Lơ 17/11, nkhêp di râng rƀŭn nchră gưl prêh G20 ta nkual ƀon têh Rio de Janeiro, Thủ tướng Chính phủ Phạm Minh Chính lĕ geh rơh rgum nchră đah Tổng thống Brasil, Luiz Inácio Lula da Silva. Thủ tướng chính phủ mĭn lah tâm boh Việt Nam-Brasil tât aƀaơ rgum 5 nău tâm ban, ntop tay tơm khlay, geh: nău mĭn tâm ban, nsing nơm; geh văn hóa dăch deh; geh jâng wăng sa ntop kơl n’hanh tâm ntrôl nsum; geh nsum mpŏng ŭch đăp mpăn hao têh dăng.

Thủ tướng Chính phủ uănh lah tĭng nkô̆ nău tâm ban nĕ, tâm boh Việt Nam-Brasil năm bah năp lĕ geh njoat hun hao uĕh ta ăp ntil nău, tâm nĕ geh 2 dak ƀa ƀơ tâm rgâl mpôl gưl prêh n’hanh ăp gưl, wăng sa-ntuh kơl hao jêng nâp nâl, nkre, 2 ding tâm rgop rjăp ta ăp rƀŭn nchră âk ding. Nkoch nău tâm ban ŭch đah ăp nău uănh lah bah Thủ tướng Chính phủ Phạm Minh Chính, Tổng thống Lula da Silva tâm ban ŭch mbra tâm rgop mbơh ƀư ăp trong n’hao lơn tay bah tâm boh 2 dak năm tât, geh n’hao tâm rgâl rmôt kan n’hanh ntrŭt ăp gưl, lơn lah ta gưl prêh; tâm rgop mbơh ƀư săk rnglăy ăp sam ƀŭt kan ndrel lĕ ký.