
VOV4.M'nông: Ôi 4/7, ta nâm nău ƀư tơm bah Thủ tướng Chính phủ Phạm Minh Chính, hŏ ntơm pơk tâm nchră pơk sŏng dăng Chính phủ đah ăp n'gor n'hanh rơh hop Chính phủ way ăp khay khay 6 năm 2022 mpeh nô nău wăng sa- rêh jêng kon nuĭh khay 6 n'hanh 6 khay năm 2022. Lah ta rơh tâm nchră, Thủ tướng Chính phủ Phạm Minh Chính an gĭt wăng sa rêh jêng kon nuĭh khay 6 n'hanh 6 khay bôk năm ntơr uĕh ta lĕ rngôch ăp trong kan, geh ndơ đăt ndal, njêng nău nkah uĕh.
Wăng sa têh đăp mpăn, hao khlay ndơ dơi kân bol geh âk suan mpet, lơn lah rnoh khlay pring xăng hao, ăp nău tâm rlak têh đăp mpăn sŏk dŏng prăk ngân sách, tăch n'gluh n'glăp, nău ŭch geh nuĭh kan, ŭnh nar n'hanh ndơ ngêt sa. Thủ tướng lah rjăp, nău dơi lah nơm geh nău rđău kan lĕ n'hâm suan bah Ban Chấp hành Trung ương Đảng, Bộ Chính trị, Ban Bí thư, mât bôk lah wa Tổng Bí thư Nguyễn Phú Trọng, ndrel ăp nău n'glêh an bah Ngih dak, tâm nê ăp Nghị quyết bah Quốc hội; nău rđău đă, ƀĭt juet lĕ n'hâm suan, geh nău rgum tơm bah Chính phủ, Thủ tướng Chính phủ, nău nsrôih bah lam trong kan chính trị ndrel mpôl doanh nghiệp, nău du nuih n'hâm, ŭch kơl bah ƀon lan lam dak n'hanh nău ntop kơl bah băl mpôl dak bah dih./.
Nuĭh rblang: Điểu Thân
Viết bình luận