Tết Nguyên đán Ất Tỵ 2025 dăch tât, suan rvăt bah nuĭh dŏng ndơ way hao âk. Gay tŏng nău ŭch geh dja, aƀaơ ăp doanh nghiệp dôl nsrôih ƀư njêng ndơ tăch an năch, ăp ntŭk tăch chrai ndơ lor nchrăp ăp trong ƀư ăp tŏng tơm ndơ tăch, nchrăp ndơ tăch rhŏ dŏng tết, lơn lah ăp ntil ndơ dŏng sa khlay. 

Nchrăp an nău ŭch geh ndơ rvăt ndơ Tết an nuĭh dŏng, Công ty Cổ phần Bánh mứt kẹo Hà Nội (Hanobaco) nchrăp ndơ tăch tết năm 2025 ơm bah năm e nơh. Tĭng nê, rnoh âk mpeh mứt tết, bánh kẹo tết… hao 10%, đah bơi 350 tấn mứt, 100 tấn bánh kẹo. Ndrel hăn nuĭh rvăt dŏng, ntŭk tăch hŏ n’hao âk ndơ tăch dŏng Tết đah rnoh ndơ kah uĕh n’hanh đah rnoh khlay tâm di, săk ntô âk ntil. Wa Lê Ngọc Huy, Kruanh jrô kan tăch rgâl, Công ty Cổ phần Bánh mứt kẹo Hà Nội an gĭt, tâm rnôk ƀư njêng, công ty way tĭng lhăt jăp ăp quy định mpeh srăch uĕh ndơ sa gay nsĭt an dŭt kah uĕh an nuĭh dŏng sa. Ndrel đah nê, ndơ rhŏ dŏng tết dơi doanh nghiệp uănh khlay ƀô kah bah ăp nkual:

Mpôl hên geh ăp ndơ ƀư uĕh mhe lơn mô lah tâm lăp nsum bah pe mpeh. Nê lah ăp hộp mứt ma mpôl hên an tâm ăp ndơ geh ƀư lĕ 3 mpeh Bắc- Trung – Nam ăp ntil mứt geh 12 ntil ƀô kah; bah meng ăp ndơ ƀô kah way ơm kơt: tuh neh, cha, cà rốt… ri geh tay lĕ ma ăp ndơ ƀô kah dâu ndrŭng brai, ƀô mãng cầu, play đŭr, sầu riêng… Tĭng nê ŭch rŏng nsĭt tay âk ntil an nuĭh rlong sa, tâm ban kơt  mpeh nău âk ntil an ndơ geh ƀư gay nuĭh rvăt dŏng geh tay trong sơch.

Tâm rnôk dja, âk doanh nghiệp tâm trong kan ndơ ngêt, sa nchrăp ăp tŏng tơm ndơ tăch đŏng, rnoh âk dŏng an nău ŭch geh ndơ rvăt năp Tết bah ƀon lan. Wa  Trương Mạnh Linh, Giám đốc mât bôk kan phe ba bah Tập đoàn Tân Long an gĭt, rnôk dja hŏ bêng lhăt siƀŭt dăn rvăt quý 1/2025. Bah meng tăch n’gluh, doanh nghiệp hŏ nchrăp du rnoh phe âk gay rhŏ dŏng Tết Nguyên đán, đah rnoh âk hao mbrơi tĭng ăp năm đŏng n’hanh hŏ geh trong nchrăp rnă ntêm dŭt uĕh dŏng an nuĭh rvăt wơt tết Ất Tỵ 2025:

Mpôl hên way rnă ntêm lor tơm ndơ gay tŏng an nău ŭch geh ndơ rvăt tâm dak, ma trong pâr n’hanh ntêm phe tâm ntŭk uĕh răm, gay đăp mpăn kah uĕh phe dơi mât dŭt jŏ an ntŭk tăch rgâl tâm dak, đăp mpăn geh tŏng ndơ rvăt tâm rnôk  Tết.

