Bol ma lĕ tă gĭt rlău jât năm tăm kao mai êr, yơn nô Lê Niê Minh Quân, ta xã Cư Êbua, nkuăl ƀon têh Buôn Ma Thuột, n’gor Đăk Lăk hôm nha dŭt mĭn rvê ngăn an yan kao năm aơ yor lah trôk nđik n’hanh sial âk. Gay ma bah ir geh nău khuch khat yor trôk nar ƀư an tơm mai, nô Quân lĕ ntêm âk mông nar uănh nđôi, rgâl nău mât gay ma njêng luh ăp kao mai ueh ngăn. Nô Quân an gĭt.

 “ Aƀaơ dôl lah rơh uănh nđôi n’hanh mât chăm an luh mblom gay ma dơi geh ăp kao ueh ngăn gay ma âk nuĭh ŭch n’hanh rvăt âk lơn”.

Ndrel đah mai, đào, cúc đại đóa lĕ geh âk rnăk vâl ta Đăk Lăk săch pâl ta rơh tết. Ăp gri kao cúc đại đóa geh nău têh 1met 2 tât 1m5 lĕ geh ntơm njêng lôch rlău 5 khay jur ntil. Ta rnôk aơ dơi geh uănh lah dŭt khlăy ngăn gay ma ntrŭnh mbơh nău geh dơi tâm ban kơt rnoh khlăy tăch bâh kao. Yor nĕ, ăp rnăk vâl tăm kao cúc đại đóa kơl an rơh Tết tâm ban kơt nô Nguyễn Thanh Hùng, xã Cư Ebua, nkuăl ƀon têh Buôn Ma Thuột, n’gor Đăk Lăk an geh mât chăm an ueh lơn. Tă ăp n’ha kro, hoănh, tă ăp mblom kao mô dang mbra geh nô tỗh jăng lơi, an geh âk nău kah an ăp kao si têh ueh lơn. Nô Nguyễn Thanh Hùng nkoch.

 “ Lvang aơ lah rơh nglâ̆ dŭt jêng lah nuĭh ƀư mât tăm an geh bư na nê̆, He geh mât chăm kao mhâm ƀư an n’ha păng ueh ngăn, kao an kloh, ueh bah bu tuh gay ma kao an ueh ngăn tât ti nuĭh dŏng. Nuĭh dŏng geh du rơh tết an geh âk mău ueh”.

Ta ƀon kao Khánh Xuân, phường Khánh Xuân, nkuăl ƀon têh Buôn Ma Thuột, n’gor Đăk Lăk, bâh bôk khay 9-10 âm lịch, ăp ntŭk tăm lĕ jur ntil tăm ăp ntil kao gleh nar kơt: Cúc mâm xôi, cục vạn thọ, phong lữ thảo... gay ma ngăch tăch an ntŭk tăch rgâl ta rơh tết Nguyên đán. Wa Phạm Thị Kiều Diễm, ntŭk tăm kao Hà Mi, phường Khánh Xuân an gĭt, năm aơ, wa jur ntil 2 rbăn gri kao cúc mâm xôi. Bôl ma trôk nar mô ueh yơn đah nău tă gĭt mât tăm âk năm, tât aƀaơ, ăp gri kao hôm nha hao jêng ueh, mbra an tâm di đah nău ŭch dŏng kao tết. Wa Diễm mĭn ŭch ta rơh dăch tết Nguyên đán ta ntŭk tăch rgâl mbra geh ueh tay lơn n’hanh nsĭt nău geh wăng sa đăp mpăn an nuĭh tăm kao.

 “Tăm tâm ban kơt ăp năm đŏng mô geh đê̆ mô lah âk lơn. Tăch ta ntŭk tăch rgâl lah rnoh khlăy tâm ban kơt ăp năm. Uănh nsum lah rnoh năch tât lĕ geh âk ngăn. Khân păng hăn uănh kao lôch ne rvăt dơm. Ntŭk tăm lĕ geh ŭch năch tât đah ntŭk tăm kao ri ntŭk tăm kao geh tăch âk kao lơn”.

Bol ma geh mâp âk nău jêr jŏt yor trôk nar mô ueh lăng, yơn lah nuĭh mât tăm kao ta Đăk Lăk hôm nha dŭt nsrôih n’hanh geh nău mĭn ueh. Bâh mpang ti dŭt gơih blău bâh nuĭh tăm kao mbra geh ƀư ăp ntil kao ueh ngăn, âk mău ntơr an ueh ăp rnăk vâl ta rơh tết sĭt năm mhe tât.