Mrâo anei Phŭn bruă lŏ hma leh anăn mđĭ kyar krĭng ƀuôn sang mkŏ mjing leh klei kƀĭn trong online kluôm ala ksiêm wĭt 3 thŭn hluê ngă hdră ala čar kñăm mkŏ mkra krĭng ƀuôn sang mrâo (wưng thŭn 2021 – 2025). Hluê si klei hưn, truh kơ ară anei, kluôm lăn car mâo 6.022 să ênŭm hnơ̆ng čuăn krĭng ƀuôn sang mrâo, 263 anôk bruă gưl kdriêk ênŭm hnơ̆ng čuăn krĭng ƀuôn sang mrâo. Kluôm lăn čar mâo 19 čar, ƀuôn prŏng gưl dlông mâo 100% să ênŭm hnơ̆ng čuăn krĭng ƀuôn sang mrâo. Aduôn Đinh Thị Ngoại, mnuih djuê ana Barhnar, ti ƀuôn Lơk, să Nghĩa An, kdriêk K’Bang, čar Gia Lai.

 “Mnuih ƀuôn sang ti ƀuôn Lơk hur har nao hgŭm, sa ai hŏng hdră brư, bi mguôp hdơ̆ng pô, rŭ mjing êlan bê tông, êlan ƀuôn sang. Leh dưn yua klei kreh knhâo mrâo mrang hlăm bruă mkra mjing, hnư hrui wĭt mâo klei đĭ hĭn, ƀuôn sang doh siam, klei hdĭp mda đĭ kyar mkă hŏng êlâo”.

Hluê ngă asăp mtrŭn mơ̆ng Êpul khua bruă Đảng čar Gia Lai kơ bruă mđĭ hĭn klei gĭt gai mơ̆ng dŭm gưk bruă Đảng nah gŭ kơ bruă mkŏ mkra krĭng ƀuôn sang mrâo ti krĭng mnuih djuê ƀiă, 5 thŭn êgao, ngăn prăk knŭk kna leh anăn yang ƀuôn đru mguôp giăm 1.500 čiăng mkŏ mkra krĭng ƀuôn sang mrâo ti krĭng mnuih djuê ƀiă čar Gia Lai.

Wưng thŭn mơ̆ng 2021 – 2023, kluôm ai dưi tiŏ nao ngă hdră mkŏ mkra krĭng ƀuôn sang mrao kluôm lăn čar hlăm brô 1 êklăk 750 êbâo êklai prăk. Êlâo kơ khădah kluôm lăn čar jih ai ngă bruă gang mkhư̆ Klei ruă tưp Covid-19, ƀiădah hdră ăt dưi bi leh mta kñăm mâo knŭk kna jao. Khădah sơnăn, hluê si Ngô Trường Sơn, khua adŭ bruă gĭt gai krĭng ƀuôn sang mrâô gưl dlông, hlăm klei ngă bruă ăt dôk mâo lu klei dleh dlan, kpăk gun.

         “Hnơ̆ng tŭ jăk mâo ênŭm leh anăn bruă rơ̆ng kơ klei kjăp mơ̆ng đa đa să ênŭm hnơ̆ng čuăn dôk êdah kbah, boh nik jing hnơ̆ng čuăn wăl hdĭp, hnư hrui wĭt, klei êđăp ênang yang ƀuôn… hnơ̆ng tŭ jăk bruă mkŏ mkra leh mâo ênŭm hnơ̆ng čuăn ti đa đa alŭ wăl mâo leh klei bi knăl jhat rai kyua ka mâo klei uêñ mĭn, mkra wĭt bi jăk jêñ jêñ…”

Hlăm klei kƀĭn trông ksiêm wĭt 3 thŭn hluê ngă hdră ala čar kñăm mkŏ mkra krĭng ƀuôn sang mrâo, phung bi ala dŭm alŭ wăl mâo lu klei blŭ bi mguôp, ba mdah hdră êlan. Klă klơ̆ng msĕ si răng mgang wăl hdĭp mda, Nguyễn Ngọc Phúc, k’iăng khua kiă kriê bruă sang čư êa čar Lâm Đồng lač, čiăng mâo sa hdră pŏk hlăm bruă hrui mă djah djâo krĭng ƀuôn sang.

