Dŭt năm, ntŭk nkra njêng bah Công ty Cổ phần điều Hải Bình Gia Lai, nkual ƀon têh Pleiku, n’gor Gia Lai mô wâr grăp điều an ăp sam ƀŭt nchăm ndơ Tết Nguyên đán. Wa Hoàng Văn Quang, Ntoh măt Công ty an gĭt, lah grăp điều lĕ bên bah ăp nkual tăm ta n’gor yơn ndơ bah công ty geh OCOP 4 sao, dôl rƀŏng tât tâm di 5 sao, knơm trong ƀư êng: grăp điều wâr i long. Ndơ lĕ dŭt bên ma lơn lah lĕ kơl công ty pơk hvi ntŭk tăch, n’ăp tâm dak n’hanh tăch n’gluh dak bah dih.

Doanh nghiệp geh âk nău dơh. Nĕ lah nu nău tăch n’gluh geh nău rgâl na nê̆ nkôp đah ăp năm bah năp. Ăp nuĭh ta ăp dak châu Âu n’hanh ăp dak Đông Nam Á êng lĕ nchrăp đŏng tât joi gay pơk hvi ntŭk tăch n’gluh bah dih dak. Gay tâm di ăp nău ŭch tăch n’gluh doanh nghiệp dôl nsrôih geh ăp nău tâm di kơp dơn gưl prêh lơn, mhe lơn.

Tât lĕ năm 2024, nkual Tây Nguyên lĕ geh rlău 1.300 ndơ OCOP dơi kơp dơn bah 3 tât 5 sao. Ndơ OCOP Tây Nguyên mô knŭng lah rgum bah nuih n’hâm pah kan n’hanh mĭn ƀư mhe, ma hôm nău nkoch ntô̆ n’hao âk mpeh nkual neh ndrŏng nău uĕh, kơt ndơ “Trà nkao êr”, OCOP 3 sao bah nkuăl krông Pắc, n’gor Dak Lak. Wa Nguyễn Ngọc Quỳnh, nuĭh ƀư jêng ndơ aơ an gĭt, bah jŏ, wa lĕ djăt mpeh nău khlay bah ntil dak si aơ, jêng rnôk gĭt ta bri Tây Nguyên geh đŏng âk ntil trà nkao êr ta ntŭk, wa lĕ uănh hun hao ndơ. Jêh bơi 10 năm tăm, wa lĕ geh 3.000 tơm ta rnoh neh 2 ha, gay lăp lvang nkra njêng ndoh ndơ. wa Quỳnh nkoch:

Gâp gĭt wât Việt Nam he geh dŭt âk ndơ lŏ mir khlay, lơn lah ăp ntil tơm dak si. Đah nău ŭch ƀon tơm neh dak, gâp mpŏng mât ndrăy n’hanh hun hao tay, nkre rêng hvi tât kônh wa ƀon lan, kuăl jă ăp nuĭh mât njrăng tơm si ta ntŭk, ndâk njêng du trong âk ntil tơm si n’hanh mât njrăng ntŭk ntô gŭ rêh bah nơm n’hanh ăp nuĭh kiău ma.

Ŭch rŏng, ntô̆ n’hao n’hanh gĭt joi nkual neh ndrŏng nău uĕh, âk ntil mpeh bri dak tơm si, wa Lê Thùy Kim Loan, giám đốc Công Ty Cổ phần Pyloderb ta n’gor Kon Tum lĕ dơi plơng tay đah 15 ndơ geh kơp dơn ndơ OCOP. Tĭng wa Lê Thùy Kim Loan, lĕ rngôch ăp ndơ bah công ty dơi nkra njêng bah tơm dak si tâm bri hon êng. Kônh wa ta ăp ƀon lan nkual yôk prêh bah nkuăl Kon Plông n’hanh Đăk Glei, n’gor Kon Tum lah ăp nuĭh pă an ăp ntil tơm dak si uĕh tam âk an nkra njêng. Yor rĭ, du ntil ndơ OCOP geh nău rgop bah lĕ nsum mpôl da dê.

Kơp dơn OCOP lah an saơ ndơ nsĭt nău uĕh nkual neh. Rnôk dơi kơp dơn OCOP, mpôl hên gĭt năl ndơ bah nơm geh âl ntĭt mpơl êng, bah dak si tam âk, ndơ ƀư tât pah kan tât bah nkual neh aơ. Tem OCOP gưl ta n’gor Kon Tum lĕ mĭn lah ndơ tơm dak si ntĭt mpơl bah nkual.

Bah ndơ ƀư lah ăp lŏ mir bên yơn đah nău ŭch rŏng, ntô̆ n’hao mpeh drăp ndơ ƀon tơm, ăp nuĭh ƀon lan Tây Nguyên lĕ mĭn ƀư mhe an luh ăp ndơ OCOP ntĭt mpơl tĭng ƀô kah, rup gui bah nkual neh. Ăp lôch uĕh bah bôk nău kan du xă du ntil ndơ ta aơ an saơ nău geh âk bah nău tâm rgop nău uĕh ta ntŭk đah nău mĭn rgâl mhe. Nău nĕ mô knŭng rgop n’hao nău rêh bah nuĭh ƀon lan, ma hôm rêh hvi nău ntô̆ n’hao mpeh tây Nguyên têh âk.