Gŏ sang Ma Sỹ ti ƀuôn Ka Rái 1, să Ka Đơn, kdriêk Đơn Dương, čar Lâm Đồng, jing sa hlăm dŭm gŏ sang mâo klei mđing êdei hlăm wưng Tết anei Anăn jing sa boh sang mrâo kjăp siam, jịng sa anôk h’uh mđao kjăp. Amai mhei ai tiê lač:

“Tơdah amâo mâo ôh klei đru mơ̆ng bruă sang čư̆ êa, kâo amâo mâo thâo ôh êla kâo srăng mâo sa boh sang dôk hơĭt. Lač jăk kơ  Đảng, Knŭk kna, lač jăk kơ mnuih ƀuôn sang, kyua mâo diñu hmei dưi mâo sang mrâo, amâo lŏ rŭng răng ôh klei kơ sang dôk. Knŏng hmei gĭr duh ƀơ̆ng kpưn đĭ hlăm klei hdĭp, čiăng kơ klei hdĭp anak aneh mgi dih tŭ dưn hĭn”.

Mâo tŭ mă hnư mnơ̆ng đru bi hmao drông Tết, amai H’Juet Niê ti să Čư̆ Pui, kdriêk Krông Bông, čar Daklak, ăt mơak. Ñu lač, hlăm lu thŭn anak lĕ hlăm klei dju djuam duam ruă, gŏ sang mâo 4 čô mnuih dôk bi knhiêt hlăm sa boh sang điêt, tĭ rưč, ară anei mâo sang mrâo jing leh klei mđĭ ai prŏng êdi ñu gĭr hgao klei dleh dlan:

“Yan mnga anei gŏ sang kâo mâo leh sang mrâo, hmei bŏ hŏng klei hơ̆k mơak. Anei jing boh kdrŭt kpưn đĭ hlăm klei hdĭp, găn klei dleh dlan, tlaih mơ̆ng klei ƀun ƀin lehanăn bi hơĭt klei hdĭp mda kơ êdei anăn”.

Tết Nguyên đán nĭl leh. Mbĭt hŏng lu bruă dôk ngă hlăm klei mjêč čiăng bi leh rŭ mdơ̆ng sang mrâo kơ dŭm gŏ sang dôk hlăm klei dleh dlan, hlăm tar lăn dap kngư, mâo mkŏ mjing leh lu bruă duh Tết. Dŭm pluh êbâo hnư mnơ̆ng Tết mâo mđup brei leh truh hŏng mnuih ƀuôn sang ti dŭm boh ƀuôn. Khădah ênoh tŭ dưn mnơ̆ng mđup brei, ƀiădah grăp hnư mnơ̆ng anăn bi êdah ai tiê klei khăp hdơ̆ng găp, mâo klei bi mđĭ ai. H’Loen Kbuôr, hdĭp ti ƀuôn Ea Ênao B, să Ea Tu, ƀuôn prŏng Buôn Ma Thuột, yăl dliê kơ klei mơak ñu mâo tŭ mă mnơ̆ng Tết bŏ hŏng klei yuôm bhăn:

“Thŭn anei gŏ sang kâo mâo Tết, lač jăk kơ dŭm êpul bruă, kơ Đảng lehanăn knŭk kna mâo mđin kơ hmei. Hmei klă klơ̆ng thâo hdơr knga lehanăn mơak mñai êdi leh mâo tŭ mă mnơ̆ng mđup brei anei”.

Lăn Dap kngư ti wưng anei hlăk dơ̆ng mtluk mtlak hŏng dŭm hdră “Tết kuh kŭm”. Dŭm êpul bruă msĕ si Êpul hgŭm gru bi kal hrah, bruă Mặt trận, Êpul hgŭm mnuih mă bruă, mbĭt hŏng lu mnuih, phung duh mkra bi mđrăm mbĭt thâo bi đru čiăng kơ jih jang mnuih ƀuôn sang, khădah jing mnuih djuê ƀiă dưn, mnuih ƀun thâo dah gŏ sang dôk hlăm klei dleh dlan, dưi mâo klei găl drông Tết djăp ênŭm.

Trương Công Thái, k’iăng khua knơ̆ng bruă sang čư̆ êa čar Daklak lač:

“Grăp blư̆ Tết truh yan mnga hriê, bruă Đảng čar, Êpul gơ̆ng bruă ƀuôn sang čar, knơ̆ng bruă sang čư̆ êa, dhar bruă Mặt trận čar gĭt gai leh jih jang êpul bruă đảng lehanăn jih jang bruă sang čư̆ êa alŭ wăl mbĭt hŏng phung thâo bi đru, phung duh mkra dôk hlăm čar ngă klei bi đru čiăng kơ jih jang mâo Tết bi kuh kŭm, đru kơ mnuih ƀuôn sang mâo drông Tết h'uh mđao. Mbĭt hŏng hdră lăm lui sang tĭ rưč, snăn bruă mđup brei hnư mnơ̆ng kơ mnuih ƀuôn sang dôk hlăm klei dleh dlan jing yuôm bhăn êdi.”

Hlăm dŭm hrue knhal jih thŭn anei, êjai Tết hlăk dơ̆ng truh, jih jang klei yăl dliê kơ dŭm gŏ sang ƀun, dưi mâo sang mrâo, mâo mnơ̆ng Tết djăp ênŭm amâo mâo djŏ knŏng ba hriê klei mơak kơ digơ̆ đuič ôh ƀiădah lŏ mjing klei thâo bi đru hdơ̆ng găp, hŏng ai tiê thâo bi khăp. Anăn yơh jing mnơ̆ng mđup brei yuôm bhăn, čiăng kơ yan mnga anei klă sĭt jing yan mnga klei khăp lehanăn klei čang hmăng./.