Sang mnia ti krĭng čư̆ čhiăng Tu Mơ Rông, čar Quảng Ngãi (êlâo dih dôk hlăm kdriêk Tu Mơ Rông, čar Kon Tum, amâo mâo djŏ knŏng jing anôk bi mnia mblei, ƀiădah lŏ jing anôk bi tuôm mơ̆ng mnuih ƀuôn sang djuê ana Xơ Đăng hlăm krĭng dlông, đru bi mlih klei bhiăn mưng hdăp nao hlăm klei bhiăn mrâo hlăm klei duh ƀơ̆ng, mđĭ kyả rbruă lŏ hma doh. Sang mnia anei mâo mkŏ mjing pioh mkŏ mjing knŏng sa mlan sa blư̆, iêo jak lu mnuih. Leh mâo 3 blư̆ mkŏ mjing, sang mnia Tu Mơ Rông jing leh anôk bi hmô jăk, mjing anôk čhĭ mnia dhar kreh, đru mnuih ƀuôn sang djuê ana Xơ Đăng bi mlih klei mĭn hlăm hdră duh ƀơ̆ng. Amai Y Khương ti ƀuôn Ngọc Leng, ƀuôn hgŭm Tu Mơ Rông brei thâo:

“Klei bi čhĭ mnia gưl tal 1 mnuih ƀuôn sang dôk bư̆ ban, ba mnơ̆ng kơ sang mnia amâo mâo pô blei. Knŏng mrâo mâo mă mơ̆ng 6 truh 7 gŏ sang nâo čhĭ mnia. Hlăk anăn mâo sa gŏ sang  mâo čhĭ truh 300.000 prăk, wĭt lŏ yăl dliê hŏng dŭm gŏ sang mkăn. truh gưl tal 2, tal 3 lu hĭn, ƀuôn hgŭm lŏ dơ̆ng đru dŭm knưng čhĭ mnia, mnuih ƀuôn sang mơak.”

Sang mnia krah ƀuôn hgŭm Tu Mơ Rông mâo mkŏ mjing mơ̆ng hlăk hrue 20/8/2025 hlăm ênhă giăm 1 héc ta, mâo dŭm sang anôk pioh čhĭ mnia 500 m² lehanăn dŭm mta mnơ̆ng pioh yua mkăn, ênoh bi liê jih jang bruă rŭ mkra sang mnia anei êbeh 4 êklai prăk mâo knơ̆ng bruă sang čư̆ êa kdriêk Tu Mơ Rông, čar Kon Tum (hđăp) duh bi liê. Lŏ čuê bruă anei, bruă sang čư̆ êa ƀuôn hgŭm Tu Mơ Rông ngă leh klei bi hmô sang mnia amâo mâo mă prăk ôh, čiăng kơ mnuih ƀuôn sang nao bi hgŭm mơak bi mlih mnơ̆ng mnuă.

Tui si Dương Đăng Khoa, K’iăng khua knơ̆ng bruă sang čư̆ êa ƀuôn hgŭm  Tu Mơ Rông, boh nik klei čhĭ mnia amâo mâo mă prăk mjing klei yuôm bhăn kơ yang ƀuôn, mđĭ ai mtrŭt mjhar klei duah ƀơ̆ng . Pia amâo mâo mă prăk ôh,. Jing hŏng dŭm mta mnơ̆ng čhum ao ƀuôn hgŭm ieoe mkrum mơ̆ng yang ƀuôn pioh mđup brei kơ mnuih ƀuôn sang. Bi dŏ čhĭ mă prăk jing boh mnga mơ̆ng mnuih ƀuôn sang čhĭ snăn bi tla prăk, mâo ana êa drao boh mnga mnơ̆ng pla jing ana êa drao, mâo phung duh mkra, êpul hgŭm bruă hriê kăp hrui blei mơ̆ng mnuih ƀuôn sang, kñăm mđĭ ai mnuih ƀuôn sang pla mjing. Dŭm gưl pŏk sang mnia msĕ snăn jing čoh čuăn ruah hrue 20 grăp mlan, thâodah bi djŏ hŏng hrue Tết Trung thu, hrue phung mniê Việt Nam 20/10 amâodah anăp anei jing hrue phung nai mtô Việt Nam 20/11. Dương Đăng Khoa brei thâo, wưng tinăp, ƀuôn hgŭm Tu Mơ Rông tĭng srăng mđĭ lu hĭn gưl pŏk sang mnia anei, sa mlan truh dua blư̆.

“Bi mlih klei bhiăn mưng, mđĭ klei thâo săng kơ mnuih ƀuôn sang amâo mâo jing klei ênưih ôh, snăn hmei nao ƀrư̆ ƀrư̆, jao kơ knuă druh klam bruă hlăm ƀuôn sang mâo hdră hâo hưn, đru kơ mnuih ƀuôn sang djă ba boh mnga mnơ̆ng pô mâo čhĭ mnia. Bi mnơ̆ng amâo mâo mă prăk ôh, srăng hrŏ ƀrư̆ ƀrư̆, bi boh mnga, lehanăn ana êa drao srăng đĭ hĭn.”

Kluôm čar Quảng Ngãi ară anei mâo leh 181 boh sang mnia msĕ djuê anei,  3 anôk phŭn klei mnia mblei, 12 boh sang mnia prŏng. Alŭ wăl krĭng čư̆ čhiăng, lehanăn knông lăn, kah knar grăp boh ƀuôn hgŭm mâo dua boh sang mnia. Bruă bi leh sang mnia mjing klei găl kơ klei kăp hrui blei boh mnga mơ̆ng mnuih ƀuôn sang. Lu mta mnơ̆ng mâo ênoh msĕ si ana êa drao mâo mnuih ƀuôn sang ba čhĭ ti dŭm boh sang mnia phŭn, đru leh sa kdrêč kơ klei mdid\ kyar klei hdĭp mda krĭgn ƀuôn sang, bi hơĭt klei hdĭp jih jang mnuih./.