Tât lôch khay 9 mhe rlau, nkuăl Kon Rẫy hŏ tăm geh rlau 1.500 ha bri, rlet bơi tât 340 ha rđil nau nchrăp tăm bri geh n’gor Kon Tum jao tâm 4 năm, ntơm năm 2021-2024. Aơ kŏ kah năm tal 4 mro, nkuăl geh nau nchrăp hun hao bri. Wa Nguyễn Văn Thuỷ, Groi Kruanh UBND nkuăl, mbơh, gay tăm bri geh rlet nau nchrăp n’gor jao, mât chăm bri tăm hun hao ueh, n’gâng kan nkuăl hŏ ƀư âk nau kan:

            ‘UBND nkuăl ƀư âk nau mpeh prăk dŏng gay ma kơl an ƀon lan râng tăm mhe rnoh neh bri. Vay rđau đă ăp ntŭk kan, nkuăl, mêt iănh, nchră mbơh, ntĭm, bonh đă ƀon lan mât chăm bri tăm. Ăp năm neh bri mô jêng, tơm si khŏt yor ăp nkô̆ mô nâp ri lŏ tăm ntop tay tâm ăp năm êp nê”.

            Ndrel đah nkuăl Kon Rẫy, lvang năm 2021-2024, âk nkuăl bah n’gor Kon Tum ghŏ rlet nau nchrăp tăm bri. Tâm nê, nkuăl ƀon têh Kon Tum, nkuăl Tu Mơ Rông ndrel Kon Plông...hŏ rlet nau nchrăp ntơm bar pe rhiăng tât rlau 100 ha. Âk ntŭk bah n’gor Kon Tum hôm kăl si tih dôih, su bri ƀư mir ri rnôk aơ ƀon lan ndơn saơ nau geh dơi bah bri ndrel râng tăm tăm. Nô A Long, thôn Ti Tu, xã Đăk Hà, nkuăl Tu Mơ Rông mbơh, rnăk nô ndrel âk rnăk ƀon lan tâm ƀon hŏ ntrơn jêng tăm bri tâm neh tăm bum jŏ năm mô hôm jêng, geh rlau 30 ha:

            ‘Bah năp nơh gâp tăm bum blang, ma bum mô jêng ueh, bum ôm mô jêng ri jêr ngăn. Gâp kŏ kưt lah kônh wa ƀon lan bah năp nơh mô janh mĭn tât tăm bri ôh. Cán bộ xã, jêh ri thôn hăn bonh đă ri nơm kŏ gĭt đŏng. Ngih gêh geh neh tăm bum jŏ năm mô jêng, bum jê̆ ri ma tăm tơm n’ho. Geh xã kơl an kon ntil tơm ri nơm rhơn ngăn. Gâp nsôih hăn muih pih, mât chăm ân tơm ngăch têh, jêh ri njrăng rdâng ŭnh sa ân ueh”.

            Ƀư tĭng nau ntrŭnh Đại hội Đảng bộ n’gor Kon Tum tal XVI, mpeh tăm mhe 15 rbăn ha bri tâm năm kan, êng tăm bri rgum, ăp nkuăl tâm n’gor hôm tăm tơm si nkhah êng. Tât rnôk aơ, hŏ tăm mhe geh rlau 3 rkeh 600 rbăn tơm, geh rlau 121% nau nchrăp, mêt rong, ndâk tăm rlau 6.100 ha bri, jao 9.400 ha bri ân ƀon lan mât, pă kan pah tâm nau kan mât njrăng bri ân rlau 24 rbăn nŭih, rlet nau nchrăp ntrŭnh... Wa Nguyễn Quốc Tuấn, Groi Kruanh n’gâng kan mât njrăng bri n’gor Kon Tum mbơh, ăp nau tăm, mât chăm bri dôl pă kan pah, kơl ƀon lan hun hao văng sa tuch tăm:

            ‘Tâm rnôk tơm dôl hao têh, nŭih ƀon lan ndăn neh gay ma ƀư nau kan tăm tơm tăm êng êng, tâm grop gay ma n’hao nau săk geh văng sa ân ƀon lan tăm bri. Mpeh nau jŏ jong ri nau kan tăm bri, nkŭm n’hâm tâm yôk mra leo nsĭt nau geh dơi ân bon lan kơt lah geh trok nau kan mât chăm bri, geh nau kơl an tă bah nau dŏng tơm si nơm năm, ăp ntil ndơ geh tă bah bri tăm ndrel dăch tât ƀư nau geh dơi bah các-bon đŏng. Aơ lah ăp nau geh đăp mpăn ndrel jŏ jong ân ƀon lan rnôk râng tăm bri”.

            Ndrel ma nau ntrŭt dăng nau tăm bri, ntơm bôk năm kan, n’gor uỷ Kon Tum geh nau ntrŭnh mrô 06 mpeh hun hao tăm bri nâp nâl tât năm 2025, rƀŏng tât năm 2030. Ntơm năm 2021-2030, n’gor Kon Tum rgum rlau 1.500 rmen gay ma tăm bri, rnoh geh nau kan tăm bri bah n’gor năm 2023 geh 7.500 rmen, tâm nê êng rnoh bri geh bơi tât 950 rmen. Wa Nguyễn Tấn Liêm, Giám đốc N’gâng kan tuch tăm ndrel hun hao ƀon lan n’gor Kon Tum mbơh, rmôt kan dôl đă n’gor n’hao rnoh kơl an ndrel nau ntuh kơl tâm tăm bri gay bonh đă ƀon lan tăm bri. Nkô̆ nau ndŏ luh lah jêng nkuăl tăm bri dŏng, tŏng dơi nau ŭch ê nkra kđar:

            ‘Rnoh kơl an ân ƀon lan tăm bri dŏng knŭng geh 10 rkeh/ha. Trong kan gay ma ntrŭnh geh ueh lơn kŏ kơt lah hun hao ân năm kan ba kơi rnoh kơl an âk lơn gay nŭih ƀon lan geh nau dơi tă bah bru tăm, rnôk ê geh ndơ geh prăk ri bri 6,7 năm mơ geh si. Tal bar lah nơm ntuh kơl hôm dêh, mhe 67 rkeh/ha ma tâm 4 năm. Lah kơt tăm bri nklăp 150 rkeh/ha, tâm 4,5 năm ri rơh mât chăm âk lơn bri mra geh nau văng sa prêh lơn”. 

            Jêh 4 năm ƀư nau ntrŭnh Đại hội Đảng bộ n’gor tal XVI, năm kan 2020-2025 mpeh tăm bri ndrel 3 năm ƀư nau ntrŭnh mrô 06 mpeh hun hao tăm bri nâp nâl tât năm 2025, rƀĭng tât năm 2030, nau kan mât, hun hao bri bah n’gor Kon Tum geh dơi âk nau ueh. Rnôk aơ, ndrel ma nau mât, ƀư ueh rlau 550 rbăn ha bri dôl chăt êng, ndrel bơi tât 64 rbăn ha bri tăm, n’gor Kon Tum dôl kơl an nau dơi gay ntuh kơl hun hao văng sa bri tĭng trong nâp nâl ndrel rƀŏng tât nkô̆ nau nkŭm n’hâm bri geh 64% tâm dŭt năm 2025./.