Tĭng nau vay bah rnoi Jrai, jêh rnôk khĭt, huêng hôm ơm, đah nŭih rêh ndrel nŭih khĭt hôm geh tâm văk. Ndri ma, ăp nar, bu nŭih rêh hôm hăn tât ta môch, mpih, rep ân kloh ndrel leo piăng tâm môch. Jêh âk khay, nau kan aơ knŭng lôch jêh rnôk bu ƀư lơi môch. Gay ma njêng chiak bŏk tâm rnôk lơi môch, kơt lah huêng chiak, bu săch ăpntŭk neh bŏk ueh ndrel pot tâm lam săk. Bu ƀư lơn ma mhị, lơn ma klach, lơn ma kơt chiak ri lơn ma ueh. Tâm rnôk lơi môch ri ân geh chiak bŏk. Yuh Siu Thỏi, rnoi Jrai, rêh tâm xã Ia Mơ Nông, nkuăl Chư Păh, n’gor Gia Lai, mbơh:

            ‘Tĭng nau vay bah rnoi Jrai ri rnôk lơi môch ân geh chiak bŏk. Sŏk bŏk pot tâm muh măt ƀư jêng chiak bŏk”.

            Rnoi Jrai ân lah, ăp Bram lah ăp huêng bu nŭih khĭt mleh, mât ân nŭih khĭt bah ma geh chiak janh lơi, mô lah huêng bah nŭih khĭt sĭt, nsum ngêt sa ma ƀon lan êp môch. Yuh Rơ Châm H’Xuyết, rnoi Krai, rêh tâm xã Ia Mơ Nông, nkuăl Chư Păh, n’gor Gia Lai, ngơi:

            ‘Bư njêng chiak bŏk tâm rnôk bu ƀư lơi môch. Rnôk bu ƀư chiak bŏk ri bu mpôn moh muh măt, mpôn moh săk. Bu njêng jêng chiak bŏk bu pot bŏk tâm mặt mô lah nkŭm ma mặt nă ƀư ma tơm prit gay nkŭm lơi măt nŭih geh pot bŏk. Chiak bŏk ntoh mhô ân nŭih khĭt đah nŭih hôm rêh”.

            Nŭih geh săch ƀư Bram ân lah nŭih hôm dăng n’hâm soan, geh bu rnơm. Njêng ân blau, ueh, mhâm ƀư ân bu mô hôm năl ôh nơm, lah bu năl nơm ri ăp chiak bŏk nê mô jêh ôh nau kan ndrel geh chiak dê nhŭp.

            Yuh Rơ Châm Hà, rnoi Jrai, tâm xã Ia Mơ Nông, nkuăl Chư Păh, n’gor Gia Lai, mbơh:

            ‘Chiak bŏk vay ntoh tâm rnôk bu lơi môch ma ăp nar dơm ri mô geh ôh. Knŭng bu klô dơm dơi ƀư chiak bŏk mô geh ôh bu ur ƀư chiak bŏk. Vay ri geh bu rêh ndrel kon se ƀư chiak bŏk, nsing tâm nau đă, nau săch bah nŭih tơm ngih lơi môch. Kăl e nơh nŭih ƀư chiak bŏk ân geh vêr âk ngăn. Nŭih ƀư chiak bŏk ân geh ur hŏ roh mô lah ê geh ur mơ”.

            Ăp Bram mro geh bu ryơk, ân geh phung tur chĭng hăn vơt tă bah ntŭk pot bŏk tât tâm ntŭk môch. Jêh rnôk ƀư chiak bŏk tâm môch, ăp Bram sĭt ma nau rêh nâm ơm. Ăp nŭih ƀư chiak bŏk ndrel ƀon lan kŏ ngêt sa, njroh mprơ, tâm nkoch bri đŏng. Yuh H’Uyên Niê, Groi Kruanh bu ur xã Ia Mơ Nông, mbơh:

            ‘Bram ntoh rnôk lơi môch, nar dơm dam mô geh. Bram ntit kơt lah huêng nŭih lĕ khĭt, bu sĭt ngêt sa, rhơn nar dăch dŭt. Kơt kah jêh nar nê, bu mô hôm geh leo piăng tât môch bu nŭih khĭt ôh. Bram lah ăp kon nŭih ngăn ngên bu pot neh njêng huêng chiak. Chiak bŏk dơi hăn tâm nkoch bri, hăn tâm ăp ngih môch gay ma tâm nkoch bri đŏng ma băl mpôl nơm, rnăk nơm du tŏ dăch dŭt nê gay ma bu hăn đah ri bri phan”.

            Rnoi Jrai ân lah, nŭih khĭt ndrel bu rêh hôm geh tâm boh. Ƀư njêng chiak bŏk tâm rnôk lơi môch ntoh nau nkah, klâng ma nŭih hôm rêh ndrel nŭih khĭt. Bu ŭch huêng bah nŭih khĭt ân geh kơl, trêng uănh ân bu nŭih hôm rêh, ƀon lan geh nau rêh ueh lăng, hơm tăm, đăp mpăn./.