Ôi 2/6 ta Gia Lai, Tổng Bí thư Tô Lâm leo mpôl pah kan bah Trung ương tât khâl n’hanh ƀư tơm rơh pah kan đah Ban Thường vụ tỉnh uỷ Gia Lai n’hanh rnâng kan tỉnh uỷ Bình Định mpeh nô nău tĭng ƀư Nghị quyết Tâm nchră tâl 11 Ban Chấp hành Trung ương Đảng khoá 13 bah 2 n’gor.

Ta rơh pah kan, Tổng Bí thư Tô Lâm lah rjrăp, pah kan đah Ban thường vụ 2 n’gor Gia Lai n’hanh Bình Định lah nău nđơn tay ăp nău rđău đă rloh rlău gay pơk luh du rơh hun hao mhe an lĕ bar n’gor, lơn lah tâm rnôk nchrăp n’glăp nsum bar n’gor Gia Lai n’hanh Bình Định jêng du nhih pah kan- wăng sa dăng, têh mhe n’hanh nsĭt tay nău geh lơn. Lôch rnôk nchŏng kloh ăp săk geh ntoh lư bah 2 n’gor, Tổng Bí thư ŭch rŏng, ăp gưl ủy, n’gâng kan, lam trong kan chính trị n’hanh rmôt cán bộ bar n’gor ân gĭt êng ăp tŏng n’hanh ntik n’hao lĕ ăp ndơ tâm ban n’hanh ntop kơl trong nchrăp têh đah Gia Lai n’hanh Bình Định, uănh nê lah jâng ntơm khlay an nău tor luh trong hun hao bah n’gor lôch n’glăp nsum.