Kêng măng 10/6, ta Ngih Trung ương Đảng, Tổng Bí thư Tô Lâm lĕ wơt wa Alex Rogers, Kruanh ƀĭt rđău mât uănh lam ntŭr neh bah Tập đoàn Qualcomm (Hoa Kỳ). Tổng Bí thư uănh lah prêh ăp nău nchrăp ƀư ntuh kơl bah Qualcomm ta Việt Nam, rnê rhơn tập đoàn pơk hvi tay an ăp ntil nău kơt công nghệ mhe, nău mĭn njêng mhe, bán dẫn, ntŭk ntô kỹ thuật mrô.

Wa mpŏng Qualcomm mbra rgop ndơ̆ Việt Nam jêng ntŭk AI n’hanh bán dẫn bah nkual n’hanh lam ntŭr neh. Tổng Bí thư lah rjăp trong uănh hun hao neh dak tât năm 2030 n’hanh 2045, đah nău ŭch jêng dak geh prăk âk, công nghiệp mhe. Gay dơi geh nău rƀŏng aơ, Việt Nam lĕ an âk nghị quyết khlay, nta nơih an hun hao khoa học, công nghệ, ntrôl nău ƀư tơm nkual ƀư êng n’hanh wăch rgum ntuh kơl dak bah dih, lơn lah tâm ăp ntil nău công nghệ tơm.