Nar 23/4, ta Hà Nội, ƀư tâm nchră dak bah dih đah nkô̆ “50 năm Dơn ngoăy neh dak: Đah nău ƀư nta trong dơh bah tâm boh dak bah dih tâm kăl e n’hanh aƀaơ”. Lah ta rnôk tâm nchrră, Kruanh dak Lương Cường lah kloh: Lơh dơi 30/4/1975 rklaih luh lĕ rngôch miền Nam lah du nar dŭt khlay tâm lịch sử rnoi nuĭh Việt Nam. Tâm lơh dơi nê geh nău rgop têh kuâng bah n’gâng kan tâm boh dak bah dih Việt Nam.

Kruanh dak an lah, tâm boh dak bah dih hŏ rgum dơi nău tât kơl têh kuâng lĕ ma drăp ndơ n’hanh nuih n’hâm bah  ăp dak lam ntŭr neh, njêng trong leo dak bah dih têh kuâng n’grŏ tĭng rơh rlăch ndăng tâm di bah ƀon lan Việt Nam. Tâm lịch sử rôk năm 20, đêt geh rơh rlăch ndăng rnoi nuĭh I rgum dơi nău n’grŏ tĭng  lam hvi lĕ ma tâm n’hanh bah  dih dak kơt rnoi nuĭh Việt Nam. Ndrel đah nê, tâm boh dak bah dih hŏ tâm rgop kan nsum jôn rbăn, êt lhăt đah chŏl lor bah tahen n’hanh chính trị “nkre lơh, nkre tâm nchră”, bah nê geh nău dơi tĭng kơn, njêng jâng ntơm ndơ̆ n’gâng kan rlăch ndăng rklaih luh miền Nam, dơn ngoăy neh dak hăn tât nău dơi lam lĕ rngôch.