Ôi aơ (17/6), ta Hà Nội, Học viện Chính trị quốc gia Hồ Chí Minh ƀư Đại hội tâm rlong rŏng dak tâl VI (2025-2030). Râng đại hội, Groi kruanh dak Võ Thị Ánh Xuân- Groi kruanh dak bôk năp Hội đồng tâm rlong nkhôm rnê Trung ương; ndrel 193 đại biểu – lah ăp nuĭh ntoh lư tâm trong leo tâm rlong rŏng dak lvang năm 2020-2025 bah Học viện n’hanh ăp nhih nti chính trị n’gor, nkual ƀon têh mpeh Trung ương râng Đại hội.

Lah ta rnôk ntơm pơk Đại hội, TS Nguyễn Duy Bắc, Groi Giám đốc Rnâng kan Học viện chính trị quốc gia Hồ Chí Minh an gĭt, Đại hội gay rƀŏng tât mbah rhơn Đại hội Đảng lam dak tâl XIV, Đại hội tâm rlong rŏng dak lam dak tâl XI, Đại hội Đảng bộ Học viện tâl XV năm kan 2025 – 2030. Tĭng ƀư nău ntĭm nti bah Kruanh Hồ Chí Minh dêh rŏng "Tâm rlong lah rŏng dak, rŏng dak lah ân tâm rlong” n’hanh “nău kan ăp nar lah jâng nsing bah tâm rlong”, ta nâm nău rđău kan bah Đảng, âk trong leo ƀư tâm rlong rŏng dak hŏ dơi rgŏ jă. Đảng n’hanh Ngih dak he way uănh khlay bah pah kan tâm rlong, nkhôm rnê, uănh aơ lah trong rđău đă bah Đảng, ndơ mât bôk kan Ngih dak n’hanh lah suan ntrôl ƀư wat jêh uĕh nău dơn kan chính trị.