâo hŏng Knơ̆ng bruă sang čư̆ êa čar Quảng Ngãi leh anăn akâo ktrâo lač mơ̆ng Knơ̆ng bruă kriê dlăng bruă knuă čar Quảng Ngãi čiăng ba đa đa nai mtô djŏ guôp hlăm klei hriăm. Mbĭt anăn hmei ăt akâo klei blŭ mơ̆ng Knơ̆ng bruă kriê dlăng bruă knuă leh anăn Knơ̆ng bruă sang hră mtô bi hriăm čar Quảng Ngãi kơ klei ruah thiăm nai mtô hlăm thŭn 2026 mbŏ hnơ̆ng kčah kơ alŭ wăl să Dục Nông”.

Ti să Sa Loong, bruă mprăp kơ sang hră knŭk kna rông ba mlir gưl dôk dưi pŏk ngă hrăm mbĭt. Hdră mâo ênoh bi liê giăm 209 êklai prăk, mĭn tĭng bi leh hlăm knhal jih mlan 7 thŭn anei čiăng duh kơ thŭn hriăm mrâo.

 Să Sa Loong iêô mkrum leh dŭm êpul bi hgŭm hŏng sang hră nao ti grăp alŭ hâo hưn mttô mblang, kčĕ kơ phung amĭ ama kơ klei găl hriăm hră, dôk hdĭp mda hlăm sang hră ăt msĕ mơh hdră êlan đru kơ hđeh sang hră. Xiêng Thanh Phú, Khua Knơ̆ng bruă sang čư̆ êa să Sa Loong, čar Quảng Ngãi bi mklă, truh ară anei, bruă hrŏng ruah hđeh klă klơ̆ng bi leh hlue si hdră kčah.

"Mơ̆ng ai tiê Hdră mtrŭn mrô 71 mơ̆ng Phŭn bruă kđi čar, bruă Đảng leh anăn Knơ̆ng bruă sang čư̆ êa să Sa Loong bi mklă mđĭ hnơ̆ng  jăk mtô bi hriăm, boh nik hnơ̆ng jăk êpul nai mtô, jing sa hlăm dŭm bruă klam êdah kdlưn mơ̆ng wưng 2025 - 2030. Alŭ wăl srăng lŏ dơ̆ng mđĭ bruă mtô bi hriăm kơ phung nai hlăm dŭm klei mrâo adôk kƀah, mbĭt anăn ngă klei hrŏng ruah êpul djăp hnơ̆ng čuăn klei thâo, ngă djŏ klei čiăng mlih mrâo bruă mtô bi hriăm leh anăn djŏ guôp hŏng klei găl boh sĭt mơ̆ng alŭ wăl.”

Čiăng mprăp kơ thŭn hriăm 2026-2027, Knơ̆ng bruă sang čư̆ êa čar Quảng Ngãi bi mklă hdră kčah hrŏng ruah hŏng 4 sang hră knŭk kna rông ba mlir gưl sa leh anăn gưl dua ti dŭm să knông lăn lăn hang. Hđeh sang hră mơ̆ng adŭ 9 mâo ruah hlue hdră ksiêm dlăng, amâo ngă klei bi lông ôh. Phung hrŏng ruah jing hđeh sang hră ti dŭm să knông lăn leh anăn dŭm să knông lăn bi knông hlue si  hdră kčah.

 Pă sang hră mâo jao hnơ̆ng  kčah hrŏng ruah mâo Dục Nông, Mô Rai, Rờ Kơi leh anăn Sa Loong  hŏng hnơ̆ng êbeh 5.600 hđeh sang hră, hlăm anăn giăm 1..250 čô dôk hlăm sang hră. Nguyễn Ngọc Thái, Khua Knơ̆ng bruă sang hră mtô bi hriăm čar Quảng Ngãi brei thâo, mbĭt hŏng bruă mđĭ pral hnơ̆ng mdơ̆ng dŭm boh sang hră knŭk kna rông ba mlir gưl, bruă sang hră dôk bi hgŭm hŏng dŭm alŭ wăl bi leh bruă hrŏng ruah, mprăp kdrăp mnơ̆ng čiăng kơ dŭm sang hră hmao drông hđeh hlăm thŭn hriăm mrâo.

“Hmei kčĕ leh kơ Knơ̆ng bruă sang čư̆ êa čar Quảng Ngãi gĭt gai, iêo mkrum klei găl čiăng mđĭ hnơ̆ng, êpul, mă bruă mlam, gĭr bi leh hnưm. Gĭr hlăm mlan 8/2026 srăng ngă dŭm knhuang ksiêm dlăng hdră kčah, hră mơar, êmiêt leh anăn ba yua hlăm thŭn hriăm mrâo djŏ hlue si hdră mtrŭn mơ̆ng čar./.