Ta ti ndjôt điện thoại, kanŭng lât lât ta nĕ kơt sok rup, nchih ndơ tăch, mbơh tu tơm ƀư, rnoh khlăy, nău ntop tay lah geh rvăt, wa Đồng Xuân Liền, Giám đốc HTX Nam Bình, nkuăl Đăk Song, n’gor Đăk Nông lĕ geh ndơ̆ ntil ndơ găr tiu krăk tât ntŭk tăch rgâl điện tử kơt Buudien.vn,Shopee.vn n’hanh Ocop.vn. Wa Liền an gĭt, HTX lĕ geh Hội nông dân n’hanh Bưu điện n’gor ƀư nti nău kan gay ma ndơ̆ ndơ tuch tăm tât ntŭk tăch rgâl điện tử. Bôk năp wa n’hanh ăp nuĭh kan ndrel tâm HTX mô hŏ vât, yơn kanŭng du ƀlât dơm, nău ndơ̆ ndơ geh ƀư bâh nơm ta ntŭk tăch rgâl Online lĕ dŭt dơh ngăn.

“Bâh rơh nti mpeh uănh joi gĭt tâm săm ƀŭt rhŏ nti kan, bâh geh mon gâp nti tay rĭ gâp geh ndơ̆ ntil ndơ  geh ƀư bâh htx tât ta ntŭk tăch rgâl điện tử. Lôch tă geh tăch an bu, lĕ geh bu rvăt ndơ an htx, aơ lah nău dŭt rhơn ngăn”.

Bâh ntơm geh rgâl jêng tăch ndơ điện tử, wa Nguyễn Thị Ngọc Sen ta phường Nghĩa Đức, nkuăl ƀon têh Gia Nghĩa mô hôm geh nchoăt dâng nchoăt lơ tăch rpŭng kho kơt ntơm nơh. Wa an gĭt, ntơm nơh, ntil ndơ rpŭng kho geh ƀư kanŭng tăch rklŭp an an ăp ntŭk tăch nchrai mô lah tăch an năch bên. Bâh ntơm geh ntŭk tăch rgâl điện tử rnăk vâl wa kanŭng pĕ lêh, tâl dŭng an ueh mbra geh nuĭh kan ta bưu điện mbra tât dơn kan, nchoăn rdeng ndơ ndơ̆ an năch dăn rvăt. Nău mbơh nchih ta ntŭk tăch rgâl điện tử bâh wa Sen an saơ, ăp ntil ndơ rpŭng kho kơt Kim Long, Hoàng Long, Kim Hoàng Hậu...geh tăm tâm jay bil tĭng nău mpŏng VietGAP. nău way mât chăm, poh phân, tŏ dak..geh ƀư tĭng trong ntruh. Mô hôm geh ăp nău mô vât kơt bâh ntơm mpeh công nghệ, wa Sen dŭt rhơn rnôk ăp ntil ndơ bâh nơm geh ƀư lĕ geh tăch geh nău dơi, geh rơh nkhêp tât dăch đah năch ta ăp ntŭk lơn.

 “geh Hội nông dân n’gor jă hăn tâm nchră lôch nĕ geh gĭt tât ndơ̆ ndơ kơt rpŭng kho tăch ta ntŭk tăch rgâl điện tử. Dŭt rhơn ngăn, tâm rgop geh âk ntil ndơ bâh nơm geh tăch an dak bah dih n’gor gay ma ndơ geh ƀư ăp nar lơ ma hao lơn. Aƀaơ du rơh geh tăch 1,5 tấn yơn ŭch let năp tay du rơh an geh 4-5 tấn rĭ naư geh bâh nơm mbra hao.

Geh tâm bôk nău kan ntrôl an rgâl mhe rnoh mbrô tâm nău kan tuch tăm, bâh năm 2022 tât aƀaơ, Hội nông dân n’gor Đăk Nông lĕ tâm rgop đah Bưu điện n’gor ƀư rơh nti nău kan an ƀon lan kan lŏ mir ndơ̆ ndơ tuch tăm ta ntŭk tăch rgâl điện tử. ăp jrô nti rgum kơl ntĭm nti mpeh nău blău dŏng công nghệ, rnoh mbrô, gĭt dŏng công nghệ an cán bộ, nuĭh kan ndrel, ăp rnăk pah kan, ăp htx, rmôt kan ndrel. Nkre lah, ntĭm đă pơk tài khoản gay ma ndơ̆ ăp ntil geh ƀư ta ntŭk tăch rgâl n’hanh tăch rgâl ta rnoh mbrô, ntĭm leo ƀon lan ƀư tĭng ăp nău ntrŭnh leo kan tĭng nău kan rnoh mbrô tăch rgâl điện tử. Wa Hồ Gấm, kruanh Hội nông dân n’gor Đăk Nông an gĭt, aƀaơ, ƀon lan kan lŏ mir n’hanh ăp hợp tác xã, doanh nghiệp hôm nha geh mâp âk nău jêr mpeh nău geh gĭt đah công nghệ rnoh mbrô, nău kan ƀư kơp dơn ăp nău mpŏng ueh di mpeh ntil ndơ gay ma ndơ̆ mbơh ta ntŭk tăch rgâl điện tử. Yor nĕ,k nău kơl an ƀon lan n’hanh ăp hợp tác xã lah dŭt khlăy ngăn.

