Tâm rnôk Tết Nguyên đán Ất Tỵ, ndrel đah âk nău kan văn hóa, njroh mprơ khuh n’gôr, n’gor Dak Lak mbra ƀư pănh pháo kao ta 5 ntŭk lah nkual ƀon têh Buôn Ma Thuột n’hanh ăp nkuâl Ea H’Leo, Krông Buk, Krông Ana, Ea Kar.

Ăp nău kan văn hóa, njroh mprơ, lễ hội mbra ƀư du bông Tết ta âk ntŭk tâm n’gor Dak Lak, kơt: Nar rgum văn hóa ăp rnoi mpôl đê̆ nkuâl Ea Kar n’hanh tâm rlong duk bêh nhŭk nhăk, duk Kayak ta nkuâl dja (ntơm bah 4 - 6 Tết); Tâm rlong duk way ơm nkuâl Krông Ana (nar 7 Tết); Lễ hội văn hóa way ơm Việt Bắc ta nkuâl Krông Năng (ntơm bah nar 13 - 15 khay ngoăy); Tâm rlong tâm nhăt way ơm nkuâl Krông Pắk pơk hvi n’hanh tâm nđŭr njroh mprơ quan họ (ntơm 15 - 17 khay ngoăy). Lơn lah, tâm măng giao thừa, ta Quảng trường 10/3, nkual ƀon têh Buôn Ma Thuột ƀư bôk nău kan njroh mprơ “Rhơn Đảng rsang chrang, rhơn năm mhe Ất Tỵ năm 2025” n’hanh pănh pháo kao dêh. Nkre, ta nklang ăp nkuâl Ea H’Leo, Krông Buk, Krông Ana n’hanh Ea Kar ƀư bôk nău kan njroh mprơ n’hanh ƀư pănh pháo kao rhŏ dŏng ƀon lan bah năp mông giao thừa đŏng.