Gia Lai: Ntŭk ƀư nau kan nchuăn rdeng n’hao rnoh dŏng yorr rnoh pring xăng hao khlay
Thứ ba, 16:21, 05/07/2022

VOV4.M’nông: Bah năp nau hao khlay mro bah rnoh rping xăng, rnoh nchuăn rdeng ndơ bah ăp ntŭk ƀư nau kan nchuăn rdeng bah Gia Lai dôl geh rgâl ân geh tâm di đah nau kan nsum.

            Wa Châu Văn Liên, tâm tổ 2, Phường Hội Phú, nkuăl ƀon têh Pleiku rvăt du vé ndeh bah ngih ndeh Thuận Tiến hăn ntơm bah Pleiku tât Nkuăl ƀon têh Hồ Chí Minh đah rnoh 350 rbăn. Wa Liên mbơh, rđil đah ndeh bah 4 khay bah năp nê wa hăn, ri rnoh ndeh rnôk aơ hao tay 50 rbăn. Rnoh vé hao khlay khuch đŏng tât nau hăn ro bah nơm, yơn lah âk nŭih kŏ mô geh nau mĭn êng yor lah rnoh dak rping kŏ hao khlay, ƀư ăp ntŭk nchuăn rdeng năch mâp âk nau khuch đŏng. Wa Châu Văn Liên nkoch:

‘Bah năp nơh gâp hăn ncho ndeh ri xăng knŭng rlau 20 rbăn prăk du lít dơm, rnôk aơ xăng ngih dak hŏ hao bơi tât 34 rbăn hôm. Ntŭk ƀư nau kan tăch rgâl nchuăn rdeng ri kŏ hao khlay mơ geh săk rnglay. Mhe nơh jêh rnôk bah srê, ăp rmôt ƀư nau kan tăch rgâl nchuăn rdeng mâp nau khuch âk ngăn, tĭng rnoh xăng ma ntŭk ƀư nau kan nê n’hao khlay tăch ri ri gâp saơ lah nŭih ƀon lan kơt nơm dơi ndơn đŏng”.

            Nkoch tât nau rgâl rnoh tăch vé, wa Nguyễn Hồng Hải-Giám đốc Công ty TNHH nchuăn rdeng Hồng Hải mbơh: Jêh âk nar jŏ jong nsrŭng nau kan tâm du ntŭk kan yor srê Covid-19, ntŭk kan ŭch mât nâm ơm rnoh tăch vé gay ma geh âk nŭih ncho. Yơn lah, jêh rnôk nau tât bah srê ji geh nkân ri rnoh xăng lŏ hao khlay, ƀư nau rvăt dŏng ndơ tâm di tơ̆ hăn kơt rnôk aơ nchâp hao khlay vé:

            ‘Ntơm bah aơ hăn nkuăl ƀon têh Hồ Chí Minh lĕ 400 lít dak pring, bah năp nơh ri ndeh hên knŭng geh 300 rbăn du vé, ma rnôk aơ rnoh hao khlay bah pring tât 31 rbăn, rlau 2 tơ̆ ngăn, vé knŭng hao ntop nklăp 50 rbăn du vé yor jêr nsum bah nau rêh jêng. 400 lít bah du bôk ndeh hăn ndrel sĭt ri lĕ roh 12 rkeh hôm, jêh ri lŏ nkhôm trong BOT, prăk khay ân nŭih ƀĭt ndeh, prăk drâm ndeh bar ding, rnôk aơ nau geh nsum lah kơt nê ri nơm ân geh ndrel tâm pă kơl nau jêr aơ”.

            Kŏ geh tât nau kan rgâl rnoh tăch vé ndeh, wa Trần Thị Ánh, Groi Giám đốc Công ty TNHH Mai Linh Gia Lai, nkoch: Nau rgâl rnoh tăch vé ndeh lah nau mô dơi ƀư êng đah ăp rmôt ƀư nau kan nchuăn rdeng năch rnôk ma rnoh dak pring xăng hao khlay. Yơn lah, rmôt kan kŏ ndơ̆ luh rnoh rgâl rnoh ƀư kan ân tâm di, đăp mpăn nau tâm ban geh nau ŭch bah năch hăn ndrel ma ntŭk ƀư nau kan tăch rgâl:

            “Bah năp nau rnoh hao khlay dak pring xăng kơt aơ ri nchâp ntŭk kan nơm ân geh rgâl rnoh ƀư tăch vé hăn ncho gay ma tâm di đah nau dôl geh. Rmôt kan hao rnoh khlay êp aơ tâm lơ 20/6, đah rnoh nklăp 16% rđil bah năp nơh. Nau geh jêh rtnôk bah srê ri mâp âk nau jêr ngăn, tâm rnôk rnoh dak pring xăng hao khlay kơt aơ ri nơm ân nchâp ntŭk kan ân geh hao khlay, hao yơn geh ăp nau mĭn rvê đŏng bah rmôt ƀư nau kan, yơn nơm ŭch geh nau dơi gay ma lŏ ƀư kan ri nơm ân geh hao khlay ân tâm ban’.

            Ntơm bôk năp tât rnôk aơ, rnoh dak pring xăng bah lam dak hao 12 tơ̆, đah 3 tơ̆ n’huch ndrel jêng geh nau khlay khlay ndrel âk tơ ngăn rđil đah ntơm sa ơm tât rnôk aơ. Gay ma ƀư mât nau kan nâm ơm, 25 ntŭk ƀư nau kan nchuăn rdeng năch bah ăp n’gor, rmôt ƀư nau kan dŏng rdeng taxi tâm n’gor Gia Lai hŏ ntơm geh nau rgâl rnoh tăch vé, rnoh pơk mpông. Rnoh rgâl nau hao khlay vé bah ăp rmôt kan nchuăn rdeng rơh aơ tâm ban ma 15%.

            Tĭng N’gâng kan gung trong nchuăn rdeng bah Gia Lai, rmôt kan hŏ ndơn geh nau mbơh đă geh tât nau rgâl rnoh tăch vé bah ăp ntŭk ƀư nau kan tăch rgâl nchuăn rdeng năch tâm lam n’gor. Jêh geh nau ndơn, N’gâng kan hŏ geh nau đă ăp rmôt kan ƀư nchih lir ndrel sŏk rnoh tăch vé geh mbơh, nau kan rgâl rnoh tăch vé ân geh tâm du đah rnoh hao khlay bah rnoh dak pring xăng. Wa Nguyễn Bá Minh, Groi Kruanh jrâu kan ƀư nau kan Jrâu nchrăp kan-tơm prăk-nchuăn rdeng-N’gâng kan nchuăn rdeng n’gor Gia Lai mbơh:

            ‘Rnôk ndơn geh ăp nau mbơh đă kơp uănh bah ăp rmôt ƀư nau kan ri phung hên hŏ geh nau đă ăp rmôt kan ƀư nau nchih lir, rgum sŏk tâm di rnoh geh mbơh tĭng nau ntrŭnh. Nkre rđau ăp ntŭk ƀư nau kan nchuăn rdeng leo năch, rmôt ƀư nau kan tơm ân n’hao nau kan mêt uănh nau ƀư mbơh ndrel sŏk rnoh prăk hao ndeh bah ăp rmôt kan ân geh đăp mpăn tâm di nau ntrŭnh bah pháp luật ngih dak”./.

                                                Nŭih rblang: H’Thi

Tags:

Viết bình luận

TIN CÙNG CHUYÊN MỤC