 “Năp lor lah ăp ntil ndơ ma tâm di đah nău mpŏng kơp dơn OCOP rĭ an geh ndơ̆ ta ntŭk tăch rgâl, geh uănh năl lah ueh di n’hanh geh rnoh âk lơn, geh nău knơm tâm n’gâng kan wăng sa. Lôch nĕ ha mbrơi mbrơi ndơ̆ lĕ rngôch ăp ntil ndơ geh ƀư ta ntŭk tăch rgâl gay mka tăch rvăt an ăp ntŭk geh saơ dơi rvăt dơh rgum, dơh pă tăch”.

Ta ntŭk tăch rtgâl điện tử, ndơ tuch tăm bâh ƀon lan kan lŏ mir Dak Nông geh rơh nkhêp mbơh na nê̆ ntil ndơ, mbơh tơih, n’hao rơh geh gĭt tât dăch đah năch rvăt, yơn nkre lah an geh uănh ôp âk lơn mpeh nău ueh, ntil ndơ. bâh ăp nău aơ an geh nuĭh ƀon lan rgâl trong pah kan tăch rgâl, uănh khlăy tât ăp nău mât đăp mpăn, n’hao nău dơi ueh ntil ndơ geh ƀư, mât prăp n’hanh nkret ƀư lôch pe lêh an ueh lơn. Geh kơt nĕ,nău tăch ta ntŭk tăch rgâl điện tử mơ geh nsĭt tay săk rnglăy, gay ma ƀon lan kan lŏ mir njêng rơh nkhêp ueh an ntil ndơ nơm geh ƀư.

Nê lah ăp nău nsĭt dơi bôk năp bah bôk nău  kan ndơ̆ ndơ tuch tăm Dak Nông ta ntŭk ndranh tăch điện tử. Bah kơi aơ, Phóng viên Nkô̆ way nkoch geh rơh tâm ôp đah wa Phạm Tuấn Anh, Giám đốc Sở Nông nghiệp n’hanh Phát triển Nông thôn Dak Nông mpeh nău mhâm ƀư gay ntrŭt ntrôl tăch rgâl ndơ tuch tăm ta ntŭk ndranh tăch điện tử, n’hao dăng rgâl mbrô tâm nău kan tuch tăm ta ntŭk.

  -Dăn may an gĭt du đêt nău dơi ntoh lư bah nău n’glăp ndơ tuch tăm Dak Nông ta ntŭk ndranh tăch điện tử?

 Wa Phạm Tuấn Anh: Đah n’gâng kan tuch tăm, ngoăy tâm ăp nkô̆ nău dŭt khlay mpôl hên uănh khlay nê lah mhâm ƀư gay hun hao, ntrŭt ntrôl tăch ndơ tuch tăm tĭng trong rƀŏng nsĭt geh dŭt âk an nuĭh ƀon lan. yor kơt nê̆, rlău ma ăp trong tăch way ơm kơt ntơm nơh, ma ăp ntŭk đại lý, ăp doanh nghiệp, ăp hợp tác xã, ri ngoăy tâm ăp trong nkra nê lah n’glăp tâm ntŭk ndranh tăch rgâl điện tử. aƀaơ Sở Nông nghiệp n’hanh Phát triển Nông thôn hŏ kan nsum đah Sở Công thương pah kan đah Bưu điện n’gor gay mbơh nău lư nchih săk ăp rnăk tuch tăm lăp ta trang wed bah bưu điện. Nkre, mpôl hên hŏ n’glăp du đêt ndơ geh ƀư tuch tăm, lơn lah ăp ndơ hŏ dơi kơp dơn OCOP ta ntŭk ndranh tăch rgâl điện tử. Kêng dŭt mpôl hên hŏ n’glăp 107 tơ̆ ndơ dơi kơp dơn OCOP lăp tâm ntŭk ndranh tăch rgâl điện tử shoppee, ndranh postmart, ndranh voso n’hanh ntŭk ndranh tăch ocop.

