Aơ lah ƀon mhe geh njêng tay bâh nuĭh Xơ Đăng n’hanh lah ƀon pâl nđaih ntŭk rêh jêng bôk năp ta nkual tăm sâm Ngọc Linh Kon Tum. N’hao nău dơi geh ntŭk pah kan ueh nđik, ta nkual tăm sâm Ngọc Linh Kon Tum, nuĭh ƀon lan Tu Thó ndrel đah du đê̆ nuĭh ntuh kơl lĕ njêng ntŭk homstay, rdâk tăm âk ntŭk kao si, tơm si ueh, njêng rmôt tŭr chĭng-njroh xoang, ndwo ngêt sông kơl an năch pâl nđaih. Năm mhe nơh, ƀon Tu Thó geh vơt 5 rbăn năch pâl nđaih. Ta rơh mbơh tơih nău ntrŭnh bâh ủy ban nhân dân n’gor Kon Tum kơp dơn ƀon mhe njêng tay Tu Thó, xã Tê Xăng lah ƀon pâl nđaih ntŭk rêh jêng, Ủy ban nhân dân nkuăl Tu Mơ Rông ƀư tăch đah rnoh khlăy 1kg sâm Ngọc Linh, kơl an ƀon lan ƀư ngih jong vơt năch pâl nđaih. Di rơh aơ ntŭk kan văn hóa, thể thao n’hanh pâl nđaih Kon Tum lĕ pă an nuĭh ƀon lan Tu Thó du bor chĭng khlăy pơk rơh nkhêp mhe gay ma hun hao pâl nđaih n’hanh mât rbăy nău way ueh êng bâh nuĭh Xơ Đăng.