Nghị quyết mbrô 09-NQ/TU tă bah Ban Chấp hành Đảng bộ n’gor Gia Lai (khóa XV) năm 2019 mpeh mât ndray n’hanh ntik n’hao tơm dak si ta n’gor Gia Lai tât năm 2025, rƀŏng năm 2030, n’gluh rnoh tât mât dŏng jŏ jong ndơ mpêt khlay tơm dak si tâm bri; jêng ăp nkual tăm tơm dak si nkre đah ntŭk nkret njêng ta ntŭk. Tât aƀaơ, ăp nău dơi lor bôk năp tĭng ƀư nghị quyết hŏ pơk luh trong rƀŏng hun hao an nuĭh ƀon lan Gia Lai bah tơm dak si.

Ntơm bôk năp dơn geh 9 nuĭh, tât aƀaơ Hợp tác xã Tuch tăm- tăch rgâl- rhŏ dŏng Tơ Tung (xã Tơ Tung, nkuâl Kbang, Gia Lai) hŏ âk rlău 67 nuĭh ndrel râng tăm n’hanh et mblăng dak si. Tĭng yuh Nguyễn Thị Thanh Hương, Kruanh hợp tác xã, ntơm nơh kônh wa lơn âk nsing tâm tơm bum blang n’hanh tuh mbo glêh nar. Ntơm bah năm 2019 tât aƀaơ, nơm geh trong leo  tăm mblăng, ma ăp nuĭh hợp tác xã geh wăng sa đăp mpăn. Hợp tác xã hŏ rdâk njêng săk ntơ lư pring sial mblăng di rnoh OCOP 3 sao gưl n’gor, đah trong tăch  luh đăp mpăn ta du đêt siêu thị n’hanh jay tăch dak si. yuh Nguyễn Thị Thanh Hương nkoch:

“Rnôk uĕh di ndơ geh ƀư, săk kah mbra âk lơn. Mpôl hên nsrôih tĭng jăp ăp rnoh di OCOP gay dơh n’gluh ndơ geh ƀư tăch luh, njêng nău nsing nơm an năch dŏng. Aƀaơ, hợp tác xã dơi Công ty Dược n’hanh ndơ dŏng kan dak si Đà Nẵng ton rvăt lĕ ndơ geh ƀư, đah rĭng geh 50-60 rkeh prăk/ha ăp năm.”

Tâm nklang nkual mât njrăng bri Kon Chư Răng, du đêt doanh nghiệp hŏ ntơm ntuh kơl ndrel nuĭh ƀon lan nkuâl Kbang mât dŏng săk geh mpeh dak si. kơt ta xã Đăkrong geh 2 ntŭk tăm tơm dak si ta ƀon Kon Trang n’hanh ƀon Kon Lanh Te, lĕ rngôch rnoh hvi bơi 40ha. Tâm ban kơt nê, ta ăp xã Sơn Lang, Kon Pne, Sơ Pai, n’hanh Krong (ndrel nkuâl Kbang) hŏ geh bơi 240ha sa nhân ônh, sâm lŭ, đương quy, đinh lăng n’hanh rmĭt dơi tăm rgum ta nâm n’hâm bri. Wa Ngô Văn An, Groi kruanh UBND xã Đăkrong, mpŏng ăp ntŭk tăm  tơm dak si mbra rgop rgâl nău rêh wăng sa bah nuĭh ƀon lan rnoi mpôl đê̆:

“Ma trong nchrăp kan ta ƀon Kon Trang (7ha) n’hanh ƀon Kon Lanh Te (30ha), mbra nta joi tay âk nău kan an nuĭh ƀon lan tâm xã. Ăp công ty mbra kơl ntil, ndơ dŏng kan tuch tăm n’hanh ký ton rvăt ndơ tuch tăm đah kônh wa tâm let năp tay”.

Ntơm bah rnôk geh Nghị quyết mbrô 09-NQ/TU bah Ban Chấp hành Đảng bộ n’gor Gia Lai (khóa XV) năm 2019 mpeh mât ndray n’hanh ntik n’hao tơm dak si, tât aƀaơ, lam n’gor hŏ tăm geh rlău 4200ha tơm dak si. Gia Lai hŏ geh 55 ntil tơm dak si dơi kơp dơn OCOP (tâm nê geh 9 ntil ndơ 4 sao). N’gor geh 4 nhih máy nkret njêng dak si, đăp mpăn ƀoi tơm luh, nkre mât uănh lhăt rêng ƀư ntơm bah tăm tât nkret njêng. Ndrel đah nê, aƀaơ Gia Lai geh 4 ntŭk nchrăp tăm tơm dak si hŏ dơi uănh an dŏng, lĕ rngôch 497 rmen prăk, n’hanh 10 trong nchrăp tâm săk nchih ôp kuăl ntuh kơl đah nău nchrăp rlău 7.272 rmen prăk.

Wa Nguyễn Văn Hoan, Groi Giám đốc Sở Nông nghiệp n’hanh Phát triển Nông thôn n’gor Gia Lai, an gĭt, n’gor nta trong dơh an ăp doanh nghiệp ntuh kơl tâm trong kan dak si.

“Mpeh wăch rgum ntuh kơl, mpôl hên mbra nta trong dŭt dơh an ăp doanh nghiệp hăn uănh năl ăp ntŭk mbra tăm dơi tơm dak si tâm di đah nău ŭch rêh bah tĭng ntil tơm dak si đŏng. Ăp ntŭk dăn đă ri mbra nkoch mbơh gĭt an ăp doanh nghiệp ăp nkual mbra dơi ƀư trong nchrăp kan. Lơn lah mpôl hên dŭt mpŏng kâp ăp doanh nghiệp n’hao ăp nhih máy nkret njêng dak si sĭt n’gor”.