KRUANH DAK MBAH RHƠN TẾT VƠT NĂM MHE ẤT TỴ 2025

(Hà Nội, nar 28 khay 01 năm 2025)

Hơi ƀon lan, ndrăng băl, tahen lam dak n’hanh ƀon lan  he gŭ ta dak bah dih!

Du năm mhe- năm Ất Tỵ hŏ tât, nsĭt nkre nău rhơn, nău mpŏng n’hanh ăp nău wơl geh uĕh lăng. Tâm du rân huêng khlay tâm măng rgâl năm mhe, ntơh măt kruanh rđău kan Đảng, Ngih dak, Gâp dăn njuăl tât lĕ rngôch lam ƀon lan, ndrăng băl, tahen lam dak n’hanh ƀon lan he gŭ dak bah dih nău mbah rhơn năm mhe dŭt uĕh lăng. Gâp dăn njuăl tât băl mpôl, ƀon  lan ăp dak lam ntŭr neh nău mbah rhơn năm mhe rhơn răm, đăp mpăn, tâm rnglăp n’hanh hun hao.

Năm mhe aơ, he hŏ rlău âk “phŭt ndal, sial ndăng”, yơn lah du năm nsĭt geh âk nău dơi dŭt di ma n’hao êng săk đŏng. Tâm jêr jŏt, ntul rlong, nuih n’hâm tâm rnglăp, nuih n’hâm rŏng nuĭh, ƀon lan tâm pêt tâm kơl nsum n’hanh nău mĭn nsrôih hao bah rnoi nuĭh he nar lơn ma năl dăng ngăn đŏng. Lam đảng, lam ƀon lan, lam tahen he hŏ nsrôih tât geh n’hanh rlău lĕ rngôch 15/15 rnoh tât hun hao wăng sa- rêh jêng kon nuĭh, rnoh ngăch hun hao wăng sa mpeh rmôt dâk bôk năp lam ntŭr neh; nău rêh drăp ndơ n’hanh nuih n’hâm bah ƀon lan mô rlu dơi rgâl n’hanh n’hao geh; chính trị - rêh jêng kon nuĭh đăp mpăn, njrăng n’gang neh dak n’hanh rnă njrăng dơi n’hao dăng, tâm boh dak bah dih pơk hvi, dơi băl mpôl dak bah dih rnê âk. Ăp nuĭh ƀon  lan Việt Nam, gŭ tâm dak mô lah dak bah dih, ntơm bah công nhân, ƀon lan kan lŏ mir, doanh nhân, nuĭh gĭt blău têh tât ăp tahen n’har bri, gôl dak ngai ngât geh nău dơi n’hao êng săk da dê mpeh ăp nău rgop jêng geh nău dơi nsum bah neh dak.

Năm 2025, lah năm bêng ăp nău kan dŭt têh khlay bah neh dak, năm “hao ngăch, đăt ndal”, njêng jâng nsing n’hao neh dak chuat lăp tâm rơh hun hao mhe – Rơh lhung jong hun hao geh ndrŏng n’hanh têh dăng; nău Đảng rlai lăp nsum đah nuih n’hâm ƀon lan  mpeh rnoh tât ntoh lư geh hao bah rnoi nuĭh. Bol hôm âk jêr jŏt, ntul rlong, yơn, Việt Nam mbra way rƀŏng hăn let năo, mô geh ndơ nking kol dơi nău nđơr nsan hao mhe n’hanh chrat ang trong hăn bah rnoi nuĭh he. Lam Đảng, lam ƀon lan, lam tahen tâm rnglăp tay du nuih n’hâm, du ntôr, nsum suan, n’hao têh nuih n’hâm nsrôih ndôr êng, nsing nơm êng, nsan dăng êng, n’hao êng săk bah rnoi nuĭh, ndăn lĕ ăp trong dơh soih, rlău  ăp jêr jŏt, ntul rlong gay hun hao đăt ndal, rdâk njêng neh dak Việt Nam ƀon lan geh ndrŏng, neh dak têh dăng, ƀon lan ƀư tơm, geh  nău tâm ban, rsăch uĕh; ăp nuĭh ƀon  lan geh nău rêh hơm răm, dah rŏng, rhơn mƀak da dê; rgop nar lơn ma âk an bah tâm lơh tâm su, đăp mpăn, hun hao bah nkual n’hanh lam ntŭr neh.

Tâm mông neh dak – trôk nar tâm lăp nsum, nuih n’hâm rhơn nđơr mbah wơt năm mhe, du tơ̆ tay đŏng Gâp dăn an lĕ rngôch lam ƀon lan, ndrăng băl, tahen lam dak n’hanh ƀon lan he gŭ dak bah dih du năm mhe n’hâm suan ngăch lăng dăng soih, mpăn uĕh, geh hao. Năm mhe mbra geh âk nău dơi mhe.

Dăn lĕ!