Năm 2024, rlău âk jêr jŏt ntul rlong, têh kuâng wăng sa nkual Tây Nguyên hŏ geh rlău 484 rbăn rmen prăk, rĭng geh tĭng bôk nuĭh nchroh geh 78,5 rkeh prăk, hao 16% rđĭl đah năm bah năp nơh. Tât năm 2025 dja, đah âk nău nchrăp ƀư trong cao tốc dôl an ƀư, mbra njêng jâng nsing gay nkual Tây Nguyên ntik n’hao săk geh, nsing nâp jâng chuat lăp tâm rơh mhe.

Nklang nău duh, nău sial bah khay wai Tây Nguyên, nău nteh n’gôr ta ntŭk rdâk njêng gâl n’glăp 3 trong cao tốc Khánh Hòa – Buôn Ma Thuột. nô Nguyễn Đình Lợi, cán bộ kỹ thuật ta aơ, an gĭt, bơi hang rhiăng công nhân ndrel 60 bôk ndeh ăp ntil dôl tâm rlong ƀư ngăch:

“Tĭng nuih n’hâm rđău đă bah Thủ tướng lah “mơ̆ mih găng nar”, oh nô cán bộ, kỹ thuật, công nhân, nuĭh ƀĭt ndeh tâm pleh 3 tơ̆ 4 mpôl; nuih n’hâm nsrôih âk ring lam tâm lĕ rngôch ntŭk ƀư trong.”

Ta ntŭk ƀư trong cao tốc nthoi Buôn Ma Thuột đah Khánh Hòa đŏng, bar pe jât công nhân n’hanh ndeh rklư dôl khŭl dŭk dŭk lôk yôk, pơk trong nâm neh chuh rloh yôk Phượng Hoàng. Wa Ngô Hiểu Khoa, Giám đốc mpôl mât bôk kan Tập đoàn Đèo Cả, nsing nơm: trong nâm neh Phượng Hoàng jong 1,7 km ndrel đah 10 mblâm ntung mpeh tơm ndranh ƀư rnoh jong 11 km mbra ƀư ngăch rlău.

“Đah nău geh ndơ ƀư kơt aƀaơ ri mpôl hên ton kêng dŭt năm 2025 mbra mbluh yôk Phượng Hoàng, ăp ntung ri mbra ƀư lôch jêh dâm rkơl n’hanh ndăl trong ntu.”

Ndrel đah nchrăp ƀư trong cao tốc Buôn Ma Thuột - Khánh Hòa (jong 117,5km) dôl nchrăp ƀư ngăch, ăp n’gor tâm nkual Tây Nguyên dôl ndăn ngăch nchrăp ăp ntil ndơ gay ƀư du rơh ăp njăr trong cao tốc ntêng lêng nkual. Ta n’gor Dak Nông, ăp n’gâng kan hŏ nchrăp an nău ƀư trong cao tốc Bắc - Nam mpeh nhâp nar gâl Gia Nghĩa (Dak Nông) - Chơn Thành (Bình Phước). Wa Hồ Văn Mười, Kruanh UBND n’gor Dak Nông, lah rjăp, cao tốc Gia Nghĩa - Chơn Thành mbra ƀư wat jêh n’glăp dŏng tĭng di rnoh ngăch năm 2027:

“Nklăp năm 2025 ntơm pah ƀư trong dja, nê lah nău ntrŭnh bah Đảng, Ngih dak mpeh trong cao tốc Gia Nghĩa – Chơn Thành. Mpeh n’gor Bình Phước hŏ ntơm pơk trong bah Chơn Thành hăn Bình Dương n’hanh nthoi đah Nkual ƀon têh Hồ Chí Minh, ri rnôk ma cao tốc nthoi Gia Nghĩa đah Chơn Thành mbra pơk du trong dŭt têh an nău hun hao wăng sa rêh jêng kon nuĭh bah n’gor Dak Nông.”

