Ơi yuh Thị Hà Ri Na, dơi gĭt, yuh hŏ ndâk ntŭk n’gon ndrănh yăng ntoh lư bah nkuăl, hŏ geh pă săm ƀŭt kơp dơn OCOP 3 sao. Ndri ndrănh yăng ntŭk yuh mhâm nau geh leo nsĭt săk geh văng sa ân rnăk vâl êh?

            Yuh Thị Hà Ri Na: Gâp lah du hê Đảng viên, tâm du rmôt bah bu ur ƀon Bu Za Rah. Rnăk hên mô ƀư mir, mô geh tăm tiêu, tăm cà phê ôh ri ma gâp pơk ntŭk n’gon ndrănh yăng gay ma hun hao văng sa ân rnăk vâl, tâm rgop ma rmôt ƀon lan kan lŏ mir tâm ƀon gay pă kan pah ân kônh wa tâm ƀon geh prăk đăp mpăn lơn ndrel mât nau vay ơm bah rnoi nơm.

            Nau mĭn bôk năp gay yuh ndrel băl mpôl n’hao nau ŭch pơk ntŭk n’gon ndrănh gay ma kơl an ƀon lan tâm ntŭk ndrel ma bu năch ri mhâm yuh?

            Yuh Thị Hà Ri Na: Nau mĭn bôk năp ma gâp mhe pơk ntŭk n’gon ndrăng knŭng ŭch mât nau ơm bah rnoi nơm dơm. Ŭch mât nau ƀư n’gon ndrănh ndrel nau n’gon ndrănh yăng bah ơm bah rnoi Buong bah păng roh hêng, kŏ kơt lah mbơh ăp nau ntil ndơ sa kah bah rnoi Bunong, ăp ndơ sa geh tă bah bri, bah ơm nê lah n’ha byăp, ndjêl...gay ma gĭt tât âk lơn.

            Năm 2024, văng sa, rêh jêng bah n’gor Dk Nông lah êng, neh dak nơm lah nsum hun hao đăp mpăn, nau kan tuch tăm geh nơih, nau geh jêng hao prêh, ăp nau aơ moh gehnau tât ueh ma nau tăch rgâl bah yuh đŏng lah mô?

            Yuh Thị Hà Ri Na: Năm aơ ndơ tuch tăm lah nsum ri geh rnoh da dê, tiêu, cà phê rnoh hao khlay ri ma ndănh yănh hên kŏ geh âk đŏng bu rvăt, năm aơ geh âk ntŭk bu rvăt tâm rnôk dŭt năm aơ.

Nau n’gon ndrăng yăng kŏ lah du nau kan tăch rgâl ndơ ơm, păng moh geh nau êng ma ndơ êng ndrel nơm moh nau ƀư ngăn tâm nê?

Yuh Thị Hà Ri Na: Nau n’gon ndrănh yăng ri nơm ân njrăng ngăn lah kah, tal 2 lah nơm ân n’gon ma ndrui nơm ƀư bah Bunong nơm, mât ân ueh nau kah, mô dơi rlu, ndri ndrănh ân kah, tâm di ngăn ri nơm geh âk nŭih năch rvăt ndrel ma plŏ rvăt ndrănh nơm./.

            Tâm năm mhe, yuh moh geh nau nchrăp ân nau hun hao nau kan bah nơm, ngăn lah nau kan mhe dôl ma geh hun hao nau kan tăch rgâl?

            Yuh Thị Hà Ri Na: Tâm năm 2025 gâp ŭch pơk hvi tay nau kan n’gon ndrănh yăng đah nau ŭch lah ndrănh yăng bah nơm geh bu năch tâm ndrel bah dih n’gor bu gĭt tât, êng nê hên hôm lŏ n’hao nau nkoch trêng, ntơm bah ăp trong mạng xã hội Facebok, Zalo...gay ân ndrănh yăng nơm geh ăp nŭih bu gĭt tât âk lơn ndrel tă bah trong mạng xã hội mra geh tay âk nŭih bu rvăt đŏng. Di rnôk năm mhe 2025 gâp dăn njoăl tât dĭng lĕ ƀon lan dăch ngai du năm mhe săk dăng lăng ngăch ndrel pah kan jan sa geh jêng lơn.

           Ơ, lah ueh yuh, rhơn ân yuh du năm mhe geh âk nau dơi mhe./.