Nsing nơm ntơm lăp năm mhe 2025, n’gor Kon Tum geh nău rƀŏng nsrôih tâm năm 2025 tăm mhe đêt ngăn 300ha tơm mắc ca; bơi 1.100 ha sa play; bơi 1.600 ha sâm Ngọc Linh; rgâl nkra tay 2.000 ha mir mô jêng; hun hao mpôl ndrôk, rpu hao rlău 130.000 kon... Đah nău nsing nơm têh ăp nău uĕh lăng dôl kâp wơt ta bah năp, nô A Uyên, Bí thư Chi bộ nkre ƀư Kruanh thôn Đăk Đe, xă Rờ Kơi nkuăl, Sa Thầy, an gĭt:

"Tât năm mhe 2025 kônh wa mpôl hên mbra pơk hvi tay rnoh tơm tăm kơt tơm cao su, mắc, sầu riêng... Aƀaơ dôl mbơh ƀư an kônh wa ƀư gay hao nău geh an rnăk wâl. Tal 2 tay lah rgâl “Nău mĭn, trong ƀư” bah kônh wa tâm tuch tăm lŏ mir gay n’hao săk geh. Knơm ăp ntrong ƀư tăm tơm jŏ năm âk rnăk wâl lĕ geh prăk ƀư jay têh uĕh, năp rwăt ndơ dŏng an rnăk wâl, năp rwăt ndeh hăn nsong n’hanh mât uănh an oh kon hăn nti tât lôch tât dŭt.

“Ndơr rhơn, ryơk n’hao”, nĕ lah nău rhơn bâh nô Rô Hốk rnoi Jarai, ta trong Hoàng Văn Thụ, nkuăl ƀon têh Pleiku, Gia Lai ê lor lăp năm mhe Ất Tỵ. Năm 2024 mhe nơh, nkuăl ƀon têh Pleiku geh njoat hao mhe ta trong rdâk njêng nkual ƀon lan mhe n’hanh hun hao tuch tăm. Ngăn lah rnoh cà phê, tơm tăm tơm bâh nkual neh Tây Nguyên hao âk, lĕ kơl an nău geh bâh nuĭh ƀon lan dŭt mbơm ngăn rlău đah ăp năm ba năp. Nô knơm an lah, năm mhe 2025, tâm nău ŭch ndâk nsơm hun hao wăng sa, nău rêh bâh bon lan Gia Lai lah êng, Tây Nguyên lah nsum mbra ăp nar lơ ma hun hao.

“Năm 2024 lah năm geh âk nău rhơn mhe đah rnăk vâl hên, tâm ban kơt ƀon lan tâm ƀon, cà phê geh rnoh khlăy, geh play âk. Nău pah kan, hun hao wăng sa rnăk vâl geh njoat hun hao đăp mpăn, oh kon hăn nti geh âk nău rgâl đŏng, geh ndơ ma rvăt năp ndơ dŏng nti an oh kon tŏng ăp. Năm 2025 aơ, mpôl hên nsrôih tay, tâm kơol tâm nău pah kan jan sa, hun hao wăng sa đah nău ŭch bâh gâp nơm lah lĕ rngôch ƀon lan tâm ƀon tâm rnglăp ndrel, tâm kơl âk tay lơn gay ma geh vơt âk nău răm rhơn, tâm năm mhe an geh nsrôih gơih nđơr pah kan sa jan an sâm geh hun hao tay lơn, ŭch geh jut jăng nău ji ngot ach o an nâp nâl lơn”.

 Wa Y Ngak Niê (Nuĭh Êđê)-Bu ranh ƀon Tring 2, phường An Lạc, nkual têh Buôn Hồ, n’gor Dak Lak nkoch nău răm mpeh rgâl mhe ta ƀon lan.

"Nău hun hao bah ƀon lan, hun hao wăng sa tâm ăp rnăk wâl geh nău rgâl uĕh knơm geh ndeh măy mŏk mhe, jêh nĕ rơh druh ndăm dơi nti nsơm âk lơn, djôt âk nău blău mhe jêng nău rêh geh âk nău rgâl tĭng trong têh ndrŏng. Kơt mpôl hên lah ăp nuĭh nsing nơm, dâk bah năp kônh wa ri geh âk nău ƀĭt joet ngăn, nkoch trêng jêng kônh wa dŭt rhơn, geh nău ŭch hao, ƀư ndrŏng kơt ăp rnoi nuĭh oh nô êng.

Wơt Tết tâm jay mhe dơi ntop kơl bah n’gâng kan ƀon lan n’hanh nsum mpôl, yuh Lut (nuĭh Bahnar) ta ƀon Bok Ayơl, xă H’Ra, nkuăl Mang Yang, n’gor Gia Lai mô dơi mpôn nău răm:

"Tât năm aơ lah tết răm ngăn. Bah năp đaơ ur sai gâp nkheh gŭ êng ƀư jay sat, gay rêh lôch nar. Aƀaơ jay ngih dak ndâk ƀư an jay aơ rnăk wâl dŭt lah uĕh. Tết tât, rnăk wâl dơi sa Tết tâm jay mhe, dơi geh mông nar Tết răm m’ak đah kônh wa. Aƀaơ geh jay gŭ nâp nâl hôm mpôl hên mbra tâm ntĭm ndrel, nsrôih pah kan jan sa gay trok prăk dơi manh gay ƀư jay aơ.