- Nău n’glăp ndơ tuch tăm Dak Nông lăp ta ntŭk ndranh tăch rgâl điện tử aƀaơ dôl geh moh ntil nău jêr jŏt mêh wa?

Wa Phạm Tuấn Anh: Bol ăp ndơ geh ƀư tuch tăm lah nsum, OCOP lah êng hŏ dơi n’glăp tâm ntŭk ndranh tăch rgâl điện tử đŏng, yơn nău dơi mpeh tăch rgâl  mô hŏ dơi geh kơt nău mpŏng. Ta aơ geh bar pe nkô̆, bôk năp, ndơ geh ƀư bah he mô hŏ ăp tŏng nău lư khlay gay tŏng  an nău ŭch geh bah nuĭh dŏng. Tâl bar, săk ntô n’hanh du đêt ntŭk nsing uĕh di êng ƀa ƀă mô hŏ tŏng dơi tâm rlong. Tâl pe, lơn âk kônh wa ƀon lan nha mô hŏ nănh rgâl. Tă bah nuĭh ƀon lan mô hŏ hăr blău pet lât ta ntŭk ndranh tăch rgâl điện tử. Yor kơt nê ma khân păng geh nău mĭn rnam ƀư. Let năp tay mpôl hên mbra pah kan đah ăp nhih pah kan geh tât, mhâm ƀư gay năp nti, kơl khân păng rgâl nău gĭt mĭn êng, uănh trong tăch rgâl ma ntŭk ndanh tăch rgâl điện tử lah ngoăy tâm ăp trong tăch tơm, nkre mpêt nkrem dơi prăk dŏng kan. Nkre, ma ntŭk  ndranh tăch rgâl điện tử rgop nkơnh n’hơ rup gui ndơ geh ƀư săk geh bah Dak Nông.

-Gay n’hao nău dơi tam tăch rgâl ndơ tuch tăm ta ntŭk ndranh tăch điện tử, ntrôl dăng rgâl mbrô tâm tuch tăm, n’gor Dak Nông moh geh trong nkra, trong rƀŏng, trong nchrăp an jŏ jong mêh wa?

  Wa Phạm Tuấn Anh: Mpôl hên dôl geh trong nchrăp rblang bah ăp jêr jŏt, ăp nchiăng khan bah he gay n’gluh ăp trong nkra bah. Lor bôk năp ri mhâm ƀư gay ndơ geh ƀư rĭng uĕh  tâm ban mpeh săk kah, đăp mpăn tŏng  mpeh rnoh âk, tŏng đah nău ŭch geh bah ntŭk tăch rgâl. Gay nkra nkô̆ nău dja mpôl hên ntrôl dăng ma hợp tác xã. An hợp tác xã nơm tâm rgop kan nsum đah rnăk ƀon lan kan lŏ mir, ăp ndơ geh ƀư tuch tăm gay njêng geh âk, tâl bar tâm boh mbra dâk ƀư an kônh wa ƀon lan tuch tăm tĭng di rnoh kah uĕh. Rlău ma nê, mpôl hên tâm buăt nthoi đah ăp doanh nghiệp, ăp trang tăch rgâl điện tử gay mhâm ƀư trong ntop kơl, trong rong dơh,  nta dŭt soih uĕh an kônh wa ƀon lan kan lŏ mir rnôk n’glăp tâm ntŭk ndranh tăch rgâl điện tử. ân mhâm ƀư gay bu saơ lah aơ lah du trong tăch ndơ nsĭt geh nău tam, đăp mpăn, kơl hŭch đêt roh huach prăk dŏng kan, nkre lah trong nkơnh n’hơ dŭt ngăch mpeh ndơ geh ƀư bah khân păng. Kơt nê̆, ta aơ he ân rgâl mpeh nău gĭt êng, nău mĭn, nău dja mô di ƀư dơi du ôi du măng, he ân geh trong nkra ăp kôp, nkre nkoch trêng, ntĭm nti nkre mhâm ƀư gay bu saơ dơi nsĭt geh nău tam wăng sa tâm nău kan dja.

 -Ơ dăn lah uĕh wa Phạm Tuấn Anh, Giám đốc Sở Nông nghiệp n’hanh Phát triển nông thôn n’gor Dak Nông mpeh rơh tâm ôp dja.