Kêng măng nar 23/12 ta nkual ƀon têh Buôn Ma Thuột, Cục Di sản Văn hóa (Bộ Văn hóa, Thể thao n’hanh Pâl nđaih) ƀư Tâm nchră n’glôch jêh, pla n’hơ, nchreng an uănh trong ntĭt leo buăt nthoi drăp ndơ ơm yău ntlơi an tay “Ntŭk văn hóa chĭng gong Tây Nguyên tâm njăr trong hăn pâl nđaih drăp ndơ ơm yău ntlơi an tay Buôn Ma Thuột – Dak Lak”. Trong ntĭt leo lah ngoăy tâm ăp nău kan tĭng ƀư nău dơn kan bah trong nchrăp 6 tâm trôm bôk nău kan gưl neh dak hun hao wăng sa, rêh jêng kon nuĭh nkual ƀon lan rnoi mpôl đê̆ n’hanh mpeh yôk yang, lvang năm 2021- 2030.

Râng trong ntĭt leo, đah nău ntĭm nti bah ăp nuĭh kan mbơh nău lư n’hanh rnôk trêng nti tay tâm ƀon lan, ăp nuĭh râng nti dơi tât ăp nău blău tŭr goh chĭng gong bah ntơm tât hăr blău, nkra di ăp nău tih way mâp tâm rnôk tŭr goh chĭng gong, joi gĭt tay du đêt nău chĭng yău bah nuĭh Rđe. Ăp nuĭh râng nti dơi ntĭm nti na nê̆ nău hăr blău photovoice – dŏng rup gui gay nkoch ăp nău nkoch mpeh văn hóa rnoi nuĭh. Trong ntĭt leo kơl nuĭh ƀon lan gĭt kloh lơn mpeh rnoh khlay drăp ndơ ơm yău ntlơi an tay ma he dôl mât prăp, ntop n’hao tay n’hanh nđơn trêng tay ntŭk văn hóa chĭng gong Tây Nguyên; Nta trong dơh gay drăp ndơ ơm yău văn hóa chĭng gong jêng tơm suan ntrôl an pâl nđaih, buăt nthoi nsum mpôl n’hanh njêng trong hăn pâl nđaih drăp ndơ ơm yău ntlơi an tay. Lôch nkual ƀon têh Buôn Ma Thuột, Sở mbra an ƀư tay, pơk hvi ta ăp nkuâl gay njêng rêng tâm nkrêp ăp njăr trong hăn drăp ndơ ơm yău ntlơi an tay ta Dak Lak.