Hợp tác xã Ea Tân, nkuăl Krông Năng, n’gor Đăk Lăk geh 220 rnăk tâm rgop tăm cà phê đah lĕ rnoh neh rlău 330ha. Wa Nguyễn Trí Thắng, Giám đốc HTX an gĭt, ŭch n’hao rnoh khlăy nău wăng sa rĭ an geh tâm rgop pah kan tĭng nău kan têh gay ma bah ir hoach prăk pah kan, njêng rnoh ndơ tâm ban ueh đah ăp nău mpŏng kan, nău kơp dơn ta lam ntur neh.

“Rnoh khlăy rvăt rĭ hợp tác xã way geh rvăt khlăy lơn đah rnoh tăch ndơ ta ntŭk tăch rgâk n’hanh hợp tác xã hôm nha geh kơl an ăp nuĭh kan ndrel mpeh kĩ thuật nkret ƀư n’hanh tâm rgop rvăt tay cà phê ueh săk geh. Lôch 4-5 năm rĭ geh âk nuĭh kan ndrel lĕ geh rgâl nău wăng sa rêh jêng rnăk vâl n’hanh khlăy ngăn lah geh đăp mpăn”.

Ntrôl tâm rgop ta nău pah kan jan sa, tăch rgâl ntil ndơ geh ƀư ăp nău pă ndơ sông sa đăp mpăn lah trong kan mà công ty TNHH MTV tăch rvăt ndơ 2-9 Đăk Lăk (Simexco Đăk Lăk) dôl geh njêng ăp nău dơi ta ntŭk tăch rgâl. Tât râng ta nău tâm rgop, ƀon lan kan lŏ mir geh doanh nghiệp ntuh kơl ntil, tơm tăm ndơ dŏng tuch tăm gay ma đăp mpăn pah kan jan sa n’hanh geh rvăt ndơ đah rnoh đăp mpăn. Wa Lê Đức Huy, Tổng Giám đốc Simexco Đăk Lăk an gĭt, bâh geh tâm rgop, doanh nghiệp lĕ leo kan geh rnoh ndơ ueh săk rnglăy.

“Dơn kan n’hanh nău mĭn bâh nuĭh ƀon lan kan lŏ mir n’hanh nuĭh ƀon lan jêng ăp nău tâm kơl nsum. Nuĭh ƀon lan jêng ăp doanh nhân tuch tăm. Rnôk geh nău mĭn kơt nĕ nuĭh ƀon lan kan lŏ mir pah kan dŭt ueh. Nĕ lah nău nâp nâl gay ma ăp công ty ndơ̆ mbơh ndơ tuch tăm bâh nơm tât ta lam ntur neh”.

Lam n’gor Đăk Lăk aƀaơ geh rlău 470 hợp tác xã pah kan ta trong kan tuch tăm, tâm nĕ geh klâp ma 150 hợp tác xã tât râng nău tâm rgop pah kan jan sa drăp ndơ. Wa Huỳnh Bài, Kruanh rmôt kan ndrel HTX n’gor Đăk Lăk an gĭt, dŭt âk ăp nău tâm rgop kan dôl rgum ta ăp ntil ndơ kan tơm kơt cà phê, tiu, phe ba, ăp ntil tơm sa play..Nău tâm rgop kan ndrel lĕ geh ndâk nsơm nău kan nchrah nchrai, kan đê̆, ndơ̆ ndơ pah kan tĭng trong rgum, an tâm di đah nău ŭch ta ntŭk tăch rgâl.

 “ Tă geh njoat gĭt dăch đah rnoh kan aơ gay ma mpŏng ntĭm mbơh HTX tâm ban kơt ăp rnăk vâl tâm rgop đah ăp doanh nghiệp an na nê̆ lơn gay ma mât đăp mpăn mpeh nău pah kan tâm ban kơt nău ueh ntil ndơ geh ƀư”.

Tĭng nău mbơh bâh wa Nguyễn Hoài Dương, Giám đốc ntŭk kan tuch tăm mât rong n’hanh hun hao ƀon lan n’gor Đăk Lăk, tâm rnôk rnoh khlăy ndơ tuch tăm mô rlu rgâl rĭ nău tâm rgop pah kan tâm nău kan tuch tăm lĕ jêng nău geh khlăy. N’gâng kan tuch tăm dôl kuăl jă ntuh kơl rdâk ƀư ăp nău tâm rgop ta nău pah kan tăch rvăt ăp ntil ndơ geh ƀư, ngăn lah đah ăp ntil tơm tăm khlăy tơm ta n’gor.

 “Hun ao ăp nkual pah kan rgum nsum, n’hao nău dơi geh bâh ăp nkual gay ma ntrôl nău pah kan jan sa tĭng nău tâm rgop tâm kơl an geh âk nuĭh ntuh kơl dơi tât ăp nkual tuch tăm nkual ƀon lan gay ma tâm rgop pah kan tăch rvăt ndơ geh ƀư n’hanh ngăn lah ntrôl nkra ƀư ndơ tuch tăm njêng nău khlăy n’hao rnoh geh n’hanh tăch rvăt ndơ geh tuch tăm đăp mpăn an nuĭh ƀon lan”.

Đah nău kan du nuih n’hâm bâh ƀon lan kan lŏ mir, hợp tác xã, doanh nghiệp n’hanh n’gâng kan, âk nău kan tâm rgop pah kan ta Đăk Lăk dôl geh n’hao săk rnglăy pah kan. Aơ mô dơn lah nău mbơh rblang an nău kan jêr rklaih đah đăp mpăn ntŭk tăch rgâl ma hôm nha lah mpông pơk lăp gay ma n’hao nău khlăy ndơ geh ƀư. Nău tâm rgop kan đah ƀon lan kan lŏ mir, hợp tác xã n’hanh doanh nghiệp mô dơn geh njêng nău hun hao ueh ta rnoh khlăy ndơ ma hôm nha lah trong kan gay ma pah kan tuch tăm rlet rlău ăp nău ntul rlong bâh ntŭk tăch rgâl, mpong tât du n’gâng kan tuch tăm nâp nâl.