Wa Cao Thị Nỷ, ta thôn Suối Cá, xă Khánh Trung, nkuăl Khánh Vĩnh mhe trơn gŭ tâm jay mhe ndơn an jay kđar truh sat ơm. Ur sai wa Nỷ mô geh neh tuch tăm, hăn kan bu tĭng yan, kon se geh kop ji, tâm rnăk ach o ta xă Khánh Trung. Bah năm 2023, du đảng viên lah cán bộ tơm xă Khánh Trung dơi Đảng ủy xă pă kơl rnăk wa Nỷ hao rklaih luh ach o. Wa Nỷ dơi đảng viên ap nta an hăn nti sơ cấp nău kan nkret gâm, dơi ntop kơl 60 rkeh prăk ndâk ƀư jay mhe. Jêh nti nău kan, rlău ma tăch ndơ, wa Nỷ hôm dơi nkoch mbơh ƀư mât rong kon se ta ngih sam ƀŭt tâm xă, jay mhe hvi rlău 40 mét vuông dơi ndâk ƀư jêh rnăk wâl đăp mpăn gŭ âm. Wa Cao Thị Nỷ nkoch:

Ur sai gâp geh nău rêh jêr jŏt, nsrôih ƀư gay mât kon bah kơi kop ji, hôm ndơ̆ mon hăn rek tay. Mpeh Mặt trận Tổ quốc xã ntop kơl jay gŭ an gâp, dơi hăn nti nău kan ntop tay gay blău tăch tơr. Lĕ geh jay, geh nău kan, mpôl hên mbra nsrôih rklaih luh ach o.

Đảng bộ xă Khánh Trung, nkuăl Khánh Vĩnh, Khánh Hòa geh rlău 100 đảng viên, mô hôm đảng viên geh tâm rnăk ach o. Xă geh bơi 90% ƀon lan rnoi mpôl đêt, nău rêh hôm e âk jêr jŏt. Đảng ủy xă lĕ rgŏ jă lĕ trong chính trị ndrel ty kơl ăp rnăk ach o, êp ach o. Ăp năm Đảng ủy xă geh nghị quyết tâm pă đảng viên ntop kơl rnăk ach o rklaih luh ach o. Tĭng kơp uănh, uănh ăp rnoh ndơ ƀư rnăk ach o, Đảng ủy xă pă tĭng đảng viên na nê̆. Wa Cao Thị Thanh, Bí thư Đảng ủy xă Khánh Trung, nkuăl Khánh Vĩnh, Khánh Hòa an gĭt, năm 2024, xă lĕ geh rlău 90 rnăk ƀon lan rklaih ach o, tâm nĕ, đảng viên lĕ rgŏ jă jŭt jăng geh 11 mlâm jay sat kơl kônh wa.

Du hê đảng an geh đêt ngăn 1 ntrong ƀư ntop kơl rnăk ach o, mư jêh nău kan. N’hêl na nê̆, jay bah Prăk nkrem MTTQ mô di khân pơng an lĕ rngôch rnăk ach o lĕ lam nkuăl ôh, an uănh, săch. Yor nê, đảng viên an hăn rgŏ jă dăn jay an kônh wa. Đảng viên geh ndơ prăk kaih, kỹ thuật ƀa ƀơ tât ăp rnăk ach o ntĭm mât rong, tuch tăm. Nuĭh jêr jŏt lơn ri an manh kon ntil gay mât rong, rgŏ jă bah ăp jay ntop kơl an du kôp sŭr, bê, ntil ndrôk dŭt uĕh đŏng.

Ăp năm bah năp, âk đảng viên nuĭh rnoi mpôl đêt ta n’gor Khánh Hòa lĕ mât uĕh ƀư tơm, ntrong leo lor tâm nău kan, n’hao lĕ nău kan “đảng viên hăn lor, ƀon lan tĭng bah kơi”. Tâm nĕ, âk đảng viên lĕ n’hao nuih n’hâm lĕ nău kan, ntrong leo lor, hăn lor tâm hun hao wăng sa, jŭt n’hŭch ach o, ndâk njêng nău rêh văn hóa, đăp mpăn rnă njrăng, đăp mpăn ta bah dâng. Wa Trần Thị Việt, nuĭh geh nsing nơm ntoh lư, 69 năm deh, Bí thư Chi bộ thôn Hòn Dù, xă Khánh Nam, nkuăl Khánh Vĩnh an gĭt, âk năm bah năp, rnăk wâl wa hăn lor tăm tao, ƀư ba lŏ, ntĭm nti oh kon têh jêng. Bah meng nĕ, rnăk wâl wa ƀư hăn lor tâm ntŭk gŭ rêh kơt ƀư tĭng uĕh nău kơl rnoh nuĭh, mô tih gŭ ur sŏk sai ơm, ntop kơl ăp rnăk mâp jêr jŏt hun hao.

An geh nău nsing nơm tâm ntŭk gŭ rêh, nkre kơl an kônh wa jêng lah nuĭh hăn rgum rƀŭn, nsing nơm lơn, rhơn lơn. Khân pơng dơi lăp đảng ntô̆ n’hao lah đảng viên, gĭt nu nău gay ƀư sa, hun hao wăng sa rnăk wâl, rklaih ach o, mât rong oh kon jêng nuĭh kon uĕh.

Bah bôk năp kan tât lĕ năm 2024, Đảng bộ nkuăl Khánh Sơn, n’gor Khánh Hòa lĕ nglăp 353 đảng viên, rlău rnoh an ƀư Nghị quyết Đại hội Đảng bộ nkuăl n’gluh an, n’hao rnoh đảng viên tâm lam đảng bộ nkuăl rlău 1.600 đảng viên. Tâm nĕ, đảng viên nuĭh rnoi mpôl đêt geh bơi 50%. Wa Bùi Hoài Nam, Bí thư Nkuăl ủy Khánh Sơn an gĭt, âk bu ranh ƀon, nuĭh geh nsing nơm rnoi mpôl đêt lah đảng viên da dê. Ăp nuĭh aơ mât uĕh nău hăn lor, ntrong leo ƀư tĭng uĕh ăp nău ntrŭnh, trong hăn bah Đảng n’hanh nău kơl bah bah pháp luật bâh Ngih dak kơt hun hao wăng sa, jŭt n’hŭch ach o.

Đảng viên lah ăp nuĭh bu ranh, kruanh thôn geh nău ngơi dŭt khlay, lĕ nkoch mbơh ngăch ăp nău ntrŭnh, nău kơl bah đảng, ndrel ntop kơl hun hao, ntop kơl rklaih ach o. Kônh wa tâm ntŭk gŭ rêh saơ nău ƀư tơm bah đảng viên, bah nĕ, geh nău nsrôih, mpŏng ŭch dâk tâm rmôt bah Đảng, nsơr an tay, hao ƀư ndrŏng tâm di ta ƀon tơm Khánh Sơn.