 “Jing srăng tĭng mkă hnơ̆ng djah djâo grăp thŭn ti wăl krah pô leh anăn brei bi lông blei ngă bruă. Drei srăng ngă knŏng sa bruă klam, anăn jing hrui prăk mơ̆ng mnuih ƀuôn sang leh anăn tla kơ knơ̆ng bruă hrui mă dhah djâo. Sơnăn, rơ̆ng kơ bruă hrui mă doh. Hmei lač bruă anei năng ngă. Ară anei hmei dôk hluê ngă ti sa kdriêk jing Đức Trọng hŏng klei bi hmô anei. Tơdah tŭ jing hmei ngă pŏk mlar kluôm čar.”

Khua Phŭn bruă lŏ hma leh anăn mđĭ kyar krĭng ƀuôn sang Lê Minh Hoan mñă klă: Hdră ala čar kñăm mkŏ mkra krĭng ƀuôn sang mrâo amâo djŏ knŏng mjing bruă mkŏ mkra, ƀiădah lŏ mđĭ hnơ̆ng klei hdĭp leh anăn ai tiê kơ mnuih ƀuôn sang krĭng ƀuôn sang.

   “Jih jang dŭm bruă pô dôk ngă mâo anôk jăk, mâo anôk ka jăk. Ƀiădah drei srăng mĭn mrâo, mĭn êlam, êjai drei thâo klei êlam boh tŭ anăn pô srăng jing msĕ si khua kiă kriê Japon ba mnơ̆ng nao čhĭ ti Hà Nội. Arăng lač mă sa klei blŭ knŏng thâo ktưn hưn kyua klei khăp čiăng srăng čŏng ngă. Kyua pô čŏng ngă, pô ba wĭt klei yâo mơak kơ mnuih ƀuôn sang pô, ba wĭt ai hdĭp kơ yang ƀuôn. Čiăng kơ êdei dih yang ƀuôn sang nao hgŭm mbĭt hŏng pô kiă kriê alŭ wăl…”

Ară anei, kluôm lăn čar dôk hluê ngă 3 hdră ala čar kñăm, hlăm anăn mâo hdră mkŏ mkra krĭng ƀuôn sang mrâo. Ƀiădah, hnơ̆ng bruă čan ngăn prăk gưl dlông thŭn 2022 leh anăn wưng thŭn 2021 – 2025 adôk êmưt. Khua Bruă Kƀĭn ala Vương Đình Huệ mñă brei bi klă bruă đua klam mơ̆ng dŭm Phŭn, dhar bruă dôk êmưt hlăm bruă brei čan 3 hdră ala čar knăm ngă truh lač luč liê mang:

"Klei ktuê dlăng anei srăng thâo wĭt lač klei êmuh. Ya ngă êmưt, ya ngă dleh kpăk, ti anôk kpăk? Leh anăn si ngă bruă ruh mgaih. Tlâo hdră ala čar kñăm dôk mâo êtuh mta phŭn ba mdah hdră mtrŭn mrô 28, leh anăn mkra mlih mrô 27, ară anei bruă klam mơ̆ng dŭm Phŭn, dhar bruă si ngă mâo leh boh klei anăn. Ya ngă brei čan êmưt? Ngăn prăk ngă bruă dôk êmưt hĭn ngăn prăk du bi liê ya ngă? Lui msĕ sơnei luč liê lu êdi”.

Êpul ksiêm dlăng mơ̆ng Dhar bruă kƀĭn ala hưn mdah brei mâo hdră êlan jao hdră kčah brei čan ngăn prăk mă bruă amâodah hâo hưn hŏng ngăn prăk ngă brư gưl dlông hluê ngă hdră ala čar kñăm wưng thŭn 2024 – 2025 čiăng kơ dŭm alŭ wăl čĭng pô hlăm bruă mkăp brei.