
VOV4.M’nông: Ndrel ma kon se tâm lam dak, ta Tây Nguyên ăp kon se râng thi tốt nghiệp THPT năm 2022 hŏ tât ăp ntŭk thi gay ma ƀư nau đăng kí lăp thi tâm kêng măng 6/7 ndrel ôi aơ ntơm rơh thi môn bôk năp, môn Văn. Tâm Dak Lak, âk kon se rnôk geh ôp, ndrel hôm geh nau ueh tâm nuih n’hâm gay mra geh lăp tâm rnôk thi. Bol ma âk tŏ hôm geh rgâl nau ntĭm nti ntơm bah nau nti tâm ngih săm ƀŭt jêh ri nti trực tuyến, jêh lŏ nti tâm ngih săm ƀŭt yor nau khuch bah srê Covid-19, ƀư khuch ngăn đŏng tât nau geh gĭt đah ăp kon se nti jrâu 12, yơn đah nau nsôih bah săk kon se ndrel nau gơih kơl an bah ăp nau ntĭm nti tâm rơh rlau aơ, âk kon se mbơh lah hŏ nchrăp ueh ân rơh thi, nuih n’hâm hŏ mra râng ueh ân rơh thi. Rơh thi tốt nghiệp THPT năm aơ, n’gor Dak Lak geh rlau 2.400 kon se đăng kí râng thi tâm 32 ntŭk thi.
Rơh thi tốt nghiệp THPT năm aơ, n'gor Lâm Đồng geh rlău 14.000 nuĭh đăng ký râng thi. Gay đăp mpăn rơh thi ƀư dơh soih, đăp mpăn, răp jăp n'hanh di nău way, n'gor hŏ tâm pă ƀư 38 ntŭk thi đah 629 jrô thi, tâm nê geh 6 jrô thi ndop ta ăp nkuâl, nkual ƀon têh tâm n'gor. Rlău ma n'hao dăng ăp trong njrăng n'gang nuh srê, kloh uĕh ndơ ngêt sa, đăp mpăn rnă njrăng, đăp mpăn hăn ntung trong an ăp kon se hăn tât thi, n'gor Lâm Đồng rđău đă n'gâng kan ăp ntŭk tâm n'gor ntop kơl năn ngăch an ăp kon se geh nău rêh jêr jŏt mpeh prăk sa n'hanh rsong hăn. Tĭng wa Trần Thị Vũ Loan, Groi kruanh UBND TP Đà Lạt, rlău ma nta trong dơh dŭt uĕh an ăp nuĭh râng thi, tă bah rơh thi ƀư tâm rnôk Đà Lạt âk năch hăn pâl nđaih, rlu rlău jêng nău đăp mpăn hăn ntung trong soih aih an kon se hăn thi dơi ŭanh khlay an ƀư lor bôk năp.
Ntơm ôi 6/7, Đoàn n’gor Gia Lai ƀư ntơm nau kan “Mbơh, kơl an n’hâm tâm rnôk thi” năm 2022. Gay kơl an kon se thi ndrel nŭih tâm rnăk vâl bah kon se thi tâm rnôk thi tốt nghiệp THPT năm 2022, Rnâng kan bôk nau kan “Mbơh-kơl an tâm rnôk thi” n’gor Gia Lai hŏ ndâk 39 rmôt druh ndăm hăn kơl an, đah 292 nŭih kơl. Ăp nŭih râng kơl đah nau ƀư: Mbơh ngih gŭ mô roh prăk, ngih gŭ thuk, ntŭk ngêt sa thuk, đăp mpăn kloh ueh ndơ ngêt sa ân kon se ndrel nŭih tâm rnăk vâl, kơl an kon se tâm ăp ntŭk thi, kơl an kon se geh nau rêh jêr jŏt, pă bok put mbung, dak ngêt mô geh roh prăk ân kon se. Jêh nar ntơm hăn, ăp nŭih kơl an hŏ ngăch tât tâm ăp ntŭk thi gay ma râng “Mbơh-kơl an n’hâm” ân ăp kon se./.
Nuĭh rblang: Điểu Thân n'hanh H'Thi
Viết bình luận