Gia Lai: Lĕ kon nuĭh râng njrăng n’gang rmanh rmok dak an kon se
Thứ sáu, 01:00, 01/07/2022

        

          VOV4.M’nông:   Rnôk dăch aơ, n’gor Gia Lai way geh ăp nău rmok dak yô̆ nđach, nuĭh rmanh dŭt âk ta rnoh năm deh kon hŏk. Nău aơ đă ngih pah kan dơi kan, kon nuĭh n’hanh rnăk wâl an uănh mĭn lơn tay tâm nău mât njrăng n’hanh uănh rong kon se, ngăn lah tâm rơh rlu nti.

 

          Tâm jay jêt ta thôn 2, xă Trà Đa, nkual ƀon têh Pleiku, yuh Nguyễn Thị Thanh Hương gŭ rngot ta njônh jay uănh rup kon bu klô lĕ roh yor rmok dak ta thôn Tây Hồ, xă Bàu Cạn, nkuăl Cư Prông tâm nar 14/6 mhe rlău. Yuh Hương nkoch, nău yô̆ nđach geh yor rnăk wâl mô geh prăk an kon hăn nti re dak n’hanh nău blău mpeh njrăng n’gang rmok dak.

“Mhe aơ rnăk wâl geh an mon hăn sĭt u pâl, pâl tâm nĕ ri geh oh kon yơ, 2 hê way hăn pâl ndrel. Nar 14/6 mhe rlău hăn chưng play ma tach pâl play mô geh nuĭh jêng 2 mon mư hăn n’glău dak pâl, mô lap rhat jâng jŭr tâm n’glău jru tât 7 mét ri 2 mon mô dơi hao. Rnăk wâl mô geh ndơ n’hanh mô geh mông nar, hăn pah kan măng nar jêng mô geh mông ndơ̆ mon hăn công viên gay re, knŭng an pâl ta jŭm dăr jay”.

 

Rmok dak dôl lah nkô̆ nău bôk năp ƀư khĭt an kon se n’hanh druh ndăm rchong ta n’gor Gia Lai, n’glơi an nău rngot mô bah tâm âk rnăk wâl. Yor rĭ, nău hun hao ntrong kan tiăr nti re dak n’hanh năp ăp nău wât, nău blău njrăng n’gang rmok dak an kon se n’hanh nsum mpôl dŭt n’hâm ŭch, an geh nău lăp dŭt n’hâm bah ăp gưl, ăp nău kan, rnăk wâl n’hanh lĕ kon nuĭh.

Âk ngih sam ƀŭt ta Gia Lai lĕ ƀư ntĭm re dak an kon hŏk.

 

Bah bôk khay 6/2022, N’gâng kan Văn hóa Thể thao n’hanh pâl nđaih n’gor Gia Lai tâm rgop đah ăp ntŭk kan geh tât ƀư nar Olympic kon se n’hanh rgŏ jă lam nuĭh ƀon lan tiăr nti re dak, njrăng n’gang rmok dak. Ăp oh kon hŏk dơi mbơh ntĭm nău wât n’hanh ntĭm ngăn ăp nkô̆ nău: nău blău kơl ngăch rnôk geh rmok dak; ăp nău way ƀư kơl ngăch rnôk geh rmanh sôt săk; mkra nu nău rnôk geh thŏk, khih ndơ sa... Oh Bạch Thị Mai Uyên, kon hŏk jrô 8, Ngih sam ƀŭt THCS Nguyễn Du, nkual ƀon têh Pleiku, nkoch: Ăp nău ƀư rlu nti năm aơ dŭt uĕh. Tâm nĕ, re dak lah môn ăp oh nsrôih mbra nti an uĕh:

“Oh dơi nai ăp kônh yơ ntĭm ăp nău njrăng n’gang rmok dak, bah nĕ oh rhoăt geh nău blău, nău gĭt an saơ nơm, rnôk ma mâp ăp nu nău aơ tâm nău rêh ri oh gĭt trong njrăng rdâng đah pơng gay kơl ăp nuĭh kơt săk nơm. Tă bah yan rlu nti oh mbra săch môn re dak lah môn gay tiăr nti săk jăn, n’hao ngăch dăng. Oh ŭch njuăl tât ăp nuĭh an nti môn re dak gay n’hao dăng săk soan an săk nơm nkre njrăng n’gang rmok dak tâm ăp nu nău ndal”.

