Yuh Nguyễn Thủy Triều, Chánh văn phòng-Tổng thư ký Hiệp hội Cà phê Buôn Ma Thuột, n’gor Dak Lak an gĭt, Hiệp hội cà phê Buôn Ma Thuột aƀaơ dôl dŏng n’ăp website, trang mạng xã hội, lăp rmôt chat bah nsum mpôl cà phê kah Việt Nam, geh tài khoản mrô ta trang thông tin bah Ntŭk uĕh kah cà phê Lam ntŭr neh, jêng nău mbơh dơi lăp joi, mkra tĭng mông tĭng mnĭt, djôt tât an nuĭh dơi geh râng ăp rơh tâm rlong n’hanh mpla nsơ lam ntŭr neh. Ăp bôk nău kan ndrel mĭn njêng, n’hanh ăp jrô ntĭm nti ntơm bôk năp tât jru jêr, kơl cà phê Việt Nam jêng dơi ƀư lôch jêh uĕh kah âk. Yuh Nguyễn Thủy Triều lah:

Hiệp hội Cà phê Buôn Ma Thuột geh du nsum mpôl dŭt âk, geh tŏng ăp gưl. Ăp rơh geh du săk rnglăy mĭn njêng mpeh cà phê mô lah kơp dơn mpeh cà phê ri khân pơng njuăl tât an hiệp hội gay uănh mĭn tay, njuăl tât an nsum mpôl. Mô lah geh ăp nău mbơh khlay ri nuĭh kan mbra nkoch dâl an hiệp hội gĭt ngăch ngăn. Lah he joi ta ntŭk nsum mpôl mạng ri dŭt jŏt, đê̆ đŏng mô saơ.

Bah năm 2007, rnôk rgâl mrô hôm e đêt dơi gĭt tât, sinh viên-nuĭh ƀon lan Nguyên Công Thịnh ta nkual ƀon têh Đà Lạt, n’gor Lâm Đồng, lĕ dơi ƀư du website way mpeh cà phê, uănh joi rnoh khlay cà phê bah ăp ntŭk tăch lam ntŭr neh, jêng rƀŭn nchră n’gŭr răm n’hanh uĕh. Tât aƀaơ, Tây Nguyên lĕ geh tay lơ âk n’gâng tơm mrô dơi dŏng săk rnglăy, n’ăp tâm nkra njêng, tăch rgâl, tâm rgop n’hanh ntĭm nti. Đah nô Đặng Công Kiên, Giám đốc HTX lŏ mir Kiên Thảo Phát, ta nkual têh n’har bri Ngọc Hồi, n’gor Kon Tum, rgâl mrô lơ mât uĕh nău khlay rnôk jêng ndơ gay ndâk ƀư ăp nsum mpôl mrô ndrel nău mĭn trong hăn. Lôch jêh bah ăp ntŭk tăm sầu riêng, cà phê hữu cơ bah HTX, ăp ndơ ndŏk nja vi sinh ma HTX dơi nkra njêng êng, knơm râng nsum mpôl mrô mpeh lŏ mir uĕh ngăn.

Gâp râng lăp nsum mpôl lŏ mir uĕh ngăn ngên n’hanh jêh nĕ dơi nti du jrô mpeh Organic yor ăp nai nuĭh Úc ntĭm tâm 6 khay online. Bah nău nti nĕ gâp lĕ kơt dŏng gay ƀư geh ăp ndơ uĕh kah âk. Hợp tác xã bah gâp geh chế phẩm sinh học dŏng an lŏ mir, dŏng an nkret njêng ndơ lŏ mir n’hanh rao ndơ. Jêh nĕ hợp tác xã geh ăp ndơ kơt cà phê, sầu riêng. Ăp ntil dak si ri dơi tăm ta nâm tơm si gay ƀư trà.

Rgâl mrô lŏ mir ta Tây Nguyên aƀaơ tĭng tay trong hăn jru rnôk geh tay ăp kơt dŏng mrô way rhŏ an lŏ mir Việt Nam, kơt AutoAgri, MobiAgri, VNPTGreen... Dôl kơl ăp hợp tác xã sầu riêng ta nkuăl Krông Pắc, n’gor Dak Lak mbơh ƀư kơt dŏng VNPT GREEN, Thạc sĩ Nguyễn Lê Anh Dũng, Giám đốc Trung tâm Công nghệ thông tin (VNPT Dak Lak) an gĭt:

Rlău ma kơt dŏng an ăp ntŭk tuch tăm n’hanh hợp tác xã, VNPT dôl mbơh ƀư pih gơ̆ lŏ mir mrô AIMS, ntop kơl mât uănh lĕ rngôch bah ntil tât tuch tăm-mât njrăng pih gơ̆, mât rong-thú y, tui ka, hun hao thôn ƀon tât mât uănh uĕh lŏ mir si glê tui ka.

Mpôl hên dôl hui tât tĭng ntŭk gay ndâk njêng geh rmôt mom, wât mpeh công nghệ gay ndrel râng n’hanh hăn ndrel tâm nău ƀư dữ liệu an pih gơ̆ mrô ma mpôl hên dôl ƀư ta ntŭk. Tât năm 2030, mbra dơi ndơ̆ dữ liệu lĕ ƀư tâm nău ngăn.

Ta rƀŭn nchră Ntrŭt ngăch ntuh kơl an nău kan lŏ mir, thôn ƀon nkual Tây Nguyên mhe dơi ƀư ta n’gor Gia Lai, Kruanh N’gâng kan tuch tăm mât rong n’hanh hun hao lŏ mir Lê Minh Hoan lah rjăp, Tây Nguyên n’hanh ăp ngih pah kan bah N’gâng kan, ndrel ăp doanh nghiệp... an dŏng ăp jâng mrô gay tâm rgop săk rnglăy lơn, kơl lŏ mir bah nkual hun hao lĕ rngôch n’ăp bri, tuch tăm n’hanh mât rong, geh tât lŏ mir âk nău khlay kơt đă n’gluh an tâm Nghị quyết 23 năm 2022 bah Bộ Chính trị:

Gâp đă Gia Lai, Kon Tum, Dak Lak, Dak Nông, Lâm Đồng ƀư du rơh rƀŭn gay pă an âk lơn tay ntŭk ntô wăch rgum ntuh kơl an nău kan lĕ mir, rgum âk nău khlay mô geh êng nău khlay tay. Aơ lah Nghị quyết bah Đảng hôm. Aƀaơ geh ntŭk ntô mhe hôm, lam ntŭr neh di hôm, geh âk trong gay he tâm rgop ndrel. Khlay ngăn lah nău rƀŏng he dơi geh.

Tâm rnôk rgâl mrô dôl geh âk, rgop tĭng nuĭh, doanh nghiệp, hiệp hội nău kan ta Tây Nguyên (ngăn lah tâm nău kan lŏ mir) uănh kloh ăp dơi an geh sŏk săk hao tât, nsrôih rdâk njêng lôch uĕh.