Ƀon lan n’gor Long An đă n’gâng kan tuch tăm mât rong n’hanh hun hao ƀon lan, n’gâng kan tài nguyên- môi trường tâm ban kơt ăp n’gâng kan, ntŭk kan geh tât an geh mât uănh tay tât nău dak tiăt boh lăp ta ăp n’gor mpeh ba dâng. Bâh nĕ geh ăp nău kơl an na nê̆.

Tâm nău kan wăng sa nsum, ƀon lan n’gor Long An an gĭt, ta ntŭk dôl geh rdâk njêng ăp ntŭk kan ndrel mpeh tuch tăm mât rong gay ma njêng nău tâm rgop bâh nău pah kan mât đăp mpăn tât pĕ lêh, tăch rvăt, nkret ƀư lôch pe lêh.

Yơn lah nău kan bâh ntŭk kan ndrel mô tŏng dăng yor geh âk rnâng kan leo kan ndrel lah ƀon lan kan lŏ mir jêng lah mô dơi hun hao kơt nău knơm. Kơt nĕ, ăp n’gâng kan, ntŭk kan bâh Trung ương, ngăn lah n’gâng kan tuch tăm mât rong n’hanh hun hao ƀon lan an geh tay trong kan na nê̆ gay ma kơl an nău wăng sa ta ntŭk an ngăn ngên jêng ntŭk leo kan bôk năp bâh nău wăng sa tuch tăm, kơt nău mĭn bâh Quyết định 150 bâh Chính phủ lah rgâl nău mĭn bâh nău pah kan tuch tăm jêng mât nău wăng sa tuch tăm.

Tâm nău hun hao tuch tăm, wa Lê Văn Nam, ƀon lan ta nkuăl Bến Lức, n’gor Long An an lah, nău khlăy ngăn lah mbơh nău an tâm di ngăch ndăn mpeh ntŭk tăch rgâl tâm dak n’hanh dak bah dih. Mbơh leo nău kan ta ntŭk, wa Nam an gĭt, nkuăl Bến Lức geh 100 rbăn ha chanh mô găr. Nău kan tăch chanh an dak bah dih geh ƀư tĭng trong geh kan, tăch an ntŭk tăch rgâl châu Âu n’hanh Trung Đông. Yơn lah ăp HTX rvăt kanŭng lah ƀư tay ma ti..jêng ƀon lan kan lŏ mir mô gĭt mbơh rnoh khlăy.

 “Aơ lah nău mô dơi têh. Yor nĕ ma ƀon lan Long An lĕ geh ŭch pă tay âk nău mbơh gay ma geh gĭt ăp ntŭk tăch rgâl têh dak bah dih mbơh nĕ. Bâh nĕ nuĭh ƀon lan mbra geh leo kan tât dak bah dih an geh tâm mâp sŏng dăng gay ma dơi leo kan mpeh rnoh khlăy an ƀon lan”.

Tâm nău hun hao tuch tăm nkuăl têh đah ăp nău kan tuch tăm công nghệ mhe an geh rnoh prăk dŭt âk. Ntŭk kan tăčh rgâl tâm n’gâng kan tuch tăm an geh kơl prăk manh tĭng nău nchrăp kan khlăy bâh nkuăl ƀon têh. Ăp nău kan ndrel mpeh tuch tăm, nuĭh tơm mât leo ntŭk tuch tăm mât rong lĕ geh kơl mpeh prăk kon gay ma rgâl tơm tăm ntil rong, kon rong tĭng nău kan jê̆ n’hanh dah găp.

Nkuăl ƀon têh Hồ Chí Minh geh nău nchrăp mpŏng njêng nău tâm rgop ƀon lan kan lŏ mir, ntŭk kan ndrel n’hanh ntŭk tăch rgâl pă rnoh ndơ tuch tăm tĭng trong hun hao nău kan logistics tuch tăm. Nău kan apơ gay ma hun hao pah kan tăch rgâl, tăch rvăt ntil ndơ kơl an nău pah kan tuch tăm kơt: ndơ dŏng, phân poh, dak si mât tơm tăm, ndơ sinh học đah nkuăl ƀon têh Hồ Chí Minh n’hanh ăp ntŭk...Trong hăn aơ mbra kơl ƀư ueh tay nău kan tuch tăm bâh nkuăl ƀon têh Hồ Chí Minh n’hanh nkual mpeh ba dâng. Yơn lah ŭch hun hao tuch tăm nkuăl ƀon têh an geh rdâk njêng ta nkual neh tuch tăm, nău aơ aƀaơ dôl geh văk âk nău ntrŭnh ma nkuăl ƀon têh Hồ Chí Minh mô dơi doh rklaih. Wa Võ Hoàng Vũ, ƀon lan xã Hưng Long, nkuăl Bình Chánh, nkuăl ƀon têh Hồ Chí Minh dăn đă.

“Nuĭh ƀon lan dăn đă an geh rdâk njêng nău kan ta nkual neh tuch tăm, kơl an nău pah kan jan sa, dŏng công nghệ, kơt ngih mât prăp ndơ dŏng,  ngih bil ngih jal...nău kan aơ hôm nha geh kŏ văk mpeh sƀ kan geh tât rdâk njêng, mbra geh nău rgâl êng jêng tât ăp nău kan geh tih ƀư. Yor kơt nĕ ma nău ntrôl pah kan tuch tăm nkuăl ƀon têh dôl geh mâp âk nău jêr. An geh n’gâng kan tuch tăm, hun hao ƀon lan n’hanh ăp n’gâng kan geh tât geh trong kan doh rklaih gay ma ƀon lan nănh ƀư, đăp mpăn ntuh kơl an hun hao wăng sa tâm let năp tay”.

Ta rơh ôp nău kêng măng lơ 6/11, kruanh n’gâng kan tuch tăm mât rong n’hanh hun hao ƀon lan Lê Minh Hoan an lah, du đê̆ ƀon lan tăm bri ta nkual 2, nkual 3 ăp xã dŭt jêr jŏt n’hanh nkual ƀon lan rnoi đê̆ n’hanh gôl yôk. Na nê̆ lah ta n’gor Bắc Kạn n’hanh du đê̆ n’gor geh bri, i di lah geh dơn prăk nkhôm mât uănh bri, ta năm 2021, yơn tât aƀaơ ê hŏ geh dơn prăk. Ndrel đah nĕ, n’gâng kan dăn đă mpeh nău rgâl mhe 31 nău mpŏng kan nkual ƀon lan mhe an tâm di đah ăp ntŭk tơm bâh ăp nkual dŭt jêr.