Tĭng nău mbơh tơih, tât aƀaơ, n’gor Cà Mau geh 7 nău mpŏng kan n’hanh rlet rlău đah năm kan 2020-2025, n’hanh nchroh mbơh tât lĕ năm kan mbra geh 15/17 nău mpŏng kan n’hanh rlău đah nău nchrăp. Aƀaơ nău wăng sa bâh ta ntŭk geh rgâl hăn tĭng di trong, Cà Mau leo bôk năp ta lam dak mpeh prăk geh tăch ndơ an dak bah dih bâh tăch tui. Lam n’gor geh 64 xã geh tâm di nkual ƀon lan mhe. Nglôch lôch rơh pah kan, Tổng Bí thư Tô Lâm uănh rnê âk nău nsrôih n’hanh ăp nău dơi geh, nău dơi ma Đảng bộ, n’gâng kan n’hanh ƀon lan n’gor Cà Mau lĕ dơi geh tâm ba năp nơh. Tổng Bí thư lĕ đă Cà Mau an geh ntrôl ngăch doh rklaih ngăch nău kŏ văk, nău jêr gay ma an hun hao, sŏk ƀon lan, doanh nghiệp ƀư tơm, rgum n’hanh ndâk nsơm ăp rnoh kan ta trôm n’hanh bah dih an hun hao wăng sa- rêh jêng, rgum rgâl mhe trong kan hành chính n’hanh rgâl mhe rnoh mbrô an tâm ban, lĕ rngôch ta nkual pah kan n’hanh nkual kan êng, rgâl mhe têh dăng ntŭk rêh jêng ntuh kơl, tăch rgâl.