
VOV4.M'nông: Kêng măng 1/7, tâm rnôk hăn pah kan ta Dak Lak, Thủ tướng Chính phủ Phạm Minh Chính hŏ tât khâl, pah kan, rgŏ jă cán bộ, tahen Bộ Chỉ huy Quân sự n'gor Dak Lak n'hanh Công an n'gor Dak Lak. Lah ta rơh pah kan, Thủ tướng đă Bộ chỉ huy Quân sự n'gor Dak Lak mbơh gĭt jru hvi, tĭng ƀư jăp nău way Đảng rđău kan, na nê̆, lam lĕ rngôch mpeh ăp ntil đah Tahen ƀon lan, tĭng jăp nău mât uănh bah Ngih dak, mât tâm boh dêh bên đah ƀon lan.
Ndrel đah nê, ân rƀah gĭt nô nău gay nsŏng kơl an gưl ủy Đảng, n'gâng kan, mô an geh ndrât ndal đah ăp nău tât; way nchrăp rdâng lơh ta rnoh dŭt têh, mât njrăng nâp đăp mpăn, ƀư tơm, lam lĕ rngôch neh dak, nău geh neh dak, rnoi nuĭh, mbra hăn tât ăp ntŭk kan, lôch jêh ăp nău kan ma Đảng n'hanh Ngih dak jao an. Thủ tướng đă gưl ủy, n'gâng kan ăp gưl uănh khlay tay, nta trong dơh an mpôl tahen ƀon lan, Công an ƀon lan ăp gưl tĭng ƀư jăp nău kan dơi jao./.
Nuĭh rblang: Điểu Thân
Viết bình luận