Gay ăp tŏng dŭt uĕh khay rvăt năp dŭt têh tâm năm, ăp ntŭk tơm tăch ndơ sa khlay hŏ nchrăp ƀư njêng lôch jêh mpeh tơm ndơ tăch đŏng. Ăp ntŭk tâm pă tăch, tơm ndơ tăch khlay lor nchrăp buăt nthoi, mât dŏng ăp ndơ tuch tăm, puăch ka, ndơ ngêt, ăp ndơ tăch way ơm bah ăp n’gor, âk mpưm ntil ndơ tăch (an lor đah ndơ tăch Việt Nam) rhŏ dŏng an nău ŭch geh ndơ rvăt dŏng kêng dŭt năm, bah năp, tâm n’hanh bah kơi Tết Nguyên đán. Wa Trương Sỹ Bá, Kruanh HĐQT Công ty cổ phần Nông nghiệp BAF Việt Nam an gĭt, đah puăch sŭr doanh nhiệp geh nău nchrăp na nê̆, mât rơ̆ ơm gay tŏng geh ndơ dŏng sa tâm rnôk Tết Nguyên đán 2025:

Tết năm aơ mpôl hên mbra n’gluh ntŭk tăch 1,1 tât 1,2 rkeh mblâm, đah rnoh âk rlău bar tơ̆. Ndrel đah nău n’hao rơ̆ âk bah doanh nghiệp ndrel ăp công ty mât rong êng ƀa ƀă đŏng, mbra rgop n’hao geh âk tơm puăch sŭr tăch bah dih… Ntơm bah nê mbra tŏng geh nău ŭch rvăt bah nuĭh dŏng sa.

Tĭng wa Nguyễn Kiều Oanh, Groi Giám đốc Sở Công Thương Hà Nội, rnôk tết dja nkual ƀon têh hŏ geh nău nchrăp tŏng ăp tơm ndơ tăch, tâm ban kơt ăp ntil ndơ tăch đăp mpăn săk kah uĕh rhŏ dŏng an nuĭh ƀon lan ta nkual ƀon têh – bah năp Tết nguyên đán 3 khay. Ndrel đah nê, ƀư âk ntŭk tăch ndơ ăp tŏng ndơ tăch, rnoh khlay đăp mpăn rhŏ dŏng an nuĭh ƀon lan; an ƀư ăp bôk nău kan n’hŭch rnoh khlay gay ntrŭt nsôr nuĭh dŏng ndơ, mô an geh tăch pruăt ndơ tăch, ntrôl rnoh khlay hao:

 Mpôl hên hŏ pah kan đah ăp mpôl tâm pă tăch ăp nuĭh tăch rgâl tâm ban kơt ăp rnăk tăch chrai, ăp chợ way ơm gay rƀah gĭt nău ŭch geh ndơ rvăt tâm ban kơt tŏng tơm ndơ tăch an nuĭh ƀon lan rvăt năp tâm rnôk Tết năm aơ. Mpôl hên lah rjăp đŏng mbra ƀư jăp nău dơn kan bah he gay bah huăt tơm ndơ tăch tâm ban kơt ăp ndơ tăch ta Hà Nội đăp mpăn săk kah đŏng.

Gay đăp mpăn tâm ban geh tăch rvăt ăp ntil ndơ dŏng sa khlay, đăp mpăn ntŭk tăch rgâl rnôk Tết Nguyên đán Ất Tỵ năm 2025; Bộ Công Thương đă Sở Công Thương ăp n’gor, nkual ƀon têh mpeh Trung ương tĭng groi nđôi lhăt ntŭk tăch rgâl, tăch rvăt ăp ndơ dŏng khlay, lor nchrăp joi trong mô lah dăn đă đah ăp nhih pah kan dơi kan trong nkra tâm ban geh ntŭk tăch rgâl, mô an geh nău pah pât ndơ tăch, tăch pruăt tơm ndơ tăch ƀư jêng hao khlay ndal ndơ tăch tâm kêng dŭt năm n’hanh Tết Nguyên đán.

Ndrel đah nê, lor nchrăp ăp tơm ndơ tăch, rnă ntêm ndơ tăch dŏng an Tết; an ƀư ăp trong nkra đăp mpăn rnoh khlay ntŭk tăch rgâl tĭng di quy định bah pháp luật. Nkre, ntrôl dăng an ƀư ăp nău kan tĭng ƀư Rơh rgŏ jă “Nuĭh Việt Nam an dŏng lor ndơ Việt Nam”, Bôk nău kan n’hao ndơ Việt tât thôn ƀon, tât nkual, rkŭm công nghiệp nkre đah ăp bôk nău kan hội chợ, n’hŭch rnoh khlay, ntrŭt ntrôl dŏng rvăt âk ndơ. N’hao dăng nău kan hăn ôp uănh, groi nđôi ntŭk tăch rgâl, ôp uănh mpeh rnoh khlay, săk kah uĕh ndơ geh ƀư, ăp quy định mpeh đăp mpăn kloh uĕh ndơ sa, ăp nău tih nkrâm ndơ, ndranh ndơ tăch, n’hao rnoh khlay ndơ mô tâm di./.