Mpeh n’gor Lâm Đồng, n’gâng kan ta ntŭk dôl kan nsum đah n’gor Khánh Hòa n’hanh ăp nhih pah kan geh tât tĭng ƀư ăp siƀŭt nchrăp ƀư trong cao tốc Nha Trang – Liên Khương jong bơi 100km. Nkre, bar njăr trong cao tốc nthoi Lâm Đồng ndrel đah Đông Nam Bộ lah Tân Phú – Bảo Lộc (66km) n’hanh Bảo Lộc – Liên Khương (73km) dôl droh rklaih ăp jêr jŏt gay an ƀư ngăn ngăn đŏng. Wa Trần Hồng Thái, Kruanh UBND n’gor Lâm Đồng, lah kloh:

“Rnoh jong mô rgâl yơn ma ân rgâl di tay yor ăp nkô̆ uănh lhơ, ma ơm geh tâm nê. Đah lĕ bar trong nchrăp kan ma n’gor Lâm Đồng hŏ nsrôih ƀư ăp siƀŭt gay dơi an ƀư tâm năm 2025 đăt ndal”.

Ntrôl ngăch an ƀư ăp trong buăt nthoi Tây Nguyên lah ngoăy tâm ăp nkô̆ khlay dơi tâm nchră ta Hội đồng tâm pă nău kan nkual Tây Nguyên mhe ƀư bôk năm 2025. Wa Rah Lan Chung, Kruanh Ủy ban nhân dân n’gor Gia Lai dăn đă trung ương geh ăp trong kơl tâm pă tơm prăk lor an ăp ntŭk nchrăp kan tơm khlay tĭng Nghị quyết 23 bah Bộ Chính trị n’hanh nău n’glêh an 377 bah Thủ tướng Chính phủ:

“Du đêt trong nchrăp kan ma aƀaơ Gia Lai dŭt uănh khlay, lah: N’hao têh hvi tay tach ndeh păr Pleiku, ntuh kơl rdâk njêng trong cao tốc Pleiku – Quy Nhơn, cao tốc Bắc – Nam mpeh nhâp nar, trong loih nthoi Tây Nguyên, trong nthoi tâm ntêng lêng nkual Ayun Pa, đah nkuâl Ia Hleo (Dak Lak) n’hanh tâl 6 lah trong nthoi Gia Lai – Phú Yên.”

Nkual Tây Nguyên geh âk ndơ săk geh mpeh tơm  tăm jong nar đah ăp ntil ndơ tăch rnoh khlay hang rmen đôlar, ndrel săk geh mpeh pâl nđaih dŭt têh mpeh bri dak, văn hóa… Bah meng nău ntuh kơl bah ttrung ương, ăp n’gor âk ntik n’hao suan dăng, hao ngăch ndal gay njêng jâng nsing an rơh hun hao mhe, nê lah nău mpŏng ŭch bah Tổng Bí thư Tô Lâm tâm rnôk hăn pah kan ta n’gor Gia Lai mhe aơ:

“He ân ntrŏng nău nsrôih âk, nău mĭn têh, njêng ăp jâng nsing khlay ntơm bah tâm năm 2025 gay nâp jâng chuat lăp tâm rơh mhe, ntrŏng ăp trong rƀŏng hun hao an năm kan tât, n’hanh uănh ngai tât 2045 neh dak he mhâm jêng, n’gor he mhâm jêng? He nsrôih ân n’gor Gia Lai hun hao, Tây Nguyên uĕh jêng mpeh tuch tăm hữu cơ, âk ntil mpeh ndơ gŭ rêh, âk mpưm săk ntơr mpeh văn hóa, nâp dăng mpeh rêh jêng kon nuĭh n’hanh ntŭk gŭ rêh, ntrôl ngăch hun hao n’hanh n’hao săk geh nău rêh bah nuĭh ƀon lan”.

Năm 2024, rnoh ngăch hun hao wăng sa mô hŏ kơt nău mpŏng, yơn rnoh âk GRDP bah nkual Tây Nguyên geh rlău 484 rbăn rmen prăk, GRDP rĭng geh tĭng bôk nuĭh 78,5 rkeh prăk/nuĭh, hao 16% rđĭl đah năm 2023. Năm 2025 dja, rnôk âk nău nchrăp ƀư trong cao tốc dơi an ƀư, mbra lah jâng nsing gay Tây Nguyên njêng đăt ndal tâm hun hao wăng sa rêh jêng kon nuĭh, nâp jâng chuat lăp tâm rơh mhe.