Dôk hơ̆k mơak kdŏ mmuñ mbĭt hŏng ƀĭng găp ti Sang dhar kreh phung hđeh Dak Lak, Nguyễn Thục Quyên, 13 thŭn ti ƀuôn hgŭm Ea Tam, ƀuôn prŏng Ƀuôn Ama Thuôt brei thâo, leh ruê̆ thŭn hriăm, ñu čŏng pô mâo hdră êlan čiăng mâo dŭm hruê mdei jăk yâo leh anăn tŭ dưn. Ară anei, ñu lŏ čih anăn nao hriăm thiăm 2 adŭ hriăm mkăn ti sang dhar kreh:

 “Hlăm mlan anei kâo srăng nao pah mlâo mnŭ leh anăn hriăm tinei, bi adôk 2 mlan kâo srăng nao hriăm thiăm, hriăm toán leh anăn klei angle. Truh mlan 8 kâo srăng nao ti Gia Lai. Thŭn anei amĭ kâo brei nao hriăm 5 hruê 4 mlam ti sang Yơng Liên Trì ti Gia Lai, đru kơ kâo bi hrŏ ƀiădah klei êmăn leh sa thŭn hriăm sui”.

Čiăng kơ anak mâo sa yan mdei tŭ dưn, lu phung amĭ ama ksiêm duah leh anăn čih anăn anak hlăm dŭm mta bruă. Bruă yan mdei prŏng ti Dak Lak amâo djŏ knŏng mkŏ mjing klei hơ̆k mơak, hriăm mjuăt ƀiadah lŏ mđing truh đru kơ phung hđeh lui hĕ dŭm kdrăp yua điện tử leh anăn ñĕ kơ klei kpĕ êka. Amai H’Duyêt Niê, ti ƀuôn hgŭm Tân Lập, ƀuôn prŏng Ƀuôn Ama Thuôt, čar Dak Lak brei thâo:

 “Yan mdei prŏng thŭn anei čiăng mkŏ mjing klei găl kơ phung hđeh hlăp lêñ, mâo klei jhŏng hĭn, mâo lu phung mah jiăng leh anăn hriăm mâo lu mta. Ƀĭng găp kâo ară anei dôk hriăm adŭ Dance-kids, hriăm kdŏ mơ̆ng thŭn dih truh kơ ară anei, ĕ ăt khăp kơ kdŏ kyuanăn ăt brei anak nao hriăm”.

Ti sang dhar kreh phung hđeh čar Dak Lak, mâo êbeh 2.000 čô hđeh dôk nao hlăm dŭm adŭ hriăm msĕ si kdŏ, mmuñ, kač rup, gai hră, mjuăt asei mlei, klei bi lông čiăm…Boh nik, hdră “wưng hriăm hlăm lĭng kahan” đru kơ dŭm êtuh čô mơ̆ng 8 – 15 thŭn mâo mmông găl hriăm hlăm wăl mjuăt bi hriăm hdră bhiăn, amâo mâo tivi, amâo mâo đĭng blŭ. Nguyễn Thị Thúy Hiền, k’iăng khua klam bruă sang dhar kreh hđeh čar Dak Lak brei thâo:

 “Yan mdei mprŏng kdŏ mmuñ ti sang phung hđeh jing hơ̆k mơak. Êbeh 30 mta adŭ hriăm mkŏ pŏk mơ̆ng 5h30 aguah truh kơ 9 mmông mmăt, găl guôn hŏng phung hđeh mơ̆ng 2 thŭn kơ dlông. Thŭn anei, êngao kơ rơ̆ng kơ dŭm mta hriăm êlâo dih jing dhar kreh, klei kdŏ mmuñ, mjuăt asei mlei, klei thâo, hmei lŏ knăm bi hriăm bruă amâo amâo mă prăk, dŭm anôk hlăp lêñ jăk, mtô mjuăt, kñăm kơ bruă gang mkhư̆ klei mgăt êa hlăm phung hđeh leh anăn klei kpĕ êka kơ diñu”.

Ti dŭm ƀuôn êlan, phung hđeh Dak Lak ăt dôk mŭt hlăm yan mdei prŏng hơ̆k mơak. Amuôn H Juliê Byă, 9 thŭn, ti să Ea Tul, kdriêk Čư̆ Mgar brei thâo, yan mdei prŏng anei jing wưng tui tiŏ klei pô khăp. Amâo mâo nao sang hră, kyuanăn mâo lu mmông čiăng hriăm thiăm dŭm mta leh anăn hlăp lêñ.

 “Hlăm ưng mdei, kâo srăng hriăm klei Anglei, Toán, hriăm MC, hriăm čih, hriăm pĕ Piano. Anăn jing dŭm mta kâo khăp. Êngao kơ năn, dŭm mmông mă kâo dlăng klei yăl dliê leh anăn hlăp hŏng adei kâo mbĭt hŏng phung găp ti anôk kâo dôk”.

Yan mdei prŏng ăt jing wưng mkŏ mjing mlan ngă bruă kyua phung hđeh, kyuanăn, dŭm mta bruă răng mgang, kriê dlăng leh anăn mtô mjuăt phung hđeh ăt dưi uêñ mĭn. Thŭn anei, hŏng akŏ “mđing ai dưi bi leh dŭm mta kñăm kyua phung hđeh”, mơ̆ng krah mlan 5, bruă sang čư̆ êa čar Dak Lak ba mdah leh hdră êlan ngă bruă kyua phung hđeh. Hlăm mlan 6, Dak Lak mtrŭt mjhar “yan mdei prŏng kyua phung hđeh” hŏng dŭm mta bruă mtô bi hriăm klei luê êa, gang mkhư̆ klei mngăt êa kơ phung hđeh hlăm čar. Ti dŭm krĭng ƀuôn sang, êpul bruă êdam êra ăt mkŏ mjing hdră bruă yan mdei prŏng kơ phung hđeh ti anôk dôk hŏng lu mta bruă lu jơr, jăk yâo. Amai Phan Thị Trinh, k’iăng khua bruă êdam êra čar Dak Lak brei thâo:

 “Mđĭ hĭn klei bi mguôp hŏng dŭm dhar bruă čiăng thâo klă leh anăn mgaih msir dŭm boh klei djŏ tuôm hŏng phung hđeh. Mđĭ hĭn bruă gang mkhư̆ mơ̆ng nah gŭ kơ phung hđeh čiăng mâo dŭm bruă hlăp lêñ jăk čiăng rơ̆ng kơ klei êđăp ênang. Lŏ dơ̆ng ngă dŭm klei mtrŭt mjhar kyua phung hđeh khăp hơiêng, kñăm kơ dŭm mta phŭn kơ klei mđup brei klei đru hriăm amâodah rŭ mjing leh anăn mkra mđĭ dŭm hdră bruă klei hlăp lêñ kơ phung hđeh, boh nik jing krĭng tlaih kbưi leh anăn dŭm anôk dleh dlan”.

Hŏng klei hrăm mbĭt mơ̆ng dŭm gưl bruă, dhar bruă leh anăn wăt klei čŏng pô mơ̆ng phung amĭ ama, phung hđeh ti Dak Lak dưi mâo sa yan mdei prŏng hơ̆k mơak, êđăp ênang leh anăn tŭ dưn. Grăp mta bruă, grăp anôk hlăp lêñ amâo djŏ knŏng jing klei hơ̆k mơak, ƀiădah lŏ jing kdrăp yua brei kơ phung hđeh mâo klei jhŏng, đĭ hriê kơ prŏng leh grăp yan mdei prŏng./.