Hôm mât ndray âk rup uĕh văn hóa ntĭt êng bah ƀon lan Thái, nkre đah bri dak rup uĕh măt uănh, bản Khá, xã Sập Vạt, nkuâl Yên Châu (Sơn La) hŏ n’hanh dôl dơi ntuh kơl gay hun hao trong ntĭt leo pâl nđaih nsum mpôl ntĭt leo lor nkre đah rdâk njêng ƀon  lan mhe. Aơ lah ngoăy tâm ăp ntŭk tât uĕh đah năch ta njăr trong hăn uănh pâl Sơn La – Tây Bắc.

        Bản Khá gŭ dăch kêng njăr trong Quốc lộ 6, ngai đah thị trấn Yên Châu, nkuâl Yên Châu bơi 10 km mpeh Hà Nội. Bản geh rlău 90 rnăk, rlău 420 nuĭh, kơt lah bơi 100% nuĭh Thái gŭ rêh. Hăn tât đah bản Khá, năch pâl nđaih mbra gân djiăng tâm ntŭk gŭ rêh rngân uĕh, bri dak ơm bah du ƀon Thái kăl e, đah lĕ rngôch ăp rnăk gŭ tâm ăp năk ŭnh kalơ jay rot ơm yău da dê, wăr nê lah mir play wai, tơm me ơm yău n’glu n’hâm, geh n’hong dak me Vạt hoch wăr...

Wa Quàng Văn Phanh, 80 năm deh, nuĭh bản Khá an gĭt, kônh wa tâm bản aƀaơ dôl nha hôm mât ndray n’hanh ntik n’hao âk rup uĕh văn hóa ntĭt êng bah ƀon lan Thái, kơt nău mprơ, nchreng an uănh ndơ uh goh rnoi mpôl đê̆; mât ăp nău kan ƀư ma ti way ơm, cheh tanh bok brai, cheh ndrang bok păn rƀay, tanh ăp ndơ dŏng rêh ăp nar, ndrel  ăp lễ hội way ơm geh nkô̆ khlay mpŏng n’hâm suan, du năm mhe mih lăng prăng uĕh, mbo ba jŭr geh.

Ăp năm tât nar 10 lah ân ôp mpih 1 tơ̆. Ôp mpih an nuĭh ƀon lan ngăch dăng, wăng sa hao geh; mir ba jŭr geh; ndrôk rpu rơ̆ jêng, mô geh khĭt rŭng.

Ntơm bah ăp nău dơh uĕh, săk geh ơm ta ntŭk, nkuâl Yên Châu hŏ an ƀư Đề án hun hao trong pâl nđaih ƀon lan ta bản Khá; trong tor gĭt lor rdâk njêng ndơ geh ƀư pâl nđaih 5 năm, đah lĕ rngôch rnoh ntuh kơl nklăp 43 rmen prăk, rgum rdâk njêng ăp ndơ dŏng tơm, kơt: Mpông mpêr lăp tâm ƀon; rdâk njêng ntŭk wơt năch ta ntŭk nsrŭng ndeh; ntŭk nsrŭng ndeh n’hanh ndeh điện nđơn rdeng năch lăp tâm bản đăp mpăn kloh uĕh ntŭk gŭ rêh; ăp ntŭk tăch ndơ n’hanh pâl rlưn; rdâk njêng trong tor gĭt lor ntŭk rlong uănh saơ; mprĭp rĭng grep rup uĕh tâm ƀon, rdâk njêng ăp ntŭk ăch chrach....

Mpeh bah bản Khá, an tĭng ƀư Đề án hŏ sơch 5 rnăk geh nău dơi rgâl n’hao jêng homestay; 3 rnăk geh nău dơi pơk ntŭk tăch ndơ sa rnoi mpôl đê̆; 3 rnăk geh nău dơi cheh tanh bok brai, cheh ndrang bok păn rƀay, tanh tôk wơt năch pâl nđaih; âk rnăk ƀon lan ta bản Khá hŏ dơi tiăr nti nău gĭt blău ƀư pâl nđaih nsum mpôl tâm ƀon lan. Bản njêng 2 rmôt njroh mprơ way ơm, way tiăr nti mbro n’hanh nchreng an uănh njroh mprơ, dân vũ, dân nhạc gay rhŏ dŏng an năch pâl nđaih. Yuh Vì Thị Thanh, nuĭh bản Khá nkoch:

Rnăk gâp geh đăng ký râng ƀư pâl nđaih. Lôch đăng ký, rnăk hŏ rvăt năp mbêl phôi mhe gay nchrăp wơt năch. Rnôk năch hăn tât, mpôl hên way gâm ƀư ăp ndơ sa bah nuĭh Thái,  kơt play lhŭng, trău ƀon, ƀăng hôl, djăr ka gŭch… gay rhŏ dŏng an năch.

Wa Quàng Văn Chiến, Groi Kruanh UBND xã Sặp Vạt an gĭt đŏng:

N’gor, nkuâl mât uănh khlay geh trong nchrăp rdâk njêng bản Khá lah ntŭk rgum pâl nđaih tâm ƀon lan, xã mpôl hên dŭt rhơn nđơr. Mpôl hên hŏ ndrel nkuâl n’hanh đơn vị mbơh nti ƀư pah kan hăn uănh năl, dăp rgum tay ăp trong ƀon, n’glah gung meng trong, njêng HTX Pâl nđaih gay kônh wa ndrel ƀư n’hanh gĭt dơi mhâm nău ƀư pâl nđaih.

Tĭng wa Lù Văn Cường, Kruanh UBND nkuâl Yên Châu, gay rdâk njêng bản Khá jêng bản pâl nđaih ƀon  lan nkre đah rdâk njêng ƀon lan mhe, UBND nkuâl Yên Châu hŏ rđău đă n’gâng kan dơi kan rdâk njêng n’hanh ntĭm nti dŏng nkô̆ rnoh uĕh mpeh ntŭk rêh văn hóa ta ntŭk pâl nđaih nsum mpôl bản Khá; ƀư ăp jrô tiăr nti, ntĭm nti, n’hao nău gĭt êng mpeh ntŭk gŭ rêh văn hóa, rdâk njêng ăp rnoh di mpeh trong gŭ rêh srăch uĕh, mbơh ngơi mblêh mblôn, tâm nău rêh tâm ban kơt ăp nău kan tăch rgâl pâl nđaih êng ƀa ƀă. Rlău ma bản pâl nđaih nsum mpôl rnoi Thái, nkuâl rdâk njêng trong nchrăp mât ndray, ntik n’hao rnoh khlay văn hoá du đêt rnoi nuĭh đŏng kơt Mông, Xinh Mun..., gay ntik n’hao rnoh khlay văn hoá way ơm nkre đah pâl nđaih; ntơm bah nê, njêng đăt ndal ntrŭt ntrôl hun hao wăng sa- rêh jêng kon nuĭh ta ntŭk. Aơ lah ngoăy tâm ăp nkô̆ khlay ma nkuâl ndơ̆ lăp tâm trong nchrăp Nghị quyết Đại hội Đảng bộ nkuâl tâl XX, năm kan 2026 - 2030 mbra ƀư tâm năm tât./.