Tâm jay nkra njêng bah Hợp tác xã lŏ mir dịch vụ công bằng Ea Tu, giám đốc Trần Đình Trọng uănh nđôi na nê̆ tay tĭng thùng ndơ cà phê rlăi lor rnôk njuăl tât ndrâm dak lêng tăch n’gluh hăn Mỹ. Êp nĕ, 2 nuĭh pah kan dôl ngăch ty uănh tĭng ntil ndơ, tâl dŭng cà phê môi gay jao tĭng sam ƀŭt ndơ năch rwăt tă bah mạng internet. Rep uĕh dŭng ndơ, wa H’Ban B’Tô, ta ƀon Ko Tam, xă Ea Tu, nkual ƀon têh Buôn Ma Thuột, an gĭt, du nar kan ta jay nkra njêng mbra dơi trok nar luh 250.000 prăk. Hôm ăp nar, wa kơt ăp nuĭh êng bah hợp tác xã rgum mât chăm mir cà phê an uĕh. Wa H’Ban B’Tô răm rhơn nkoch:

Gâp pah kan tâm hợp tác xã aơ bah năm 2015. Gâp ƀư tĭng kỹ thuật ma hợp tác xã ntĭm. Cà phê rnăk wâl gâp mô âk yơn dơi khlay jêng nău rêh rnăk wâl đăp mpăn.

Nău rêh đăp mpăn bah nuĭh Êđê rnôk râng hợp tác xã lah nău saơ kloh, rnôk rnăk wâl geh prăk mbơm oi knơm nkra njêng cà phê tĭng di uĕh kah. Yuh H’Moan Êban, kruanh rmôt nkra njêng mrô 2, an gĭt, cà phê bah wa ƀư geh rnôk tăch an hợp tác xã Ea Tu dơi ntop tay 3-4 rbăn prăk du kg nkôp đah rnoh khlay ntŭk tăch. Ăp năm, kônh wa na nao dơi tiăr nti kỹ thuật, bah nkoch ngơi tât djôt ty ntĭm nău kan ta mir. Ăp prăk bôk năp kơt phân poh, dak si tu ndrŭng... yor hợp tác xã pă an, n’hanh nuĭh kan ƀư mât chăm cà phê tĭng nar khay na nê̆ gay uănh nđôi uĕh jêng. Yuh H’Moan Êban lah mpeh nău mât chăm mir tơm lvang aơ.

Jêh pĕ lêh ăp nuĭh an mât chăm, koh n’ging n’hanh koh koh chông tiêu. Geh âk tơm nking nar ri cà phê mô săk geh jêng gâp an ƀư kloh. Jêng gâp an kơt dŏng kỹ thuật bah bôk năp. Rnôk pĕ lêh tăch an hợp tác xã, cà phê dŭm 85-90% rnoh khlay lơn 3-4 rbăn prăk/kg, yơn cà phê an geh uĕh kah âk.

Cà phê geh uĕh kah âk lah nău ƀư jêng lôch uĕh an Hợp tác xã lŏ mir dịch vụ công bằng Ea Tu, ntŭk geh rlău 90% nuĭh lah nuĭh ƀon lan rnoi mpôl đêt. Giám đốc hợp tác xã, wa Trần Đình Trọng an gĭt, ndâk njêng 10 năm bah năp, bah 49 nuĭh ƀok năp, hợp tác xã lĕ ngăch hun hao tay 260 nuĭh tâm rgop, nkra njêng cà phê uĕh kah ân ta dĭng lĕ rnoh neh rlău 300ha. Bah meng nău tâm rgop đah doanh nghiệp Đăk Man jêng trong kan nkra cà phê tăch n’gluh, hợp tác xã hôm nkra njêng êng cà phê môi tăch ta ăp ntŭk tăch điện tử, n’hanh ƀư cà phê kah êng. Mhe aơ, cà phê uĕh kah âk bah Ea Tu lĕ dơi tăch n’gluh tât dak Mỹ, dơi geh nău ơh uĕh đah ăp sam ƀŭt nchăm ndơ bah kơi.

Mô rlu n’hao khlay bah grăp cà phê, aƀaơ hợp tác xã dôl mbơh ƀư mât tăm 19 ha cà phê hữu cơ, geh nău rblang uĕh neh na nê̆ bah doanh nghiệp kan ndrel. Wa Trần Đình Trọng nkoch, hợp tác xã ŭch pơk hvi rnoh neh cà phê hữu cơ lam xă Ea Tu:

Lah du ƀon ƀư cà phê hữu cơ jêr yơn ƀư lĕ xă dơh lơn. Ƀư âk dơh lơn ƀư đêt yor ƀư âk ri lam nkual aơ đăp mpăn da dê. Nĕ lah hợp tác xã mpŏng ŭch kơt nĕ, yor lah ƀư ma klach mâp jêr jŏt ri ndâk tât mư dơi ƀư. Kơt rnôk mhe ndâk njêng hợp tác xã, gâp lah kônh wa tăm srah cà phê, tiêu, sầu riêng. Rnôk tăm srah hôm ri đăp mpăn, sŏk tơm ri ntop kơl an tơm aơ, jêng du trong sinh thái, dŭt đăp mpăn wăng sa.

Lah mpeh nău blău ơm rgum kônh wa rnoi mpôl đêt ndrel ƀư tâm hợp tác xã, wa Trần Đình Trọng an lah, an nchăm nău geh nsum yơn ndrel đah nău geh êng du hê ro mư nâp nâl. Kônh wa blău tăm hôm e đêt, yơn dơh lah geh nău tâm rgop nsum mpôl dŭt âk. Ntĭm kloh ăp nău geh na nê̆ rnôk nkra njêng tĭng trong, nsrôih rgŏ jă, ntĭm, ăp nuĭh hợp tác xã lĕ gĭt ndrel ƀư luh ăp grăp cà phê uĕh kah hao prêh lam ntŭr neh.

Lơ 11/12/2024, ndơ Ea Tu cafe dơi moh săk ta Ƀư ntô̆ n’hao ndơ ntoh lư bah hợp tác xã n’hanh an ndơ nkhôm Mai An Tiêm rơh bôk năp năm 2024, yor Liên minh hợp tác xã Việt Nam ƀư. Ndơ nkhôm Mai An Tiêm lah ndơ nkhôm tâm di đah kônh wa nuĭh Êđê ta Hợp tác xã Ea Tu, ntô̆ n’hao săk rnglăy pah kan mĭn njêng mhe bah nuĭh ƀon lan ta nkual neh âk cà phê Buôn Ma Thuôt, rƀŏng tât hun hao nâp nâl yor du ntŭr neh uĕh lăng lơn.