Tât veh khâl ntŭk ƀư ih poăch ndrôk du nar Tuấn Hậu ta nkuăl têh Phú Túc, nkuăl Krông Pa, n’gor Gia Lai ăp nar aơ, mpôl hên geh mâp saơ âk poăch ndrôk geh ih ta prêh, ntŭk mbra dơi geh đŏng âk măt nar chrat ang bâh neh Tây Nguyên. Bâh tơm ntŭk ƀư tât nuĭh kan lĕ ngăch ndăn tâm ăp nău pah kan, gay ma dơi geh ăp poăch ndrôk kah tâm di du nar ih ta duh Krông Pa an Tết Nguyên đán.ăp mpang poăch ndrôk têh dĭng mpang ti geh ntŭk kan aơ săch bâh ntŭk poăch ndrôk i kah ngăn, geh rse poăch jong, mô geh ngi, lôch mpli pot đah boh mbrăch klâp ma 60mnĭt (way geh pot đah boh, jăm, tỏi, mbrăch n’hanh mblăng), mbra geh ih ta mpâr bâh 3-4 mông.

Yuh Hoàng Thị Minh Châu, du hê kon hăn gŭ ngai đah ƀon tơm way geh rvăt poăch ndrôk ih du nar gay ma ƀư ndơ Tết, nkoch.

 “Gâp dŭt ŭch sa poăch ndrôk ih du nar ta Krông Pa, Gia Lai, yor ndrôk ta aơ geh nău kah êng, ƀô kah ngăn, poăch săk, geh ih đah nău duh nar n’heng, sa geh nău bô kah bâh duh nar êng. Ăp năm dăch tết lah gâp way rvăt sĭt ƀư pă an băl bên”.

Wa Trần Quang Tuấn- tơm  ntŭk pah kan Tuấn Hậu an gĭt, ăp nar duh ueh dăng, wa geh ih 2 ndrơng, bâh 9 mông tât 12 mông nar n’hanh bâh 12 mông nar tât 3 mông kêng măng. Wa Tuần an gĭt, bâh du ndơ sa way sa bâh ƀon lan rnoi Ja rai ta ntŭk, poăch ndrôk ih du nar Krông Pa aƀaơ lĕ geh tăch âk ta ntŭk tăch rgâl.

  “Ntil ndơ aơ geh ntơm bâh ndơ sa way ơm bâh nuĭh Jarai, bâh nĕ ƀon lan sŏk nĕ gay ma ƀư ndơ sa an năch rnôk kăl e nơh. Êng mpeh ndơ mpli pot an ƀô kah rĭ hên  mpli pot tĭng nău ŭch sa bâh rnăk nơm dơm, mô geh nsum kơt ta ntŭk tăch rgâl, geh êng kơt nĕ. Ăp rơh geh ƀư rơh tâm mbơh mpeh ăp ntil ndơ bâh nuĭh ƀon lan ƀư rĭ rnăk vâl geh tât râng. Geh rơh nkhêp tâm mâp tâm nđŭr tăch ndơ tât rĭ gâp mbra nsrôih tât râng gay ma mbơh tơih ăp ntil ndơ aơ tât nuĭh dŏng ndơ geh dŏng ueh lơn”.

Bâh ntơm du ntil ndơ sa bâh ƀon lan, poăch ndrôk ih du nar lĕ jêng du ntil ndơ ăp nar lơ ma têh kaưng ta ntŭk tăch rgâl ta Krông Pa, đah âk rnăk tât râng kan, rdâk njêng geh nău ntơ geh nău knơm n’hanh geh kơp dơn lah ntil ndơ OCOP bâh ta ntŭk. Wa Hồ Thị Mười- Tơm ntŭk kan Mười Đức nkuăl têh Phú Túc, nkuăl Krông Pa lĕ tă geh gĭt 30 năm ƀư poăch ndrôk ih du nar. Tĭng nău mbơh bâh wa Mười, ăp nar, ntŭk kan bâh wa ƀư geh klâp ma 50kg poăch ndrôk rêh. Ta rnôk dăch tết geh nar ƀư bâh 5 tât 7 tạ poăch ndrôk gay ma pă an ăp ntŭk tăch nđơn tay, nsĭt nău geh âk đŏng.

“Aƀaơ ndrel rĭ rnăk vâl lĕ dôl geh 3 sào nkuăl pă an n’hanh tât tay nkuăl geh dăn n’hao tay 4 sào, ntil ndơ bâh gâp geh rlet rlău ăp ntŭk ueh lơn, gay a ndơ̆ an ntŭk tăch rgâl n’hanh gâp lĕ dơi geh 4 sào gay ma tĭng ntŭk tăch rgâl ta lam dak. Yor săk soan bâh nuĭh dŏng ndơ  gâp lĕ mpŏng tât lah nău mât đăp mpăn ndơ sông sa n’hanh ăp ntil ndơ geh an lor mât ueh”.

