Tâm rnôk hăn khâl ngăn Chile, ta thủ đô Santiago de Chile, Kruanh dak Lương Cường hŏ geh rơh mâp đah kruanh ăp doanh nghiệp ntoh lư bah Chile. Nkoch mpeh rơh mâp, ntơh măt ăp tập đoàn, công ty dâk bôk năp bah Chile rnê âk săk geh hun hao bah ntŭk tăch rgâl Việt Nam; ŭch rŏng doanh nghiệp bar dak ndăn du trong dŭt uĕh ăp nău tâm ton tăch rgâl ma bar dak lăp kan nsum.

Lah ta rơh mâp, Kruanh dak Lương Cường nkoch kloh, tâm bah ri  aơ nơh, bol nô nău wăng sa lam ntŭr neh geh âk rgoh n’gơ, jêr jŏt. Tâm rnôk nê, tâm boh tâm rnglăp n’hanh tâm boh tâm brê Việt Nam - Chile nha hôm hun hao uĕh lăng đŏng. Kruanh dak  lah rjăp Việt Nam way uănh khlay, ndrel hăn mpôl doanh nghiệp lĕ ma tâm dak n’hanh dak bah dih, uănh khlay, mât njrăng nău dơi n’hanh nău geh tâm dih bah nuĭh ntuh kơl, tâm ban kơt đăp mpăn tâm ban geh đah ngih dak, nuĭh ntuh kơl n’hanh nuĭh ƀon lan đŏng; ton nta trong dơh tăch rgâl n’hanh ntuh kơl dơh soih an ăp doanh nghiệp dak bah dih lah nsum n’hanh Chile lah êng.