 

Wa Trần Ngọc Nhung-Kruanh N’gâng kan văn hoá, thể thao n’hanh Pâl nđaih n’gor Gia Lai an gĭt, n’gor dôl geh trong nchrăp ntrôl dăng ntrong leo lĕ nuĭh ƀon lan nti re dak, njrăng n’gang rmok dak. Nău ŭch tât năm 2025, mbra geh 50% kon se bah 6 tât 16 năm deh gĭt blău đăp mpăn tâm dak.

“Ntrong leo tiăr nti re dak lĕ nuĭh ƀon lan, lơn lah đah kon se lah du nău kan dŭt n’hâm khlay. Nău rmok dak bah ăp oh jêt tâm khay bah năp tâm lam dak n’hanh n’gor Gia Lai dŭt hô. Lĕ nuĭh ƀon lan, ăp rmôt kan chính trị rêh jêng, ăp ntŭk an n’hao nău wât, nău kan bah nơm đah nău tiăr nti re dak an ăp mon druh ndăm n’hanh lĕ nuĭh ƀon lan gay n’hŭch đêt ngăn nău rmok dak bah nuĭh ƀon lan kơt kon se”.

 

Bah bôk năm tât aƀaơ, n’gor Gia Lai lĕ geh 17 tơ̆ rmok dak ƀư 23 kon se khĭt. Lơn lah bah rơh rlu nti tât aƀaơ lĕ na nao geh 5 tơ̆ rmok dak ƀư 7 kon se khĭt. Dŭt âk ăp nuĭh khĭt yor kon se mô gĭt nău đăp mpăng njrăng n’gang rmok dak n’hanh joi êng tât nkual dak me, dak diăng, ăp n’glău jru pâl ma mô geh nău groi nđôi bah nuĭh têh.

Gay njrăng n’gang rmanh rmok dak ta kon se nsĭt tay săk rnglăy âk dŭt ŭch ndrel ty bah lĕ kon nuĭh, ăp rnăk wâl an uănh tât âk tay tâm nău mât njrăng n’hanh uănh rong kon se, ngăn lah tâm rơh rlu nti gay dêr ăp nău rmanh yô̆ nđach đah kon se, lơn lah rmanh rmok dak. Wa Võ Như Minh Quang-Kruanh jrô kan mât njrăng, uănh mât kon se n’hanh tâm ban bu ur bu klô-N’gâng kan Lao động Thương binh n’hanh Xã hội n’gor Gia Lai an gĭt:

“Kơp dơn nău ntĭm nti gĭt blău nău rêh, gĭt blău an kon se hôm e âk nău geh, nău an môn ntĭm re dak tâm ngih sam ƀŭt mô hŏ dơi ƀư n’hanh ƀư săk rnglăy jêng aƀaơ nău rmok dak hôm e geh ƀa ƀơ. An nsrôih m’hâm ƀư ndơ̆ trong kan rgŏ jă nkoch trêng tât rnăk wâl, lĕ kon nuĭh gay n’hao wât mpeh njrăng n’gang sôt săk n’hanh rmok dak an kon se. Ăp ndơ ƀư tŏ dak, n’glău ka, dak me ƀư khĭt rmok dak ân ngăn an geh nking n’gang mbơh njrăng. Tâm nău dơi an ndơ̆ kon se tât ăp n’glău re gay kon se nkre pâl, nkre nti ăp nău re dak gay mât njrăng an kon nơm”.

 

Đah nău nsrôih bah nău kan dơi kan, nkre ntrôl dăng nkoch trêng, nkre n’hao ntĭm ăp nău nti blău re, mbra rgop khlay tâm nău njrăng n’gang rmok dak an kon se. Bah meng nĕ, dŭt ŭch nău uănh mĭn, mât uănh bah ăp me bơ̆, gay dêr ăp nău rmok dak yô̆ nđach.


Nuĭh rlang: Y Sưng Phê Ja

Tags:

Viết bình luận

TIN CÙNG CHUYÊN MỤC