Ntŭk ơm yău Rossi ta trong Trần Hưng Đạo, phường Đạt Hiếu, nkuăl têh Buôn Hồ, lah ngoăy tâm rnoh ăp đồn điền tăm cà phê n’hanh cao su yor nuĭh Pháp njêng ta Đăk Lăk ta năm 1926. Aơ lah ntŭk têl mpeh nău kan cách mạng ta Tây Nguyên ta 2 rơh tâm lơh tâm su bâh mpôl rnoi. Ngăn lah ta rơh tâm lơh mprơh Mỹ, ta Đồn điện Rossi lĕ geh hun hao jêng 1 rmôt kan Đảng, du chi đoàn mom ndăm n’hanh du ntŭk du kích đah 16 nuĭh tât râng. Nuĭh kan n’hanh tơm đồn điền Rossi lĕ kơl pă an, pă ndơ sông sa, phao blêu an cách mạng, kơl an Ban Kinh Tài bâh n’gor Đăk Lăk rgâl rvăt rhiăng tấn drăp ndơ gay ma nchoăn rdeng ta nkual gŭ bâh n’gor.

Bâh năm 2018, Đồn điền Rossi lĕ geh UBND n’gor Đăk Lăk pă dăp Di tích lịch sử gâl n’gor. Aƀaơ ta aơ hôm nha geh nău kan ƀư ngih jay gŭ n’hanh pah kan bâh tơm đồn điền, ntu dak, ngih ŭnh, ntŭk prăp ndơ, ntŭk ngâr dak hôm nha kơt ơm ƀư bôk năp. Gay ma nkra tay, n’hao nău khlăy ntŭk ơm yău Đồn điền Rossi an năch pâl nđaih, Tiến sĩ Lương Thanh Sơn, tă ƀư Giám đốc bảo tàng Đăk Lăk an lah, an geh nău uănh năl lĕ rngôch đah ntŭk ơm yău aơ. Wa bu ur Lương Thanh Sơn ngơi.

 “Mpôl he kanŭng geh mât uănh tât jay bâh tơm đồn điền ma ê hŏ mât uănh tât ăp jay jong bâh nuĭh pah kan nuĭh Rđe ta aơ. Lĕ ma nkual văr aơ lah ăp nuĭh pah kan lĕ tă geh ât duh ât mih gay ma ƀư cà phê ta đồn điền aơ. Kơt nĕ rĭ ta dăch đồn điền Rossi mơh geh ƀon, dĭng hôm geh âk jay jong, nĕ lah du gâl bâh đồn điền, mô dơi uănh dơm ta đồn điền nĕ, mơh lơh dĭng he mô tâm rgop ta nĕ gay ma ndơ̆ năch pâl nđaih tât”.

Aƀaơ n’gâng kan ta ntŭk dôl geh joi trong gay ma nkra mhe, ryơk nkra n’hao ueh tay ntŭk ơm yău Đồn điền Rossi nkre lah nău kan mbơh tơih, mbơh ƀư nău pâl nđaih...wa Y Cing Mlô, groi kruanh UBND nkuăl têh Buôn Hồ an gĭt.

"Lôch tă nkra mhe rĭ nkuăl têh mbra geh rgŏ jă pă an ăp ntil ndơ ơm yău gay ma pla n’hơ, ndâk nsơm tay, rdâk ƀư tay nău pâl nđaih ndrel đah ăp ntŭk pâl nđaih êng. Lĕ geh mbơh dăn đah n’gor ndơ̆ nkual di tích aơ jêng ngoăy tâm âk ntŭk tât bâh năch pâl nđaih. Mpôl hên mbra geh ntĭm đă ăp n’gâng kan, ngăn lah tâm n’gâng kan ntĭm nti mbra geh săch ntŭk aơ lah ngoăy tâm âk ntŭk tât ueh gay ma ƀư leo ăp nău pah kan bah dih gay ma ntĭm nti nău way ơm , n’hao nău khlăy lịch sử bâh ntŭk ơm yău aơ.