Ti Anôk bruă ngă hră mơar knŭk kna ƀuôn hgŭm Tây Sơn, knŏng ka bŏ mơh 10 mnĭt, ayŏng Nguyễn Minh Phi, dôk ti alŭ Tây Xuân, bi leh jih jang hdră ngă hră mơar anôk čhĭ mnia hlăm kdrăp mrô. Mơ̆ng hdră ba mơĭt hră mơar online, bi mklă điện tử truh kơ tla prăk amâo yua prăk, djăp mta bruă mâo phung knuă druh ktrâo lač ngă mtam ti "Anôk đru kơ klei bi mlih mrô". Ayŏng hơ̆k mơak:

“Kâo ƀuh bruă čih anăn gŏ êsei mnia blei pral snăk. Êlâo dih jing 3 hruê ƀiădah ară anei hră mơar pral khuăt, mkiêt mkriêm hruê mmông. Knuă druh đru jăk, jih ai tiê.”

Klei bi mlih anei jing boh tŭ bruă hrăm mbĭt lu tur knơ̆ng mrô ti Anôk bruă ngă hră mơar knŭk kna ti să Tây Sơn, đru kơ mnuih ƀuôn sang knŏng ngă sa blư̆ hlăm wăl điện tử hrô kơ lu blư̆ nao msĕ si êlâo.

Mơ̆ng akŏ thŭn truh ară anei, Anôk bruă ngă hră mơar knŭk kna să Tây Sơn  tŭ mă leh êbeh 3.400 hră mơar, jih jang dưi msir mgaih djŏ amâodah êlâo kơ wưng kčah, msir mgaih online leh anăn yua ênoh mrô djăp ênŭm. Truh knhal jih mlan 7/2026, alŭ wăl bi leh leh anăn êbeh 9/10 hnơ̆ng kčah să yua ênoh mrô phŭn, klei mnuih ƀuôn sang ư ai mâo 100%.

Ayŏng Trần Lam Sơn, Khua dlăng bruă êdam êra să Tây Sơn brei thâo, ară anei să dôk pŏk ngă hrăm mbĭt dŭm êpul mă bruă mrô êpul êya hlăm jih jang 10 alŭ.

“Êpul kdrăp mrô hmei mbha mnuih mă bruă đru kơ mnuih ƀuôn sang mkŏ dăp kdrăp mrô. Hŏng 10 alŭ, bruă pŏk ngă ba mnuih mă bruă grăp hruê, boh nik mkŏ kdrăp iGialai đru kơ mnuih ƀuôn sang ba yua klei thâo.”

Amâo mdei ti klei mlih mrâo hră mơar knŭk kna, bi mlih mrô ti Tây Sơn dôk lar truh kơ lu mta bruă mơ̆ng klei hdĭp. Bruă sang čư̆ êa gĭt gai hŏng klei čih pioh; sang mnia hđăp ƀrư̆ ƀrư̆ bi mlih kơ klei tla prăk hŏng mrô; êpul hgŭm bruă leh anăn gŏ sang čhĭ mnia yua hră tla prăk điện tử; bruă mdrao mgŭn bi mrâo mrang hră mơar klei suaih pral điện tử; bruă mtô bi hriăm pŏk ngă hră mơar hriăm online leh anăn sang hră thâo mĭn. Dŭm tur knơ̆ng anei dôk mkŏ mjing wăl anôk mrô mơ̆ng gưl să.

Đỗ Thành Quyết, K’iăng khua adŭ bruă dhar kreh - ala ƀuôn să Tây Sơn, čar Gia Lai brei thâo, hlăm sa thŭn êgao, alŭ wăl mkŏ mjing leh 34 klei bi kƀĭn amâo mâo hră mơar, pŏk ngă gru hmô sang mnia mrô hŏng 155 čô čhĭ mnơ̆ng nao hgŭm tĭng tla amâo yua prăk hla leh anăn mâo hnơ̆ng luôm 5G truh 99.3% ênoh mnuih ƀuôn sang. Čiăng krơ̆ng kjăp leh anăn mđĭ lar boh tŭ dưn gru hmô să phŭn mrô, să păn kjăp 37 bruă klă klơ̆ng hluê si hdră kčah mâo čar Gia Lai kčah mtrŭn.

“Să Tây Sơn mđing mkŏ mjing Anôk bruă ngă hră mơar knŭk kna bi hmô. Truh ară anei, anôk bruă bi leh dŭm bruă klam, hnơ̆ng čuăn kčah. Hlăm wưng kơ anăp, să gĭr bi hgŭm hŏng dŭm knơ̆ng bruă, anôk bruă djŏ tuôm gĭt gai hluê ngă bi leh hluê si hdră kčah mơ̆ng čar.”

Dŭm boh tŭ tal êlâo mơ̆ng să Tây Sơn mjing leh tur knơ̆ng boh sĭt yuôm bhăn kơ čar Gia Lai mkŏ mjing hdră kčah bi lar gru hmô “să phŭn ba yua mrô “kơ 30 să hlăm wưng kơ anăp.

Lâm Hải Giang, K’iăng Khua Knơ̆ng bruă sang čư̆ êa čar Gia Lai, brei thâo, bruă bi lar amâo djŏ knŏng jing hlue ngă gru hmô să Tây Sơn ôh, ƀiădah mđing mkŏ mjing sa anôk mlih mrô hrăm mbĭt  ti gưl să, mguôp hŏng klei čiăng boh sĭt leh anăn ba klei tŭ dưn klă klơ̆ng  kơ mnuih ƀuôn sang,

Mta kñăm wưng sui jing mkŏ mjing bruă sang čư̆ êa mrô, bruă duh mkra mrô leh anăn yang ƀuôn mrô mơ̆ng nah gŭ mtam, čiăng kơ klei bi mlih mrô klă sĭt jing boh kdrŭt mtrŭt mđĭ kyar bruă duh mkra - ala ƀuôn mơ̆ng čar hlăm wưng mrâo.

“Dŭm gru hmô mrâo kơ klei mkra mlih hră mơar leh anăn mlih mrâo mbruă mjing klei găl jăk kơ mnuih ƀuôn sang, anôk bruă duh mkra pŏk ngă hră mơar knŭk kna, đru bi hrŏ wưng msir mgaih hră mơar knŭk kna. Lu tur knơ̆ng mrô dưi bi leh, mjing klei găl kơ bruă sang čư̆ êa alŭ wăl ngă klei gĭt gai mơ̆ng ênoh mrô, păn kjăp boh sĭt čiăng ba dŭm hdră êlan duh jăk kơ klei mđĭ kyar mbĭt kluôm čar.”

Mơ̆ng sa gru hmô lông ngă, să Tây Sơn dôk brei ƀuh mlih mrô amâo djŏ knŏng jing klei yăl dliê kơ kdrăp mrâo ôh, ƀiădah êlâo hĭn jing bi mlih hdră kriê dlăng leh anăn duh kơ mnuih ƀuôn sang. Tơdah dŭm hdră mrô mâo hlăm grăp hră mơar, grăp klei mnia blei leh anăn grăp hdră bruă knŭk kna, gru hmô “să phŭn yua mrô” srăng jing tur knơ̆ng kơ Gia Lai mkŏ mjing knŭk kna mrô, bruă duh mkra mrô  leh anăn ala ƀuôn  mrô mơ̆ng nah gŭ, mjing boh kdrŭt mrâo kơ klei mđĭ kyar pral leh anăn hơĭt kjăp hlăm wưng kơ anăp.