Ôi nđaơ (26/12) Thủ tướng Chính phủ Phạm Minh Chính râng rƀŭn nchră Công an lam dak rơh tal 80 n’hanh n’glôch jêh 40 năm trong kan công an rhŏ an nău kan rgâl mhe bah neh dak. Ntoh ngơi ta rƀŭn nchră, Thủ tướng lah rjăp, Rƀŭn nchră Công an lam đak năm aơ geh nkô̆ khlay, n’gâng tơm lịch sử 80 năm ndâk njêng, njrăng n’gang, têh jêng n’hanh hun hao bah rmôt Công an nhân dân.

Năm 2025 nchroh mbơh âk jêr jŏt lơn, nău kan n’gluh an jâk lơn, nkre an njrăng n’gang ƀư dơi ăp nău rƀŏng rnă njrăng mât njrăng bri dak n’hanh wăng sa rêh jêng bah lĕ năm aơ; nkre an ƀư dăp rmôt kan ƀĭt joet; ƀư lôch uĕh đại hội đảng bộ ăp gưl hăn tât Đại hội Đảng lam dak rơh tal 14; ƀư ăp nar lễ têh bah neh dak; nta n’hâm soan rgâl hao ngăch an neh dak hao jêng 2 mrô tâm năm 2025. Thủ tướng lah rjăp, Rmôt công an an ƀư đah nău ngơi “Hăn lor, leo lor, hao ngăch, rgâl mhe ƀư dơi ăp nău ntrŭnh bah Đảng, pháp luật neh dak, ndâk njêng rmôt Công an ƀon lan ngăn ngên kloh uĕh, nâp dăng, chính quy, tinh nhuệ, hao mhe”.