Ndrôk ih du nar aƀaơ mô dơn lah ntil ndơ khlăy bâh nkual rđŭng duh nar Krông Pa. Âk ntŭk ngêt sông, ngih răk năch ta Gia Lai lĕ ndơ̆ ntil ndơ aơ ta ntŭk ndơ răk vơt năch, lah ntil ndơ ntoh lư geh nău ntơ dăng bâh ăp ntŭk kan tăch rgâl. Tĭng nău mbơh bâh yuh Lê Hòa, tơm shop “Nông trang Foods” ta nkuăl ƀon têh Pleiku, bâh bôk khay Chạp ăp năm, năch ta lam dak lĕ dăn rvăt poăch ndrôk ih du nar gay ma ƀư ndơ pă tết an băl mpôl.

 “Ăp năm dăch aơ rĭ poăch ndrôk ih du nar duh lơ ma geh âk nuĭh mât uănh yor aơ lah ndơ sa kah n’hanh geh âk nău ueh êng, bâh nău kah nĕ geh mpơl ntĭt nău kah bâh Tây Nguyên êng jêng lah âk nuĭh tât ta Gia Lai lĕ geh joi rvăt n’hanh dŭt ŭch. Lah ntŭk tăch ndơ ntoh lư ơm geh ta Tây Nguyên rĭ ntơm bâh bôk khay 11 âm lịch ăp năm rĭ ntŭk tăch ndơ hên lĕ geh ăp năch bah dih n’gor tât mbơh dăn rvăt âk ndơ ƀư pă ndơ tết an băl mpôl, oh nô n’hanh nuih bên. Đah nău tâm rgop tâm nđur tăch ndơ tâm di dơh nơih kơt aƀaơ rĭ nău nkrte geh tăch ndơ ndơ̆ ndơ ntoh lư kơt poăch ndrôk ih du nar duh rĭ gâp mĭn lah dŭt khlăy, ngăn lah ta ăp rơh tết”.

Đah lĕ rnoh ndrôk rlău 64 rbăn mblâm, tâm nĕ dŭt âk lah ntil ndrôk jê̆, Krông Pa dôl n’hao lĕ ueh nău dơi mpeh rnoh ndơ geh ƀư ueh. Lam nkuăl geh klâp ma 30 ntŭk ƀư ih poăch ndrôk du nar, Dŭt nkah, tâm rnoh 29 ntil ndơ OCOP ta nkuăl, geh tât 20 ntil ndơ geh ƀư bâh poăch ndrôk ih kro sêk jê̆, ndrôk ih kro mpang,nting poăch ndrôk ih du nar, poăch ndrôk n’heng ŭnh. Wa Võ Ngọc Châu- Kruanh ntŭk kan tuich tăm mât rong n’hanh hun hao ƀon lan nkuăl nkoch.

"Ăp năm, nkuâl đă ăp tơm nuĭh geh ndơ ƀư OCOP hăn râng nkơnh n’hơ săk ntơ lư ta n’gor, bah dih n’gor n’hanh ăp n’gor nkual ƀon têh êng ƀa ƀă. Nău ŭch bah nău kan dja gay nkoch mbơh săk ntơ lư n’hanh nkơnh n’hơ ndơ geh ƀư bah puăch ndrôk 1 nar ih Krông Pa tât đah ăp ntŭk êng ƀa ƀă. Gay hun hao jŏ jong, nkuâl geh trong rƀŏng ntop kơl kỹ thuật ih pâr têh uĕh mhe gay n’hao rnoh khlay săk ntơ lư, pơk hvi ntŭk tăch rgâl n’hanh hun hao tâm nkrêp rêng kan rnoh khlay ntơm bah ƀư njêng tât tăch rgâl.

Bâh du ntil ndơ sa bâh nuĭh Jarai, poăch ndrôk ih du nar duh Krông Pa lĕ jêng ndơ ntoh lư geh âk nuĭh ŭch rŏng, ntop khlăy ta nău hun hao wăng sa rêh jêng ta ntŭk. Rnôk Tết tât năm mhe sĭt, nău ƀô kah bâh ndơ sa aơ lơ ma khlăy lơn, kơt lah du nău ueh mpeh ndơ sa ueh êng bâh nkual neh Tây Nguyên.