Lĕ tât 70 năm deh yơn wa A Thiếu, rnoi Jrai ta ƀon Lung, xã Ya Xiêr, nkuăl  Sa Thầy, n’gor Kon Tum hôm nha hăn bôk năp tâm nău pah kan wăng sa.Wa an gĭt năm 2022 rnôk Đảng ủy xã geh Nghị quyết mpeh nău rgâl mhe tay mir tơm mô jêng, rnăk vâl wa dăn mbơh ƀư tĭng kơl an 20 tơm play đur n’hanh 50 tơm sầu riêng. Gay ma dơh mât chăm, wa geh rvăt tay 50 tơm sầu riêng n’hanh ƀư mhe trong tŏ dak mpêt nkrem. Tĭng wa A Thiếu, lah đảng viên rlău 30 năm đảng, wa hăn lor bôk năp n’hanh ƀư ueh gay ma ƀon lan ƀư tĭng.

“Gâp lah du hê Đảng viên, tât aƀaơ lĕ geh tât 30 năm Đảng, 70 năm deh, bâh ntơm Đảng ủy xã geh Nghị quyết mpeh nău rgâl mhe mir tơm mô jêng ntĭm rnăk vâl gâp tâm ban kơt rnăk êng tăm sầu riêng, mac ca gay ma rgâl mhe nău rêh, hun hao ƀon sâm geh, gâp lah du hê Đảng viên an geh hăn lor bôk năp gay ma ƀon lan kơt nti, ƀư tĭng, ƀư tĭng ăp trong kan nău kơl bâh Đảng n’hanh ngih dak, rnăk vâl i hôm nha jêr jŏt rĭ ta ntŭk mbra kơl an gay ma ƀon lan tăm sầu riêng n’hanh gĭt mpeh kĩ thuật mât tăm mhâm ƀư nsĭt tay nău geh đăp mpăn, đăp mpăn tâm nău rêh an ƀon lan”.

Xã Ya Xiêr, nkuăl Sa Thầy geh rlău 1.600 rnăk ƀon lan dŭt âk lah nuĭh rnoi đê̆. Gay ma nău rgâl mhe mir tơm mô jêng an geh nău dơi ngăn, Đảng ủy xã ntĭm đă ăp chi bộ tâm rgop đah cán bộ xã uănh nđôi lĕ ăp nău kan, nuĭh kan, tâm nĕ an nuĭh rnăk ach o, rnăk dơi kơl, rnăk rnoi đê̆ yơn an geh mât đăp mpăn tŏng geh nău dơi mpeh neh ntu n’hanh rnoh dak tŏ mhe geh kơl an ntil tơm tăm. Đah trong kan aơ tâm 3 năm ba năp xã Ya Xiêr lĕ rgŏ jă ƀon lan rgâl mhe geh rlău 54 ha mir tơm mô jêng rgâl tăm ăp ntil tơm sa play, dŭt âk lah sầu riêng. Wa Nguyễn Văn Hậu, groi kruanh UBND xã Ya Xiêr, an gĭt.

 “Geh dŭt âk mir tơm geh nău dơi n’hanh ăp nău kan ntoh lư geh xã leo kan an ƀon lan tât râng kơt nti nău kan. Lôch nĕ lah ăp rnăk ƀư ueh jăp nău kan ntĭm leo an ăp rnăk êng gay ma geh mât chăm an ueh lơn. Rlău ma nău kan rgŏ jă mbơh tơih nău gĭt vât nău mĭn bâh ƀon lan lĕ hao âk. Saơ geh rnoh khlăy wăng sa âk, ngih dak kơl an kơt nĕ, ntĭm nti kĩ thuật an na nê̆ ƀon lan dŭt mât uănh kơl an”.

