Tâm nar dŭt năm, lĕ rnăk wâl yuh Thị Nguyệt, nuĭh Bunong, ƀon Bu Prăng 1A, xă Quảng Trực, nkuăl Tuy Đức, n’gor Dak Nông lĕ tâm rgum nchrăp wơt rhơn năm mhe. Năm bah năp lah du năm dơi geh rnôk rlău 1ha tăm cà phê tâm srah Mắc ca nsĭt geh nklăp 400 rkeh prăk. Săk geh hao âk, dơi geh ndơ jêng rnăk wâl yuh năp rwăt ndơ Tết tŏng ăp lơn, nchrăp an wơt kônh wa ƀon lan, mpôl băl tât răm ndrel, gay lôch năm mhe bra nsrôih tay pah kan jan sa.

Năm aơ cà phê dŭt khlay, săk geh hao âk lơn, kônh wa tăm cà phê kơt mpôl hên dŭt rhơn, wơt năm mhe tŏng ăp lơn. Rlău năm mhe, kônh wa mbra nsrôih mât chăm an mir hun hao uĕh, mpŏng geh tay du yan săk geh.

Wa Điểu Khanh, Bí thư chi bộ Bu Krắk, xă Quảng Trực an gĭt, tâm ăp rơh tâm lơh tâm su, nkual xă Quảng Trực geh rlăng ntŭp bom lơh phah, yơn kônh wa hôm e mât neh, mât ƀon, du nuih n’hâm hăn tĭng cách mạng. Neh dak kơp dơn ngoăy, rgâl mhe n’hanh aƀaơ ƀon lan lĕ geh âk nău rgâl dŭt rhơn. Lơn lah, ăp ƀon ta n’har bri lĕ geh âk jâng nâp nâl gay hun hao rnôk dơi Đảng, Ngih dak uănh tât ntuh kơl rĭng gung trong, n’hanh âk năm dăch aơ tuch tăm lŏ mir mâp âk nău dơh, ndơ lŏ mir hao khlay. Wơt năm mhe, kônh wa dôl dŭt rhơn, đah nău nsing nơm đah du năm dơi geh:

Ƀon lan lĕ geh rgâl dŭt rhơn, kônh wa dŭt răm wơt rhơn năm mhe. Kônh wa mbra nsrôih tay ƀư sa, hun hao tuch tăm, tâm rnglăp, ndrel nuih n’hâm ndâk njêng ƀon tơm, neh dak nar lơ ndrŏng uĕh.

Lah xă n’har bri jru ngai ngăn bah n’gor Dak Nông, Quảng Trực aƀaơ geh bơi 3.000 rnăk, rlău 10.000 nuĭh, tâm nĕ rlău n’gul lah nuĭh rnoi mpôl đêt. Tĭng wa Đoàn Minh Thuận, Kruanh UBND xă Quảng Trực, lôch uĕh ngăn bah xă năm bah năp lah n’hŭch tât 15% rnoh rnăk ach o, rnoh rnăk ach o bah xă jŭr bah dâng 35%, rlău âk rnoh an ƀư gưl n’gor n’hanh gưl nkuăl jao. Ndrel đah săk rnglăy bah 3 bôk nău kan rƀŏng tĭng lam dak ntuh kơl an xă ri aơ lah săk rnglăy bah nău mât uĕh nuih n’hâm, sŏk lŏ mir ƀư n’gâng tơm,, hun hao ăp ntil tâm tâm di đah trôk nar, neh ntu, nsĭt tay săk rnglăy âk:

Xă geh trong rƀŏng nĕ lah nău rgâl wât đah trong nkoch trêng, rgŏ jă, nkre pơk hvi ăp ntrong ƀư săk rnglăy âk, ndơ̆ kônh wa hăn nti gay bah nĕ kônh wa sĭt nsrôih hun hao wăng sa rnăk wâl. Bah meng nĕ, mpôl hên ndâk njêng ăp rmôt ntrŭt nsôr pah kan gưl bah dâng, tât jŭr ntop kơl kônh wa kỹ thuật tuch tăm, ntop kơl ntŭk tăch. Nĕ lah ngoăy tâm âk trong kơl kônh wa rgâl nău mĭn n’hanh ƀư tơm, nsrôih hao êng gay hun hao wăng sa.

Wa Nguyễn Văn Anh, Groi Kruanh UBND nkuăl Tuy Đức, n’gor Dak Nông nkoch, năm 2024 lah du năm âk nău dơi geh ta ăp ntil. Sŏk soay rlău 20%, hŭch ach o bơi 10% lah ăp rnoh mrô uĕh rnôk lĕ 14/14 rnoh an ƀư wăng sa rêh jêng bah nkuăl geh da dê n’hanh rlău trong nchrăp n’gor jao. Tĭng wa Nguyễn Văn Anh nkuăl ach o 30a Tuy Đức dôl ntơm hăn nâp nâl gay rƀŏng tât rklaih luh nkuăl ach o tâm năm 2025.

Ƀon lan mât uănh jru hvi Nghị quyết đại hội Đảng ăp gưl, tĭng nkô̆ nău nĕ mbơh ƀư tâm ban ăp bôk nău kan, trong nchrăp, nău nchrăp ƀư ntuh kơl n’hanh nkoch trêng rgŏ jă nuĭh ƀon lan nsrôih pah kan jan sa, jŭt n’hŭch ach o. Nsrôih ndâk njêng nkuăl Tuy Đức jêng nkuăl hun hao, rklaih luh ach o tâm năm 2025.

Đah jâng wăng sa dơi ndâk ƀư nâp nâl, nkuăl Tuy Đức dôl nsing nơm nâp nâl lăp năm mhe Ất Tỵ 2025 mbra rklaih ach o n’hanh jêng nkuăl sâm geh bah n’gor Dak Nông. Kônh wa ta ăp ƀon bah nkuăl dôl răm m’ak năm mhe, wơt Tết n’hanh nsing nơm tâm năm mhe dơi geh, ndrel đah neh dak nâp nâl lăp rach năm mhe, rach năm hao êng săk nơm bah rnoi nuĭh.