Măng 26/12, ta Nkual ƀon têh Gia Nghĩa, UBND n’gor Dak Nông ƀư Nar wơt dơn săk ntơ Công viên địa chất lam ntŭr neh UNESCO Dak Nông tâl 2. Khay 7 năm 2020, Công viên địa chất Dak Nông dơi UNESCO kơp dơn lah Công viên địa chất lam ntŭr neh. Lôch 4 năm, Công viên địa chất Dak Nông wơt dơn săk ntơ dja tâl bar.

Dơi sơm săk lah "Tơm me bah ăp nău nteh", Công viên địa chất lam ntŭr neh UNESCO Dak Nông hŏ năl di ntŭk gŭ khlay ta bản đồ drăp ndơ ơm yău lam ntŭr neh, rgop mpư n’hao ăp rnoh khlay bri dak neh ntu, văn hóa n’hanh ndơ gŭ rêh uĕh êng bah nkual neh Tây Nguyên. Nău plơ̆ kơp dơn tay săk ntơ têh khlay dja lah n’gâng ntơm khlay, mô dơn kơl Dak Nông rdâk nâp tay trong hun hao nâp dăng ma hôm rgop uĕh tâm nău tĭng ƀư jêng ngăn ngăn ăp rnoh tât hun hao nâp jong bah bôk nău kan nchrăp lor ta rnôk tâm nchră năm 2030 tă Liên Hiệp Quốc ndơ̆ luh. Tâm nê, ntrŭt nsôr nău mât ndray bri dak mpêt khlay, ntrŭt ntrôl hun hao wăng sa – rêh jêng kon nuĭh nsing ta nău tâm ban lăp uĕh đah bri dak n’hanh văn hóa way ơm.