Gay ma geh rnoh kơl tơm ntil tơm sa play an âk nuĭh ƀon lan ta 11 xã, nkuăl têh rgâl mhe tơm tăm mô jêng rgâl tăm tơm êng, nkuăl Sa Thầy lĕ rgum bâh âk rnoh kan. Kơp êng bâh năm 2023 tât aƀaơ bâh rnoh tâm rgop ta ntŭk rêh jêng bơi tât 2 rmen prăk, nkuăl rvăt rlău 15 rbăn tơm ntil sầu riêng n’hanh mắc ca kơl an ƀon lan. Ndrel đah nĕ n’gâng kan ta ntŭk lĕ tâm rgop ăp bôk nău kan, nău nchrăp kan gay ma tơm ntil tơm sa play kơl an ƀon lan rgâl mhe tơm tăm i mô jêng. Tâm 4 khay bôk năm 2024 geh 177 rnăk rnoi đê̆ tâm nkuăl geh rgâm tơm tăm 52 ha  gay ma tăm tơm sa play. Wa Nguyễn Thị Luyến, groi kruanh ntŭk kan tuch tăm mât rong n’hanh hun hao ƀon lan nkuăl Sa Thầy an gĭt:

 “Nkuăl lĕ geh mbơh tơih tâm ndrih âk bôk nău kan, nău nchrăp kan, ƀư ndrel đah âk rnoh prăk, bâh ăp nkô̆ nău kan ngih dak, prăk ntơm njêng nău kan wăng sa kơl an bâh ăp nău pah kan khuyến nông, ndơ̆ ăp nău kan ntil mhe mpeh kơl an ƀon lan, mât uănh na nê̆ tât ƀon lan rnoi đê̆. N’hao nău khlăy mpeh wăng sa an nuĭh ƀon lan ta nkuăl lĕ geh mbơh tơih rnoh neh tơm sầu riêng dŭt âk, ƀon lan an geh rhơn ƀư tĭng n’hanh mât chăm ueh”.

Lôch 3 năm mbơh tơih bôk nău kan 07 mpeh rgâl mhe rgâl mhe mir tơm tăm, nkuăl Sa Thầy lĕ geh nău rgâl mhe tơm khlăy tâm nău hun hao rnoh neh tơm sa play. Rgum đê̆ jêng âk mpưm, lah kơt lĕ rnoh neh tơm sa play bâh nkuăl ta dŭt năm 2020 mhe geh 285 ha rĭ tât dŭt năm 2023 Sa Thầy lĕ hun hao geh bơi tât 1.600ha, tâm nĕ êng Sầu riêng rlău 660ha. Wa Nguyễn Minh Tuấn, Bí thư nkuăl Ủy Sa Thầy, lah na nê̆.

 “Đah ƀon lan nuĭh rnoi đê̆ tât râng rgâl mhe mir tơm tăm ta nkuăl, ngăn lah tât râng ta nău kan tăm tơm sa play ntơm saơ bôk năp lah dŭt geh săk rnglăy n’hanh nuĭh ƀon lan aƀaơ dăn ƀư dŭt âk. Năm 2025 geh mbơh tơih tay mpeh ntil tơm tăm rgâl mhe mir tơm mô jêng bâh nĕ ƀư an ƀon lan rgâl nău mĭn, trong kan hun hao ƀư sâm geh”.

Ndrel đah nău ntrŭnh rgâl mhe mir tơm mô jêng, kơl an, ntĭm an ƀon lan tăm tơm sa play hun hao wăng sa rêh jêng rnăk vâl, nkuăl Ủy Sa Thầy lĕ geh ăp nău ntĭm đă na nê̆ gay ma n’hao nău geh nău dơi n’hanh nău khlăy ta mir tơm. Tât aƀaơ nkuăl lĕ geh 2 rnăk geh pă rnoh mbrô tăm sầu riêng đah rnoh neh rlău 31ha. Nău tâm tăm tơm sa play geh ƀư tĭng trong kloh ueh, nâp nâl. Mpeh jŏ jong, n’gâng kan ta nkuăl Sa Thầy dôl jă ăp doanh nghiệp ntuh kơl rdâk ƀư ngih máy nkret ƀư play bum gay ma njêng nău tâm rgop nkiret ƀư, n’hanh tăch rvăt.